കൊച്ചി: സാമൂഹിക, സാമ്പത്തിക സെന്‍സസിന്‌ ജില്ലയില്‍ കുട്ടമ്പുഴയിലെ വെള്ളാരംകുത്ത്‌ ആദിവാസി കോളനിയില്‍ തുടക്കം. പന്ത്രണ്ടാം പദ്ധതിയുടെ ഗുണഭോക്താക്കളെ കണ്ടെത്തുന്നതിനും നഗര, ഗ്രാമ വികസനത്തിന്‌ പുതിയ കേന്ദ്ര പദ്ധതികള്‍ ആവിഷ്കരിക്കുന്നതിനും നിലവിലുള്ള പദ്ധതികള്‍ കൂടുതല്‍ കാര്യക്ഷമമാക്കുന്നതിനുമായുള്ള വിവരശേഖരണമാണ്‌ സെന്‍സസിന്റെ ഭാഗമായി നടത്തുന്നത്‌.
വെള്ളാരംകുത്ത്‌ കോളനിയില്‍ നടന്ന ചടങ്ങില്‍ ടി.യു. കുരുവിള എംഎല്‍എ സെന്‍സസിന്റെ ഉദ്ഘാടനം നിര്‍വഹിച്ചു. വികസനവും ക്ഷേമപദ്ധതികളും നടപ്പാക്കുന്നതില്‍ സ്ഥിതിവിവരക്കണക്കുകളുടെ ലഭ്യത സുപ്രധാനമാണെന്ന്‌ അദ്ദേഹം പറഞ്ഞു. വിവരങ്ങള്‍ വിരല്‍ത്തുമ്പിലുണ്ടെങ്കിലേ അര്‍ഹരായ വിഭാഗങ്ങളിലേക്ക്‌ സര്‍ക്കാരിന്റെ പദ്ധതികളുടെ പ്രയോജനം എത്തുകയുള്ളൂവെന്നും ടി.യു. കുരുവിള ചൂണ്ടിക്കാട്ടി.
ജില്ലാ കളക്ടര്‍ പി.ഐ. ഷെയ്‌ക്ക്‌ പരീത് അധ്യക്ഷനായിരുന്നു. കോതമംഗലം ബ്ലോക്ക്‌ പഞ്ചായത്ത്‌ പ്രസിഡന്റ്‌ കെ.ഐ. ജേക്കബ്‌, കുട്ടമ്പുഴ ഗ്രാമപഞ്ചായത്ത്‌ പ്രസിഡന്റ്‌ സി.ജെ. എല്‍ദോസ്‌, ബ്ലോക്ക്‌ പഞ്ചായത്ത്‌ വൈസ്‌ പ്രസിഡന്റ്‌ ഡയാന നോബി, മൂവാറ്റുപുഴ ആര്‍ഡിഒ മണിയമ്മ, ജില്ലാ സെന്‍സസ്‌ ഓഫീസര്‍ എന്‍. വിനോദിനി, ഡിവിഷണല്‍ ഫോറസ്റ്റ്‌ ഓഫീസര്‍ ആര്‍. നാഗരാജ്‌ തുടങ്ങിയവര്‍ പങ്കെടുത്തു.
വെള്ളാരംകുത്ത്‌ കോളനിയിലെ സാജു-മോഹിനി ദമ്പതികളില്‍ നിന്നും കളക്ടറുടെ നേതൃത്വത്തില്‍ സെന്‍സസിനായി നിയോഗിച്ച ഉദ്യോഗസ്ഥര്‍ ആദ്യ വിവര ശേഖരണം നടത്തി. വിവരങ്ങള്‍ തത്സമയം ടാബ്ലറ്റ്‌ കമ്പ്യൂട്ടറുകളില്‍ രേഖപ്പെടുത്തുന്നതിനുള്ള ഡാറ്റ എന്‍ട്രി ഓപ്പറേറ്റര്‍മാരും സംഘത്തിലുണ്ട്‌.
കേന്ദ്ര ഗ്രാമ വികസന മന്ത്രാലയവും പാര്‍പ്പിട നഗര ദാരിദ്ര്യ നിര്‍മാര്‍ജന വകുപ്പും രജിസ്ട്രാര്‍ ജനറല്‍ ഓഫ്‌ ഇന്ത്യയും ഭാരത്‌ ഇലക്ട്രോണിക്സും നാഷണല്‍ ഇന്‍ഫര്‍മാറ്റിക്സ്‌ സെന്ററും സംയുക്തമായാണ്‌ സെന്‍സസിനു നേതൃത്വം നല്‍കുന്നത്‌. 2011 ലെ സെന്‍സസില്‍ ശേഖരിച്ച വിവരങ്ങളെ ആധാരമാക്കി തയാറാക്കിയ ദേശീയ ജനസംഖ്യാ രജിസ്റ്ററിന്റേയും രണ്ടാം ഘട്ട ജനസംഖ്യാ കണക്കെടുപ്പില്‍ കണ്ടെത്തിയ കുടുംബങ്ങളുടേയും ഭവന രഹിത കുടുംബങ്ങളുടേയും ഇലക്ട്രോണിക്‌ ഇമേജുകളെ ആധാരമാക്കിയാണ്‌ സെന്‍സസ്‌ നടത്തുക.
ഗ്രാമ, നഗര പ്രദേശങ്ങളില്‍ പ്രത്യേകം ചോദ്യാവലികള്‍ ഉപയോഗിച്ച്‌ നടത്തുന്ന എന്യുമറേഷനില്‍ രാജ്യത്തെ മൊത്തം പൗരന്‍മാരുടേയും സാമൂഹികവും സാമ്പത്തികവും ജാതിയും സംബന്ധിച്ചുള്ള വിവരങ്ങളാണ്‌ ശേഖരിക്കുന്നത്‌. ശേഖരിക്കുന്ന ജാതി, മതം സംബന്ധിച്ച വിവരങ്ങള്‍ പരസ്യപ്പെടുത്തില്ല. സര്‍ക്കാര്‍ വകുപ്പുകളുടേയും തദ്ദേശ സ്വയം ഭരണ സ്ഥാപനങ്ങളിലേയും പൊതുമേഖലാ സ്ഥാപനങ്ങളിലെ ജീവനക്കാരേയും ഒന്‍പതും അതിനു മുകളിലുമുള്ള ക്ലാസ്സുകളിലെ അധ്യാപകരേയുമാണ്‌ എന്യുമറേഷന് ജോലികള്‍ക്ക്‌ തെരെഞ്ഞെടുത്തിട്ടുള്ളത്‌. ഓരോ വില്ലേജിലേയും 100 മുതല്‍ 125 വീടുകള്‍ വീതം വരുന്ന ഓരോ എന്യുമറേഷന് ബ്ലോക്കുകളായാണ്‌ സെന്‍സസ്‌ നടത്തുക. ഒരു എന്യുമറേറ്റര്‍ക്ക്‌ പരമാവധി നാല്‌ എന്യുമറേഷന് ബ്ലോക്കുകളാണ്‌ നല്‍കുന്നത്‌.
കുടുംബനാഥന്‍മാര്‍ നല്‍കുന്ന വിവരങ്ങള്‍ക്ക്‌ കൈപ്പറ്റ്‌ രസീത്‌ നല്‍കും. ശേഖരിക്കുന്ന വിവരങ്ങള്‍ ഗ്രാമ പഞ്ചായത്ത്‌ വാര്‍ഡ്‌ അടിസ്ഥാനത്തില്‍ ജാതി ഒഴികെയുള്ള വിവരങ്ങളുടെ കരട്‌ ലിസ്റ്റ്‌ പ്രസിദ്ധീകരിക്കും. ആക്ഷേപങ്ങളും പരാതികളുമുണ്ടെങ്കില്‍ അവ പരിഹരിച്ച ശേഷമായിരിക്കും അന്തിമ ലിസ്റ്റ്‌ തയാറാക്കുക.
പ്രതികരിക്കാൻ ഇവിടെ എഴുതുക: