പാലക്കുന്ന്: ചോദിക്കാനും പറയാനും ആരുമില്ലെന്ന അവസ്ഥ. മദ്യപാനവും കഞ്ചാവ് വലിയുമൊപ്പം അതിന്റെ വില്പനയും നിര്‍ബാധം തുടരാന്‍ പ്ലാറ്റ്‌ഫോമിലെ കാത്തിരിപ്പ് ഷെള്‍ട്ടറുകള്‍ അവര്‍ക്ക് സുഖവാസ ഒളിത്താവളം. കോട്ടിക്കുളം റെയില്‍വേ സ്റ്റേഷനില്‍ ഒന്നും രണ്ടും നമ്പര്‍ പ്ലാറ്റ്‌ഫോമുകളില്‍ യാത്രക്കാര്‍ക്ക് വേണ്ടിയാണ് റെയില്‍വേ കാത്തിരിപ്പ് ഷെല്‍ട്ടറുകള്‍ പണിതത്. പക്ഷേ വര്‍ഷങ്ങളായി ഇത് ഉപയോഗിക്കുന്നത് മദ്യപാനികളും കഞ്ചാവ് വലിക്കാരുമാണ്.
വെയിലും മഴയുമേല്‍ക്കാതെ പകലെന്നോ രാത്രിയെന്നോ വ്യത്യാസമില്ലാതെ ഈ ചെറു കൂടാരങ്ങള്‍ കൈയ്യടക്കി വെച്ചിരിക്കുകയാണ് ഇക്കൂട്ടര്‍. സ്റ്റേഷന്റെ വടക്കേ അറ്റത്ത് ഒന്നും രണ്ടും പ്ലാറ്റ്‌ഫോമുകളിലാണ് ചെറു ഷെള്‍ട്ടറുകള്‍ റെയില്‍വേ ഈ ആദര്‍ശ് സ്റ്റേഷനില്‍ പണിയിച്ചത്.
മദ്യപാനികള്‍ ഇവിടം കൈയടക്കിയതോടെ സ്ത്രീകളും കുട്ടികളുമടക്കം യാത്രക്കാര്‍ ആളൊഴിഞ്ഞ ഈ ഭാഗത്തേക്ക് നടന്ന് നീങ്ങാന്‍ പോലും ഭയപ്പെടുകയാണ്.
കാത്തിരിപ്പ് ഷെല്‍ട്ടറിന്റെ പാര്‍ശ്വങ്ങളില്‍ കാട് മൂടി കിടക്കുന്നതും ലഹരിക്കാര്‍ക്ക് അനുഗ്രഹമാകുന്നു. സ്ത്രീകളടക്കം നിരവധി യാത്രക്കാര്‍ പേരെഴുതി ഒപ്പിട്ട് ഹരജികള്‍ പലപ്പോഴായി അധികൃതര്‍ക്ക് നല്‍കിയെങ്കിലും നടപടികളൊന്നും നാളിതുവരെ ഉണ്ടായിട്ടില്ലെന്നാണ് അവരുടെ പരാതി. റെയില്‍വേ സുരക്ഷാ സേനയുടെ സഹായത്തോടെ പ്ലാറ്റ്‌ഫോമില്‍ നിന്ന് ഈ ശല്യക്കാരെ എന്നന്നേക്കുമായി ഒഴിപ്പിക്കണം. പ്ലാറ്റ്‌ഫോമില്‍ നിന്ന് ഈ ഷെല്‍ട്ടറുകള്‍ പൊളിച്ച് മാറ്റിയാലെങ്കിലും ഇവരുടെ ശല്യം ഒരു പരിധിവരെ മാറികിട്ടുമെന്നാണ് നാട്ടുകാര്‍ പറയുന്നത്.
പ്രതികരിക്കാൻ ഇവിടെ എഴുതുക: