ആലപ്പുഴ: ജില്ലയില്‍ പലയിടങ്ങളിലും വിഎസ് അനുകൂല പ്രകടനങ്ങളും പോസ്റ്റര്‍ പ്രചരണവും. ചേര്‍ത്തലയില്‍ വിഎസ് അനുകൂലികള്‍ പ്രകടനം നടത്തി. ഫെബ്രുവരി 22ന് വൈകിട്ടാണ് ചേര്‍ത്തല നഗരത്തില്‍ വിഎസ് അനുകൂലികള്‍ പ്രകടനം നടത്തിയത്. പിണറായിക്കെതിരെ മുദ്രാവാക്യം വിളിച്ചുകൊണ്ടും വിഎസിന് അഭിവാദ്യങ്ങള്‍ അര്‍പ്പിച്ചുമുള്ള പ്രകടനത്തില്‍ കൂടുതലും യുവാക്കളാണ് പങ്കെടുത്തത്. നെടുമ്പ്രക്കാട് വിളക്കുമരം പാലത്തിനുസമീപം ആരംഭിച്ച പ്രകടനം ചേര്‍ത്തല നഗരത്തില്‍ സമാപിച്ചു.
വള്ളികുന്നം പഞ്ചായത്തിന്റെ വിവിധ പ്രദേശങ്ങളില്‍ വിഭാഗീയത മറനീക്കി വിഎസ് അച്ചുതാനന്ദന് അനുകൂല പോസ്റ്ററുകള്‍ പതിച്ചു. കാഞ്ഞിരത്തുംമൂട്, ലക്ഷംവീട് ജങ്ഷന്‍, കടുവിനാല്‍ തുടങ്ങിയ ഭാഗങ്ങളിലാണ് വ്യാപകമായി പോസ്റ്റര്‍ പതിച്ചിരിക്കുന്നത്. ഔദ്യോഗിക പക്ഷത്തിനെതിരെയും വിഎസിന് അഭിവാദ്യം അര്‍പ്പിച്ചുമുള്ള പോസ്റ്ററുകള്‍ സിപിഎം സംസ്ഥാന സമ്മേളന ബോര്‍ഡുകളിലാണ് പതിച്ചിരിക്കുന്നത്. രാവിലെ തന്നെ ഔദ്യോഗിക പക്ഷ നേതാക്കള്‍ എത്തി പലസ്ഥലത്തെയും പോസ്റ്ററുകള്‍ കീറിക്കളഞ്ഞു. ചില സ്ഥലങ്ങളില്‍ വിഎസ് പക്ഷക്കാര്‍ സംസ്ഥാന സമ്മേളനത്തിന്റെ പ്രചരണ ബോര്‍ഡുകള്‍ എടുത്തുമാറ്റുകയും ചെയ്തിട്ടുണ്ട്.
പ്രതികരിക്കാൻ ഇവിടെ എഴുതുക: