കുമളി: പീരുമേട് താലൂക്കിലെ വിവിധ തേയിലത്തോട്ടങ്ങളില്‍ തൊഴിലാളികളെന്ന വ്യാജേന റോഹിങ്ക്യന്‍ നുഴഞ്ഞുകയറ്റക്കാര്‍ ഒളിവില്‍ താമസിക്കുന്നതായി സൂചന. ഇക്കാര്യം ട്രേഡ് യൂണിയന്‍ സംഘടനകള്‍ ഉള്‍പ്പെടെ സ്ഥിരീകരിക്കുന്നു. താഴെത്തട്ടില്‍നിന്ന് സംസ്ഥാന ആഭ്യന്തര വകുപ്പിന് വിവരങ്ങള്‍ നല്‍കിയിട്ടും നടപടിയില്ലാത്തത് ഇക്കൂട്ടര്‍ക്ക് പ്രോത്സാഹനമാകുന്നു. പീരുമേട് താലൂക്കിലെ പ്രധാന തേയില പ്ലാന്റേഷനുകളിലെ തൊഴിലാളികളില്‍ പതിനായിരത്തോളം പേര്‍ ഇതരസംസ്ഥാന തൊഴിലാളികളാണ്. ഇവരില്‍ മൂവായിരത്തോളംപേര്‍ വ്യക്തമായ തിരിച്ചറിയല്‍ രേഖകള്‍ കൈവശമില്ലാത്തവര്‍.
കൃത്രിമ തിരിച്ചറിയല്‍ രേഖകള്‍ നല്‍കി തോട്ടം തൊഴിലാളികളായി താലൂക്കിലെ ഉള്‍ഗ്രാമങ്ങളില്‍ ഒളിച്ച് താമസിക്കുന്നവരില്‍ മുസ്ലിം ഭീകരര്‍ ഉള്‍പ്പെടെയുള്ളവരുണ്ട്. വേതനം ലഭിക്കുകയെന്നതിനപ്പുറം പോലീസിന്റെ കണ്ണില്‍പ്പെടാതെ ഒളിവില്‍ കഴിയാന്‍ സൗകര്യം കണ്ടെത്തുകയെന്നത് മാത്രമാണ് ഇവരുടെ ഉദ്ദേശ്യം. പ്രാദേശിക ഭീകരസംഘടനകളുടെ ആളുകളുമായി ഇത്തരം ആളുകള്‍ നിരന്തരം ബന്ധപ്പെടുന്നതായി സംശയമുണ്ട്. കൃത്രിമ തിരിച്ചറിയല്‍ രേഖകള്‍ നല്‍കി കേരളത്തില്‍ നിന്ന് റോഹിങ്ക്യന്‍ അഭയാര്‍ത്ഥികള്‍ ഉള്‍പ്പെടെയുള്ളവര്‍ മൊബൈല്‍ സിം കാര്‍ഡുകള്‍ തരപ്പെടുത്തിയിട്ടുണ്ട്.
മുന്‍പ് ഹാരിസന്‍ മലയാളം പ്ലാന്റേഷനിലെ ഒരു ഡിവിഷനില്‍ വേതനം ലഭിക്കാതെ വന്നതോടെ ഇതരസംസ്ഥാന തൊഴിലാളികള്‍ പണിമുടക്കി. സമരത്തില്‍ ഇവര്‍ മുഴക്കിയ മുദ്രാവാക്യങ്ങള്‍ മതപരമായ വചനങ്ങളായിരുന്നു. ട്രേഡ് യൂണിയന്‍ നേതാക്കളെ ഒഴിവാക്കി പ്രാദേശിക മതനേതാക്കള്‍ ഇടപെട്ടാണ് അപ്പോള്‍ പ്രശ്‌നം പരിഹരിച്ചതെന്ന് പ്ലാന്റേഷന്‍ മസ്ദൂര്‍ സംഘ് ഉള്‍പ്പെടെയുള്ള ട്രേഡ് യൂണിയനുകള്‍ പറയുന്നു.
ബംഗാള്‍, ആസാം തുടങ്ങിയ സംസ്ഥാനങ്ങളില്‍ നിന്നുള്ളവര്‍ കേരളത്തിലെ ഏജന്റുമാര്‍ മുഖേനയാണ് തോട്ടങ്ങളില്‍ ഒളിവില്‍ താമസിക്കാന്‍ അവസരം ഒരുക്കുന്നത്. തൊഴിലാളികളുടെ വേതനത്തില്‍ മുഖ്യപങ്ക് ഇടനിലക്കാര്‍ കമ്മീഷനായി തട്ടിയെടുക്കും. രാവിലെ ആറ് മുതല്‍ വൈകിട്ട് അതേസമയം വരെ തൊഴിലെടുത്തശേഷം മാനേജ്മെന്റ് ഇടനിലക്കാര്‍ക്ക് തങ്ങളുടെ പണം നല്‍കുന്നതാണ് അഭയാര്‍ത്ഥികളെ പ്രകോപിപ്പിക്കുന്നത്. ദേശീയ അന്വേഷണ ഏജന്‍സികള്‍ നേരിട്ടെത്തി പരിശോധന നടത്തിയാല്‍ മാത്രമേ ഇതില്‍ വ്യക്തത വരുത്താനാകൂ. ഭരണമുന്നണിയിലെ വിവിധ ട്രേഡ് യൂണിയനുകള്‍ നിലപാട് സ്വീകരിക്കാത്തതിലും ദുരൂഹതയുണര്‍ത്തുന്നു.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: