കരുനാഗപ്പള്ളി: തഴവ കേന്ദ്രീകരിച്ച് കഞ്ചാവും മയക്കുമരുന്നും വ്യാപകമാകുന്നു. അതിന്റെ സബ്‌സെന്ററുകളായി വിവിധ ഭാഗങ്ങളില്‍ വിജനമായതും ആളൊഴിഞ്ഞതുമായ വീടുകള്‍ നിരവധിയാണ്. ഇവിടം കേന്ദ്രീകരിച്ച് മയക്കുമരുന്നിന്റെയും മറ്റ് ലഹരി പദാര്‍ത്ഥങ്ങളുടെയും വിതരണം നടക്കുന്നു.
പുതിയകാവിന് പടിഞ്ഞാറുവശത്തായി താമസമില്ലാതെ ഒഴിഞ്ഞുകിടക്കുന്ന ഒരു വീട് കേന്ദ്രീകരിച്ചും പ്രവര്‍ത്തനമുണ്ട്. സ്‌കൂളിലും കോളേജുകളിലും പഠിക്കുന്ന കുട്ടികള്‍ ഉള്‍പ്പെടെയുള്ളവര്‍ ഇവിടെ വന്നുപോകുന്നു.
പലതരത്തിലുള്ള ലഹരിവസ്തുക്കളാണ് ഇവിടെ വിതരണം ചെയ്യുന്നത്. നാക്കിനടിയില്‍വെയ്‌ക്കുന്നതും സിഗരറ്റ്, ബീഡി എന്നിവയില്‍ തെറുത്ത് വലിക്കാവുന്നതും കൈത്തണ്ടയില്‍ വച്ചശേഷം മണം പിടിച്ച് ലഹരിയിലാകുന്നതും പാനീയങ്ങളില്‍ ചേര്‍ത്ത് കഴിക്കാവുന്നതും ഒക്കെയായി ആവശ്യക്കാരുടെ ഇഷ്ടത്തിന് അനുസരിച്ചുള്ള സാധനങ്ങള്‍ വിതരണം ചെയ്യുന്നു.
മദ്യം പോലെ മണമില്ല എന്നുള്ളതും മദ്യശാലകളിലെപോലെ ക്യൂ നില്‍ക്കണ്ടാ എന്നുള്ളതുമാണ് പ്രത്യേകത. ഈ സൗകര്യങ്ങളെല്ലാം കോളേജ് തലത്തിലുള്ള വിദ്യാര്‍ത്ഥികളെ ആകര്‍ഷിക്കുന്നുണ്ട്. അവരുടെ ഇടയില്‍ തന്നെ മാഫിയകളുടെ ഏജന്റുമാര്‍ പ്രവര്‍ത്തിക്കുന്നതായും അറിയുന്നു. യൂണിഫോമില്‍ വിദ്യാര്‍ത്ഥികള്‍ ഇവിടങ്ങളില്‍ വന്നുപോകുന്നത് നിത്യസംഭവമാണ്.സമ്പന്നരും വിദേശങ്ങളില്‍ ജോലി നോക്കുന്നവരുമായ രക്ഷകര്‍ത്താക്കളുടെ മക്കളാണ് ഇതിലേറെയും. വിലപിടിച്ച ബൈക്കുകളിലും മറ്റും ചീറിപ്പാഞ്ഞ് അപകടം സംഭവിക്കുന്നതില്‍ അധികവും മദ്യത്തിന്റെയും മയക്കുമരുന്നിന്റെയും അടിമകളായിട്ടുള്ളവരാണെന്നുള്ളതും ശ്രദ്ധേയമാണ്.
പ്രതികരിക്കാൻ ഇവിടെ എഴുതുക: