പുതുമുഖങ്ങളായ ഹർഷ വർഗീസ്, ഹൃദ്യ അശോക് എന്നിവരെ പ്രധാന കഥാപാത്രങ്ങളാക്കി നിർമൽ ബേബി വർഗീസ് സംവിധാനം ചെയ്യുന്ന ഹൊറർ ചിത്രം ‘ബ്ലാക്ക്സ്ക്രിപ്റ്റി’ന്റെ ടൈറ്റിൽ പോസ്റ്റർ പുറത്തിറക്കി. കാസാബ്ലാങ്കാ ഫിലിം ഫാക്ടറിയുടെ ബാനറിൽ സംവിധായകൻ തന്നെയാണ് ചിത്രം നിർമിക്കുന്നത്.
‘തരിയോട്’, ‘വഴിയെ’, ‘ഡ്രെഡ്ഫുൾ ചാപ്റ്റേഴ്സ്’, ‘അന്തിമ ക്ഷണഗളു’, ‘ഏലിയൻ ജെനസിസ്: ബിയോണ്ട് ദ സ്റ്റാർസ്’ എന്നീ ചിത്രങ്ങൾക്കുശേഷം നിർമൽ ബേബി വർഗീസ് സംവിധാനം ചെയ്യുന്ന ചിത്രമാണിത്.
രണ്ട് സുഹൃത്തുക്കൾ മാത്രം താമസിക്കുന്ന വീട്ടിലേക്ക് ഒരു നിഗൂഢമായ പുസ്തകം എത്തുന്നതും തുടർന്ന് അരങ്ങേറുന്ന ഭീതിജനകമായ സംഭവങ്ങളുമാണ് ചിത്രത്തിന്റെ ഇതിവൃത്തം. ചിത്രീകരണം ഉടൻ ആരംഭിക്കുമെന്നും ഡിസംബർ അവസാനത്തോടെ പൂർത്തിയാക്കി അടുത്ത വർഷം ആദ്യം ചിത്രം റിലീസ് ചെയ്യാനാണ് ലക്ഷ്യമിടുന്നതെന്നും ടൈറ്റിൽ പോസ്റ്റർ പങ്കുവെച്ചുകൊണ്ട് സംവിധായകൻ സോഷ്യൽ മീഡിയയിൽ അറിയിച്ചു.
ജെഫിൻ ജോസഫ്, വരുണ് രവീന്ദ്രൻ, നിബിൻ സ്റ്റാനി, ശ്യാം സലാഷ്, അശ്വതി അനിൽകുമാർ, ആര്യ കൃഷ്ണൻ, ലാസ്യ ബാലകൃഷ്ണൻ, സാനിയ പൗലോസ്, ശാലിനി ബേബി എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.
ചിത്രത്തിന്റെ രചനയും എഡിറ്റിംഗും നിർമൽ ബേബി വർഗീസ് നിർവഹിക്കുന്നു. മിഥുൻ എരവിലാണ് ഛായാഗ്രഹണം. രഞ്ജിത് കെ. ആർ. സംഗീതം ഒരുക്കുന്നു. ചേതൻ കെ. അസോസിയേറ്റ് ക്യാമറ കൈകാര്യം ചെയ്യുമ്പോൾ ഹർഷ വർഗീസും ഷനീജയും കലാസംവിധാനം നിർവഹിക്കുന്നു.














