തിരുവനന്തപുരം: കൊറോണ വ്യാകമാകുന്ന പശ്ചാത്തലത്തില്‍ രോഗം സാമൂഹിക വെല്ലുവിളിയും സാമ്പത്തിക വെല്ലുവിളിയും ഉയര്‍ത്തുന്നുണ്ടെന്നും എന്നാല്‍ അതിന്റെ പേരില്‍ സാലറി ചലഞ്ചില്‍ പങ്കെടുക്കാന്‍ സര്‍ക്കാര്‍ ജീവനക്കാരില്‍ സമ്മര്‍ദ്ദം ചെലുത്തരുതെന്നും കേന്ദ്ര വിദേശകാര്യ സഹമന്ത്രി വി. മുരളീധരന്‍.
രാജ്യം മുഴുവന്‍ കൊവിഡിന് മുന്നില്‍ വിറങ്ങലിച്ച് നില്‍ക്കുകയാണ്. ഇതുയര്‍ത്തുന്ന സാമൂഹിക വെല്ലുവിളി പോലെ തന്നെ സാമ്പത്തികവെല്ലുവിളിയും ഭയാനകമാണ്. അത് മറികടക്കാന്‍ നമുക്ക് ഊര്‍ജ്ജിതശ്രമങ്ങള്‍ നടത്തേണ്ടതുണ്ട്. എന്നുകരുതി സര്‍ക്കാര്‍ ജീവനക്കാരെ കറവപ്പശുക്കളായി കണ്ട് സാലറിചലഞ്ചിന്റെ പേരില്‍ പിഴിയരുതെന്ന് അദ്ദേഹം പറഞ്ഞു.
മുഖ്യമന്ത്രിയുടെ ദുരിതാശ്വാസനിധിയിലേക്ക് ആര്‍ക്കുവേണമെങ്കിലും സംഭാവന നല്‍കാം. അതൊരിക്കലും അടിച്ചേല്‍പ്പിക്കലോ സമ്മര്‍ദ്ദത്തിലൂടെയോ ആകരുത്. ഓരോരുത്തര്‍ക്കും കഴിവുള്ളതുപോലെ പണം സംഭാവന നല്‍കാനോ, നല്‍കാതെ മാറിനില്‍ക്കാനോ ഉള്ള സാഹചര്യം ഒരുക്കണം. കഴിഞ്ഞ പ്രളയകാലത്ത് സാലറിചലഞ്ചിന്റെ പേരില്‍ സര്‍ക്കാര്‍ കാട്ടിക്കൂട്ടിയ വിക്രിയകള്‍ ജീവനക്കാരുടെ മനസില്‍ നീറുന്ന കനലായി ഇപ്പോഴുമുണ്ട്. സ്ഥലംമാറ്റ ഭീഷണി പോലും മുഴക്കിയാണ് പലരെയും നിര്‍ബന്ധിച്ച് സാലറി ചലഞ്ചില്‍ പങ്കെടുപ്പിച്ചത്. എന്നിട്ടും മാറിനിന്നവരോട് പലതരത്തിലുള്ള പ്രതികാര നടപടികള്‍ സര്‍ക്കാര്‍ കൈക്കൊണ്ടു. ഇത് വിവാദമാകുകയും, കോടതിയില്‍ ഹര്‍ജി എത്തുകയും ചെയ്തിരുന്നെന്നും കേന്ദ്ര മന്ത്രി വ്യക്തമാക്കി.
പ്രളയബാധിതര്‍ക്ക് വേണ്ടി കെഎസ്ഇബി സാലറി ചലഞ്ചിലൂടെ പിരിച്ച കോടിക്കണക്കിന് രൂപ വകമാറ്റി ചെലവഴിച്ചത് മാധ്യമങ്ങള്‍ വാര്‍ത്തയാക്കിയപ്പോഴാണ് തിരിച്ചടച്ചത്. വേലി തന്നെ വിളവ് തിന്നുന്ന സ്ഥിതി ആവര്‍ത്തിക്കരുതെന്നും മുരളീധരന്‍ പറഞ്ഞു.
ഫെയ്‌സ്ബുക്ക് പോസ്റ്റിന്റെ പൂര്‍ണരൂപം:
രാജ്യം മുഴുവന്‍ കൊവിഡിന് മുന്നില്‍ വിറങ്ങലിച്ച് നില്‍ക്കുകയാണ്. ഇതുയര്‍ത്തുന്ന സാമൂഹിക വെല്ലുവിളി പോലെ തന്നെ ഭയാനകമാണ് സാമ്പത്തികവെല്ലുവിളിയും. അത് മറികടക്കാന്‍ നമുക്ക് ഊര്‍ജ്ജിതശ്രമങ്ങള്‍ നടത്തേണ്ടതുണ്ട്. എന്നുകരുതി സര്‍ക്കാര്‍ ജീവനക്കാരെ കറവപ്പശുക്കളായി കണ്ട് സാലറിചലഞ്ചിന്റെ പേരില്‍ പിഴിയരുത്. സംസ്ഥാനത്തെ സര്‍ക്കാര്‍ ജീവനക്കാരും അധ്യാപകരും നിര്‍ബന്ധമായും സാലറി ചലഞ്ചില്‍ പങ്കെടുക്കണമെന്ന ധ്വനിയാണ് മുഖ്യമന്ത്രിയുടെ വാക്കുകളില്‍ സ്ഫുരിക്കുന്നത്. സാമ്പത്തിക പരാധീനതകളാല്‍ വീര്‍പ്പുമുട്ടുന്നവരെ എന്തിന്റെ പേരിലായാലും ഈയവസരത്തില്‍ ദ്രോഹിക്കുന്നത് ശരിയല്ല. വിഷയത്തില്‍ സര്‍വീസ് സംഘടനകളുടെ അഭിപ്രായങ്ങള്‍ കൂടി സര്‍ക്കാര്‍ മുഖവിലയ്‌ക്കെടുക്കണം. മുഖ്യമന്ത്രിയുടെ ദുരിതാശ്വാസനിധിയിലേക്ക് ആര്‍ക്കുവേണമെങ്കിലും സംഭാവന നല്‍കാം. അതൊരിക്കലും അടിച്ചേല്‍പ്പിക്കലോ സമ്മര്‍ദ്ദത്തിലൂടെയോ ആകരുത്. ഓരോരുത്തര്‍ക്കും കഴിവുള്ളതുപോലെ പണം സംഭാവന നല്‍കാനോ, നല്‍കാതെ മാറിനില്‍ക്കാനോ ഉള്ള സാഹചര്യം ഒരുക്കണം.
കഴിഞ്ഞ പ്രളയകാലത്ത് സാലറിചലഞ്ചിന്റെ പേരില്‍ സര്‍ക്കാര്‍ കാട്ടിക്കൂട്ടിയ വിക്രിയകള്‍ ജീവനക്കാരുടെ മനസില്‍ നീറുന്ന കനലായി ഇപ്പോഴുമുണ്ട്. സ്ഥലംമാറ്റ ഭീഷണി പോലും മുഴക്കിയാണ് പലരെയും നിര്‍ബന്ധിച്ച് സാലറി ചലഞ്ചില്‍ പങ്കെടുപ്പിച്ചത്. എന്നിട്ടും മാറിനിന്നവരോട് പലതരത്തിലുള്ള പ്രതികാര നടപടികള്‍ സര്‍ക്കാര്‍ കൈക്കൊണ്ടു. ഇത് വിവാദമാകുകയും, കോടതിയില്‍ ഹര്‍ജി എത്തുകയും ചെയ്തിരുന്നു. പിരിച്ച തുക വകമാറ്റി ചെലവഴിച്ചതും സമീപ കാല ചരിത്രമാണ്.പ്രളയബാധിതര്‍ക്ക് വേണ്ടി കെഎസ്ഇബി സാലറി ചലഞ്ചിലൂടെ പിരിച്ച കോടിക്കണക്കിന് രൂപ വകമാറ്റി ചെലവഴിച്ചത് മാധ്യമങ്ങള്‍ വാര്‍ത്തയാക്കിയപ്പോഴാണ് തിരിച്ചടച്ചത്. വേലി തന്നെ വിളവ് തിന്നുന്ന സ്ഥിതി
ആവര്‍ത്തിക്കരുത്. കൊവിഡ് ഭീതിയില്‍ കഴിയുന്ന സാമാന്യജനസമൂഹത്തിന് അത് താങ്ങാന്‍ കഴിഞ്ഞെന്ന് വരില്ല!
പ്രതികരിക്കാൻ ഇവിടെ എഴുതുക: