ചേര്‍ത്തല-മണ്ണുത്തി പാത ചോരക്കളമാകുന്നു

ചേര്‍ത്തല: അപകടരഹിത മാതൃകാ ഇടനാഴിയായി പ്രഖ്യാപിച്ച ചേര്‍ത്തല-മണ്ണുത്തി പാത ചോരക്കളമാകുന്നു. ഏതാനും മാസങ്ങള്‍ക്കുള്ളില്‍ ഇവിടെ അപകടങ്ങളില്‍ മരിച്ചത് പത്തിലധികം പേരാണ്.

ഏതാനും ദിവസം മുമ്പ് പുലര്‍ച്ചെ പൊന്നാംവെളിയില്‍ ഗൃഹപ്രവേശന ചടങ്ങിന് പോകുകയായിരുന്ന കുടുംബം സഞ്ചരിച്ചിരുന്ന വാന്‍ മീഡിയനില്‍ ഇടിച്ചു മറിഞ്ഞ് നാലു വയസുകാരി മരിച്ചിരുന്നു. അന്നേദിവസം തന്നെ തുറവൂര്‍ വില്ലേജ് ഓഫീസിന് സമീപം വളമംഗലം തച്ചേത്ത് വീട്ടില്‍ അശോക് കുമാറും അജ്ഞാത വാഹനമിടിച്ച് മരിച്ചു. പരിക്കുകളോടെ രക്ഷപെട്ട അപകടങ്ങളും നിരവധി.

ദേശീയപാതയോരത്ത് ബസുകള്‍ പാര്‍ക്ക് ചെയ്യുന്നതിനായി സ്ഥാപിച്ചിട്ടുള്ള ബസ്‌ബേകള്‍ കച്ചവടക്കാര്‍ കയ്യേറിയതോടെ വാഹനങ്ങള്‍ അനധികൃതമായി പാര്‍ക്ക് ചെയ്യുന്നതും അപകടങ്ങള്‍ പെരുകാന്‍ കാരണമാകുന്നുണ്ട്. ഒറ്റപ്പുന്ന മുതല്‍ അരൂര്‍ വരെയുള്ള ദേശീയപാതയിലെ എല്ലാ ജംഗ്ഷനുകളിലും ബസ്‌ബേകള്‍ ധാരാളമുണ്ട്. എന്നാല്‍ ഇവിടൊന്നും പാര്‍ക്ക് ചെയ്യാനാകുന്നില്ലെന്നാണ് വാഹന ഉടമകളുടെ പരാതി.

ഇതിനാല്‍ ലോറികളും മറ്റു വാഹനങ്ങളും റോഡിലേക്ക് കയറ്റി പാര്‍ക്ക് ചെയ്യുന്നത് അപകടങ്ങള്‍ക്ക് കാരണമാകുന്നു. അമിതവേഗത്തിലെത്തുന്ന വാഹനങ്ങള്‍ തൊട്ടടുത്ത് എത്തുമ്പോഴാണ് മുന്നില്‍ നിര്‍ത്തിയിട്ടിരിക്കുന്ന വാഹനങ്ങള്‍ കാണുന്നത്. രാത്രികാലങ്ങളിലാണ് ഇത്തരം അപകടങ്ങള്‍ കൂടുതലും നടക്കുന്നത്. അനധികൃതമായി പാര്‍ക്ക് ചെയ്യുന്ന വാഹനങ്ങള്‍ക്കെതിരെ മോട്ടോര്‍വാഹന വകുപ്പോ, ഹൈവേ പോലീസോ യാതൊരു നടപടികളും എടുക്കുന്നില്ലെന്ന് വ്യാപകമായി ആക്ഷേപം ഉയര്‍ന്നിട്ടുണ്ട്.

രാത്രികാലങ്ങളില്‍ പാതയിലെ വെളിച്ചക്കുറവും അപകടങ്ങള്‍ക്ക് കാരണമാകുന്നുണ്ട്. മീഡിയനില്‍ നിരവധി വിളക്കുകള്‍ സ്ഥാപിച്ചിട്ടുണ്ടെങ്കിലും പകുതിയിലധികവും പ്രവര്‍ത്തനരഹിതമാണ്. ഇത് യഥാസമയം മാറ്റാന്‍ അധികൃതര്‍ മെനക്കെടാറില്ല. സൈക്കിള്‍ യാത്രക്കാരെയും, റോഡ് മുറിച്ചു കടക്കുന്നവരെയും വളരെ അടുത്തെത്തുമ്പോള്‍ മാത്രമാണ് വലിയ വാഹനങ്ങളിലെ ഡ്രൈവര്‍മാര്‍ കാണുന്നത്.

ബൈക്ക് യാത്രക്കാരാണ് കൂടുതലും അപകടത്തില്‍പെടുന്നത്. വാഹനങ്ങളുടെ അമിതവേഗത തടയുന്നതിനായി മാതൃക ഇടനാഴിയില്‍ നിരവധി കാമറകളാണ് സ്ഥാപിച്ചിരിക്കുന്നത്.

എന്നാല്‍ കാമറക്ക് മുന്നിലെത്തുമ്പോള്‍ വേഗത കുറയ്‌ക്കുകയും പിന്നീട് വേഗം കൂട്ടുകയും ചെയ്യും. ഓരോ വാഹനങ്ങളുടെയും ദേശീയപാതയിലെ അനുവദനീയമായ വേഗത മീഡിയനിലെ ബോര്‍ഡുകളില്‍ രേഖപ്പെടുത്തിയിട്ടുണ്ടെങ്കിലും ആരും അത് പാലിക്കാറില്ല. റോഡുകള്‍ ചോരപ്പുഴയാകുമ്പോള്‍ മാത്രമാണ് അധികൃതര്‍ നടപടികളുമായി മുന്നോട്ടു വരുന്നത്.