തിരുവനന്തപുരം; ലോകവ്യാപകമായി പിടിപെട്ട കൊവിഡ് 19 നെ പ്രതിരോധിക്കുന്നതിനും, രോഗവ്യാപനം മൂലം ശാരീരികമായോ, മാനസികമായോ, സാമ്പത്തികമായോ ബുദ്ധിമുട്ട് അനുഭവിക്കുന്നവരെ സഹായിക്കുന്നതിനും വേണ്ടി മാതാ അമൃതാനന്ദമയി മഠത്തിന്റെ 13 കോടി രൂപയുടെ സഹായ ഹസ്തം. 10 കോടി രൂപ കേന്ദ്ര സര്‍ക്കാരിന്റെ പ്രധാനമന്ത്രിയുടെ കെയര്‍ ഫണ്ടിലേക്കും , 3 കോടി രൂപ കേരള മുഖ്യമന്ത്രിയുടെ ദുരിതാശ്വാസ നിധിയിലേക്കുമാണ് നല്‍കുക. കൂടാതെ കൊവിഡ് 19 രോഗികള്‍ക്ക് കൊച്ചിയിലെ അമൃത ഇന്‍സ്റ്റിറ്റിയൂട്ട് ഓഫ് മെഡിക്കല്‍ സയന്‍സസ് (അമൃത ആശുപത്രി) സൗജന്യ ചികിത്സയും നല്‍കും.
ഇത് കൂടാതെ മഠത്തിന്റെ കീഴിലുള്ള സര്‍വകലാശാലയായ അമൃത വിശ്വവിദ്യാപീഠത്തിന്റെ നേതൃത്വത്തില്‍ ആരോഗ്യ മേഖലയിലെ ആവശ്യങ്ങള്‍ക്കായി കുറഞ്ഞ ചിലവിലുള്ള മുഖാവരണങ്ങള്‍, ഗൗണുകള്‍, വെന്റിലേറ്ററുകള്‍, അതിവേഗം തയ്യാറാക്കാവുന്ന ഐസൊലേഷന്‍ വാര്‍ഡുകള്‍, മെഡിക്കല്‍ മാലിന്യങ്ങള്‍ നിര്‍മ്മാജനം ചെയ്യാവുന്ന സംവിധാനങ്ങള്‍, കൊറന്റൈനിലുള്ള രോഗികളെ വിദൂര നിരീക്ഷണം ചെയ്യുന്നതിനുള്ള സാങ്കേതിക വിദ്യകള്‍ എന്നിവ ഒരുക്കുന്നതിനായി വിവിധ മേഖലകളില്‍ നിന്നുമുള്ള വിദഗ്ധരുടെ നേതൃത്വത്തില്‍ ഒരു സംഘം ഗവേഷണം നടത്തി വരുന്നുണ്ട്. വൈദ്യ ശാസ്ത്രം, നാനോ സയന്‍സ്, നിര്‍മ്മിത ബുദ്ധി, ബിഗ് ഡാറ്റ, സെന്‍സര്‍ മാനുഫാക്ചറിംഗ്, മറ്റ് ശാസ്ത്ര മേഖലകള്‍ എന്നിവയില്‍ നിന്നുമുള്ള 60 വിദഗ്ധരാണ് ഈ സംഘത്തില്‍ ഉള്ളതെന്നും മഠം അധികൃതര്‍ അറിയിച്ചു.
ലോകം മുഴുവനും കരയുകയും, വേദന അനുഭവിക്കുകയും ചെയ്യുന്ന ഈ അവസരത്തില്‍ അമ്മയുടെ ഹൃദയം വല്ലാതെ വേദനിക്കുന്നതായി അമ്മ പറഞ്ഞു. ഈ മഹാമാരിയില്‍ മരിച്ചവരുടെ ആത്മശാന്തിക്കും, അവരുടെ ബന്ധുമിത്രാദികളുടെ സമാധാനത്തിനും , ലോകശാന്തിക്കും, ഈശ്വരി കൃപക്കും വേണ്ടി നമുക്ക് ഒരുമിച്ച് പ്രാര്‍ത്ഥിക്കാമെന്നും അമ്മ പറഞ്ഞു. കൊവിഡ് 19 തിന്റെ ദുരന്തവും അതിന്റെ ഭാഗമായുള്ള നിയമന്ത്രണങ്ങളും കാരണം മാനസിക സമ്മര്‍ദ്ദവും, വിഷാദവും, മറ്റ് മാനസിക വെല്ലുവിളികളും അനുഭവിക്കുന്നവരെ സഹായിക്കുന്നതിനായി അമ്മയുടെ നിര്‍ദ്ദേശപ്രകാരം അമൃത സര്‍വ്വകലാശാലയും, അമൃത ആശുപത്രിയും ചേര്‍ന്ന് ടെലിഫോണ്‍ സഹായ കേന്ദ്രവും ആരംഭിച്ചിട്ടുണ്ട്. 0476 280 5050 എന്ന നമ്പരില്‍ വിളിച്ചാല്‍ ഇവിടെ നിന്നും കൗണ്‍സിലിങും ലഭിക്കും.
കൂടാതെ ഈ വേളയില്‍ ഡോക്ടര്‍മാരോടും, മാനസികാരോഗ്യ വിദഗ്ധരോടും കൗണ്‍സിലിങ്ങിനായി സമയം കണ്ടെത്തണമെന്നും അമ്മ ആവശ്യപ്പെട്ടിരുന്നു. മനുഷ്യര്‍ പ്രകൃതിയുമായി സഹവര്‍ത്തിത്വത്തില്‍ ജീവിക്കണമെന്നും അല്ലെങ്കില്‍ അത് വലിയ ദുരന്തങ്ങള്‍ക്ക് വഴി വെക്കുമെന്നും എത്രയോ വര്‍ഷങ്ങളായി അമ്മ പറയാറുണ്ട്.
മനുഷ്യര്‍ സ്വാര്‍ത്ഥതക്കായി പ്രകൃതിയോട് ചെയ്തതിന്റെ ഫലമാണ് ഇത്തരം മഹാമാരികളായി തിരിച്ചെത്തുന്നത്. നാം പ്രകൃതിയുടെ സേവകരാണ് എന്ന ഭാവമാണ് വളര്‍ത്തിയെടുക്കേണ്ടത്. എളിമയും അനുസരണയും, ആദരവും, നമ്മള്‍ ശീലിക്കണം. ഇനിയെങ്കിലും നമ്മുടെ ഹുങ്ക് പ്രകൃതിയോട് കാണിക്കാതിരിക്കാന്‍ ശ്രമിക്കണം. പ്രകൃതിയുടെ മുന്‍പില്‍ അടിയറവ് പറയാന്‍ സമയമായിരിക്കുന്നു. സര്‍വാപരാധങ്ങളും പൊറുക്കണേ എന്ന് കേണപേക്ഷിക്കാന്‍ സമയമായിരിക്കുന്നു. എന്ത് ചെയ്താലും പ്രകൃതി ക്ഷമിക്കും, പൊറുക്കും, മാപ്പ് നല്‍കും എന്നുള്ള ചിന്ത അവസാനിപ്പിക്കാന്‍ സമയമായിരിക്കുന്നു. അതിന് പ്രകൃതി മാനവരാശിക്ക് നല്‍കുന്ന അത്യുച്ചത്തിലുള്ള ഒരു സയറനാണ് കൊറോണയെന്നും അമ്മ പറഞ്ഞു .
കൊവിഡ് 19 സംബന്ധമായ വിഷയങ്ങളെക്കുറിച്ചും , സേവനാവസരങ്ങളെക്കുറിച്ചും ഓണ്‍ലൈന്‍ പാഠശാലകളിലൂടെ അമൃത വിദ്യാര്‍ത്ഥികളും മനസിലാക്കുന്നുണ്ട്. അമൃത സര്‍വ്വിന്റെ ഭാഗമായി ദത്തെടുത്ത 101 ഗ്രാമങ്ങളിലെ പ്രതിനിധികളുമായും മഠം അധികൃതര്‍ നിരന്തരമായി ഓണ്‍ലൈന്‍ വഴി സമ്പര്‍ക്കം പുലര്‍ത്തുകയും, ഈ ഗ്രാമങ്ങളില്‍ കൊവിഡ് 19 തുമായി ബന്ധപ്പെട്ട അവബോധ പ്രവര്‍ത്തനങ്ങള്‍ ഏകോപിപ്പിക്കുന്നതിനോടൊപ്പം , ഗ്രാമീണര്‍ക്ക് സര്‍ക്കാര്‍ സഹായങ്ങള്‍ ലഭ്യമാക്കുന്നതിനാവശ്യമായ നടപടികളും, വ്യാജവാര്‍ത്തകള്‍ പടരാതിരിക്കാനുള്ള മുന്‍ കരുതലുകളും സ്വീകരിക്കുന്നുണ്ട്.
ചില ഗ്രാമങ്ങളില്‍ മഠത്തിന്റെ നേതൃത്വത്തില്‍ മാസ്‌ക് നിര്‍മ്മിക്കാന്‍ പഠിപ്പിക്കുകയും, സര്‍ക്കാര്‍ നിര്‍ദ്ദേശാനുസരണം ജനങ്ങള്‍ക്ക് അത് വിതരണം ചെയ്യുകയും ചെയ്തുവരുന്നു.2005 മുതല്‍ ദുരിതാശ്വസത്തിനായി ഇത് വരെ മഠം 500 കോടിയിലധികം രൂപയാണ് അമ്മയുടെ നിര്‍ദ്ദേശാനുസരണം ചിലവവഴിച്ചിട്ടുള്ളത്. സാമ്പത്തിക സഹായം, ഗാര്‍ഹിക വസ്തുക്കളുടെ വിതരണം, വൈദ്യസഹായം, ഭവനപുനര്‍നിര്‍മ്മാണം തുടങ്ങിയവയൊക്കെ ഇതില്‍ ഉള്‍പ്പെടുന്നു.
പ്രതികരിക്കാൻ ഇവിടെ എഴുതുക: