ചണ്ഡിഗഢ്: രൂപീകൃതമായി അരനൂറ്റാണ്ടാകുന്ന ഹരിയാനയില് ഇതാദ്യമായി ബിജെപി അധികാരത്തിലേറുന്നതിനു സാക്ഷികളായി പ്രധാനമന്ത്രിയും ബിജെപിയുടെ ദേശീയ നേതാക്കളുമെത്തിയിരുന്നു. പഞ്ച്കുളയിലെ ഹൂഡ മൈതാനിയില് ഇരമ്പിയാര്ക്കുന്ന ലക്ഷക്കണക്കിന് പാര്ട്ടി പ്രവര്ത്തകര്ക്കു മുന്നിലാണ് മനോഹര്ലാല് ഖട്ടാര് ഹരിയാന മുഖ്യമന്ത്രിയായി സത്യപ്രതിജ്ഞ ചെയ്തത്.
കണക്കുകൂട്ടിയതിലുമധികം ജനസഞ്ചയം സത്യപ്രതിജ്ഞാ ചടങ്ങിനെത്തുമെന്ന് അറിഞ്ഞതോടെ ശനിയാഴ്ച ഉച്ചയോടെ താവുദേവിലാല് സ്റ്റേഡിയത്തില് നിന്നും ഹൂഡ മൈതാനിയിലേക്ക് പരിപാടി മാറ്റേണ്ടിവന്നു. പ്രധാനമന്ത്രി നരേന്ദ്രമോദിയടക്കമുള്ളവര് എത്തുമെന്ന അറിയിപ്പു കൂടി ലഭിച്ചതോടെ ഹരിയാനയില് നിന്നും സമീപ സംസ്ഥാനങ്ങളില് നിന്നും പ്രവര്ത്തകര് ചണ്ഡിഗഢിലേക്കൊഴുകി. ചണ്ഡീഗഢ് വിമാനത്താവളത്തിലെത്തിയ പ്രധാനമന്ത്രിയെ മനോഹര്ലാല് ഖട്ടാര് സ്വീകരിച്ച് സത്യപ്രതിജ്ഞാ സ്ഥലത്തേക്കാനയിച്ചു.
കര്ണാല് പ്രേംനഗറിലെ 216-ാം നമ്പര് വാടക വീട്ടില് നിന്നും മുഖ്യമന്ത്രി പദവിയിലേക്കെത്തിയ ഖട്ടാര് എല്ലാം നിയോഗമായി കാണുന്നു. പാര്ട്ടിയുടെ സംഘടനാ ചുമതലകള് മാത്രം വഹിച്ച ഖട്ടാര് സംസ്ഥാന ഭരണമേറ്റെടുക്കുമ്പോള് തികഞ്ഞ സംയമനം മാത്രം. നാലുസീറ്റില് നിന്നും 47ലേക്കെത്തിച്ചതിന്റെ സംഘടനാമികവ് ഭരണരംഗത്തും ആവര്ത്തിക്കാനാവുമെന്നാണ് ഖട്ടാറിന്റെ പ്രതീക്ഷ. സുതാര്യവും വിവേചന ശ്രമരഹിതവുമായ ഭരണം കാഴ്ചവെയ്ക്കുമെന്നും അദ്ദേഹം ഉറപ്പുനല്കുന്നു.
അടിയന്തരാവസ്ഥക്കാലത്ത് ഇന്ദിരാഗാന്ധിക്കെതിരെ സമരം ചെയ്ത ആര്എസ്എസ് പ്രവര്ത്തകനായാണ് മനോഹര്ലാല് ഖട്ടാറിന്റെ പൊതുപ്രവര്ത്തന തുടക്കം. മൂന്നുവര്ഷങ്ങള്ക്ക് ശേഷം 1980ല് ആര്എസ്എസ് പ്രചാരകനായി. 14വര്ഷം വിവിധ സംഘ ചുമതലകള് വഹിച്ച ഖട്ടാര് 1994ല് ബിജെപിയുടെ സംസ്ഥാന സംഘടനാ ചുമതലയുള്ള ജനറല് സെക്രട്ടറിയായി നിയോഗിക്കപ്പെട്ടു. രണ്ടു ദശാബ്ദം നീണ്ട സംഘടനാ ചുമതലയ്ക്കു ശേഷം ഹരിയാനയില് ബിജെപി ആദ്യമായി ഭരണത്തില് താമര വിരിയിച്ചപ്പോള് മുഖ്യമന്ത്രിപദത്തിലേക്കുമെത്തി.
രാജ്യവിഭജനക്കാലത്ത് പാക്കിസ്ഥാനിലായ പഞ്ചാബ് പ്രവിശ്യയില് നിന്നും ഹരിയാനയിലെ റോഹ്തക്കില് ബന്യാനി വില്ലേജിലേക്ക് കുടിയേറിയവരാണ് മനോഹര്ലാല് ഖട്ടാറിന്റെ മാതാപിതാക്കള്. പിതാവ് ഹര്ബന്സ് ലാല് ഖട്ടാര് കൃഷിക്കാരനായിരുന്നു. സ്കൂള് വിദ്യാഭ്യാസത്തിനു ശേഷം ദല്ഹിയിലെത്തിയ മനോഹര്ലാല് ഖട്ടാര് സദര് മാര്ക്കറ്റില് കച്ചവടക്കാരനായി ജോലിചെയ്യുന്നതിനിടെ ദല്ഹി യൂണിവേഴ്സിറ്റിയില് നിന്നും ബിരുദം സമ്പാദിച്ചു. തുടര്ന്നാണ് ആര്എസ്എസുമായി ബന്ധപ്പെട്ട് പ്രവര്ത്തനം ആരംഭിച്ചത്.
പ്രതികരിക്കാൻ ഇവിടെ എഴുതുക: