ദുബായ്: ആഗോള വ്യോമയാന മേഖലയുടെ ശ്രദ്ധ ആകർഷിക്കുന്ന ദുബായിലെ 35 ബില്യൺ ഡോളറിന്റെ (ഏകദേശം 2.9 ലക്ഷം കോടി ഇന്ത്യൻ രൂപ) അൽ മക്തൂം അന്താരാഷ്ട്ര വിമാനത്താവള വിപുലീകരണ പദ്ധതി അതിവേഗം മുന്നേറുന്നു. പദ്ധതി പ്രദേശത്ത് നിലവിൽ ഒരു ലക്ഷത്തിലധികം തൊഴിലാളികൾ സജീവമായി ജോലി ചെയ്തുവരികയാണെന്ന് ദുബായ് എയർപോർട്ട്സ് സി.ഇ.ഒ പോൾ ഗ്രിഫിത്സ് അറിയിച്ചു.
വിമാനത്താവളത്തിന്റെ പൈലിംഗ് ജോലികളും നിലമൊരുക്കൽ പ്രവർത്തനങ്ങളും അതിവേഗമാണ് നടക്കുന്നതെന്നും ഇതൊരു അതീവ സജീവമായ പദ്ധതിയായി മാറിക്കഴിഞ്ഞെന്നും പോൾ ഗ്രിഫിത്സ് വ്യക്തമാക്കി. നിലവിലെ ദുബായ് ഇന്റർനാഷണൽ എയർപോർട്ടിൽ നിന്നുള്ള പ്രവർത്തനങ്ങൾ ഘട്ടംഘട്ടമായി ഇവിടേക്ക് മാറ്റാനാണ് ദുബായ് ലക്ഷ്യമിടുന്നത്.
നിർമ്മാണം പൂർത്തിയാകുമ്പോൾ ലോകത്തിലെ ഏറ്റവും വലിയ വ്യോമയാന കേന്ദ്രമായി അൽ മക്തൂം വിമാനത്താവളം മാറും. നിലവിലെ ദുബായ് അന്താരാഷ്ട്ര വിമാനത്താവളത്തേക്കാൾ അഞ്ചിരട്ടി വലുപ്പത്തിലായിരിക്കും പുതിയ ടെർമിനൽ നിർമ്മിക്കുന്നത്.
അഞ്ച് സമാന്തര റൺവേകളും 400 എയർക്രാഫ്റ്റ് ഗേറ്റുകളും വിമാനത്താവളത്തിലുണ്ടാകും. പ്രതിവർഷം 260 ദശലക്ഷം (26 കോടി) യാത്രക്കാരെയും 12 ദശലക്ഷം ടൺ ചരക്കുകളും കൈകാര്യം ചെയ്യാനുള്ള ശേഷി വിമാനത്താവളത്തിനുണ്ടാകും.
പദ്ധതിയുടെ ആദ്യഘട്ട പ്രവർത്തനങ്ങൾ 2032-ഓടെ ആരംഭിക്കാനാണ് അധികൃതർ ലക്ഷ്യമിടുന്നത്. ദുബായിയുടെ സമ്പദ്വ്യവസ്ഥയ്ക്കും വിനോദസഞ്ചാര-വ്യാപാര മേഖലകൾക്കും വലിയ കുതിച്ചുചാട്ടം നൽകുന്ന സ്വപ്നപദ്ധതിയാണിത്.


















