ന്യൂദല്ഹി: ലോകത്തെ മാറ്റാനുള്ള കരുത്ത് ഭാരതത്തിലെ യുവത്വത്തിനുണ്ടെന്ന് അമേരിക്കന് പ്രസിഡന്റ് ബരാക് ഒബാമ. രാജ്യത്തിന്റെ ഭാവി യുവാക്കളിലാണ്. അതിനാല് യുവാക്കളെ ശാക്തീകരിക്കേണ്ടത് അത്യാവശ്യമാണ്. ഭാരത ജനത നടത്തുന്നത് കേവലം രാഷ്ട്രനിര്മാണം മാത്രമല്ല മറിച്ച് നവലോകക്രമം രൂപപ്പെടുത്തുക കൂടിയാണെന്നും ഒബാമ പറഞ്ഞു.
നിരവധി വെല്ലുവിളികള് നമുക്ക് മുന്നിലുണ്ട്. മികച്ച ഭാവിക്കായുള്ള പ്രയത്നത്തിലാണ് നാമിപ്പോള്. ദാരിദ്ര്യ നിര്മാര്ജനത്തിനായി ഭാരതം പോരാടണമെന്നും ഭാരതത്തിനൊപ്പം അമേരിക്കയും ഇതിനായി അണിചേരുമെന്നും ഒബാമ പറഞ്ഞു. ദല്ഹിയിലെ സിരിഫോര്ട്ട് ഓഡിറ്റോറിയത്തില് വിവിധ മേഖലയിലെ 2000 പേരോട് പ്രഭാഷണം നടത്തുകയായിരുന്നു അമേരിക്കന് പ്രസിഡന്റ്.
തന്റെ കൂടി നാടായ ഷിക്കാഗോയില് വിവേകാനന്ദന് നടത്തിയ പ്രസംഗം സഹോദരി സഹോദരന്മാരെ എന്നു അഭിസംബോധന ചെയ്താണ് തുടങ്ങിയത്. ഇവിടെ തനിക്കും അങ്ങനെ അഭിസംബോധന ചെയ്യാനാണ് തോന്നുന്നത്. ലോകത്തെ ഏറ്റവും പഴയ ജനാധിപത്യ രാജ്യവും ഏറ്റവും വലിയ ജനാധിപത്യ രാജ്യവും സുഹൃത്തുക്കളാകുന്നത് ലോകത്ത് സമാധാനം നിലനിര്ത്തുന്നതിന് സഹായകമാകും.
സ്ത്രീകള് ഒരു രാജ്യത്തിന്റെ സ്വത്താണ്. ആണ്കുട്ടികള്ക്ക് കിട്ടുന്ന അതേ അവസരങ്ങള് പെണ്കുട്ടികള്ക്കും ലഭിക്കണം. അവര്ക്ക് വിജയം ഉണ്ടായാല് രാജ്യവും വിജയിക്കും. ഭാരതത്തിലെ സ്ത്രീകള് സായുധ സേനയുടെ ഭാഗമായിരിക്കുന്നു എന്നത് അഭിമാനകരമാണ്. എല്ലാ മേഖലയിലും കഴിവ് തെളിയിച്ചവരാണ് ഭാരതത്തിലെ സ്ത്രീകളെന്നും അദ്ദേഹം പറഞ്ഞു.
മതവും നിറവും പരസ്പരം ബഹുമാനിക്കുന്നതിനും സ്നേഹിക്കുന്നതിനും തടസ്സമാകരുതെന്നും മേരി കോമിനേയും ഷാരൂഖ് ഖാനെയും മില്ഖാ സിംഗിനേയും ഓര്ത്ത് ഓരോ ഭാരതീയനും അഭിമാനിക്കാമെന്നും ഒബാമ പറഞ്ഞു. തൊലിയുടെ നിറം കൊണ്ട് മാത്രം എനിക്ക് വിവേചനം അനുഭവിക്കേണ്ടി വന്നിട്ടുണ്ട്. ഞാന് ക്രിസ്ത്യാനിയല്ല മുസ്ളീമാണെന്ന് വരെ ആളുകള് പറഞ്ഞു. എന്നാല് എല്ലാവരുക്കും അവരവരുടേതായ ദിവസം വന്നു ചേരും. അസമത്വങ്ങളുള്ള ലോകത്ത് ചായക്കടക്കാരന് പ്രധാനമന്ത്രിയാകാന് കഴിഞ്ഞത് അതുകൊണ്ടാണെന്നും ഒബാമ പറഞ്ഞു .
തന്റെ സന്ദര്ശനത്തോടെ ഭാരതവും അമേരിക്കയും തമ്മിലുള്ള ബന്ധം സുദൃഢമായി. റിപ്പബ്ലിക്ക് ദിനാഘോഷത്തിന് വിശിഷ്ടാതിഥിയായി തന്നെ ക്ഷണിച്ചത് ബഹുമതിയാണെന്നും ഒബാമ പറഞ്ഞു. അമേരിക്കക്ക് ആണവകരാറിലൂടെ ഭാരതത്തെ സഹായിക്കാനാകും. തീവ്രവാദത്തിന്റെ ഇരകളാണ് ഭാരതവും അമേരിക്കയും. ഈ മേഖലയില് ഇരുകൂട്ടരും ഒന്നിച്ച് പ്രവര്ത്തിക്കും. ഐക്യരാഷ്ട്ര സഭയില് സ്ഥിരാംഗത്വത്തിനായി സമ്മര്ദ്ദം ചെലുത്തുമെന്നും ഒബാമ ആവര്ത്തിച്ചു.
പ്രസംഗത്തില് ഒബാമ കേരളത്തെയും പ്രശംസിച്ചു. ദൈവത്തിന്റെ സ്വന്തം നാടായ കേരളത്തിലെ കായലുകള് അതിമനോഹരമാണെന്ന് അദ്ദേഹം പറഞ്ഞു.
പ്രതികരിക്കാൻ ഇവിടെ എഴുതുക: