ന്യൂദല്‍ഹി: ദുബായ്- ഇസ്രായേൽ വിമാനം തകർക്കാനുള്ള സഹപൈലറ്റിന്റെ നീക്കം ധീരമായി പരാജയപ്പെടുത്തിയ ഫ്ലൈദുബായ് എയർലൈൻസ് ക്യാപ്റ്റൻ സ്മിത് മച്ചാറുമായി പ്രധാനമന്ത്രി നരേന്ദ്ര മോദി ഇന്ന് (വെള്ളിയാഴ്ച) ടെലിഫോണിൽ സംസാരിച്ചു.
സംഭാഷണത്തിനിടെ പ്രധാനമന്ത്രി സ്മിതിന്റെ ആരോഗ്യവിവരങ്ങൾ അന്വേഷിക്കുകയും പ്രതിസന്ധി ഘട്ടത്തിൽ അദ്ദേഹം കാണിച്ച അസാമാന്യ ധൈര്യത്തെ പ്രശംസിക്കുകയും ചെയ്തു. രാജ്യം മുഴുവൻ പൈലറ്റിനായി പ്രാർത്ഥിക്കുകയാണെന്നും അദ്ദേഹം എത്രയും വേഗം സുഖം പ്രാപിക്കട്ടെയെന്നും മോദി ആശംസിച്ചു.
“നിങ്ങള്‍ക്ക് ഗുരുതരമായി പരിക്കേല്‍ക്കുകയും ജീവനുവേണ്ടി പൊരുതേണ്ടി വരികയും ചെയ്തു. എന്നിട്ടും സ്വന്തം ജീവനെക്കുറിച്ച്‌ ആലോചിക്കാതെ യാത്രക്കാരുടെ ജീവനാണ് നിങ്ങള്‍ പ്രാധാന്യം നല്‍കിയത്. നിങ്ങള്‍ 140 കോടി ഭാരതീയരുടെ അഭിമാനം ഉയര്‍ത്തിയിരിക്കുന്നു, താങ്കളുടെ ധൈര്യവും ആത്മവീര്യവും സമയോചിതമായ ഇടപെടലുമാണ് നിരവധി ആളുകളുടെ ജീവൻ രക്ഷിച്ചത്. മറ്റുള്ളവരുടെ ജീവനെടുക്കുന്നവരല്ല, മറിച്ച് ജീവൻ രക്ഷിക്കുന്നവരാണ് നമ്മൾ ഭാരതീയര്‍ എന്ന് ഇന്ന് രാജ്യം മുഴുവൻ അഭിമാനത്തോടെ പറയും,” പ്രധാനമന്ത്രി സ്മിത് മച്ചാറിനോട് പറഞ്ഞു. പ്രധാനമന്ത്രിയുമായുള്ള സംഭാഷണത്തിൽ വികാരാധീന ക്യാപ്റ്റൻ സ്മിത്, പ്രധാനമന്ത്രിയോട് സംസാരിക്കാൻ കഴിഞ്ഞത് ജീവിതത്തിലെ ഏറ്റവും സവിശേഷമായ നിമിഷമാണെന്ന് പറഞ്ഞു. നരേന്ദ്ര മോദിയാണ് തന്റെ ഏറ്റവും വലിയ റോൾ മോഡലെന്നും സ്മിത് അദ്ദേഹത്തോട് പറഞ്ഞു.
നേരത്തെ വ്യാഴാഴ്ച, ക്യാപ്റ്റന്‍ സ്മിതിന്റെ ഭാര്യയുമായും മാതാപിതാക്കളുമായും പ്രധാനമന്ത്രി സംസാരിച്ചിരുന്നു. കുടുംബത്തിന് ആവശ്യമായ എല്ലാവിധ പിന്തുണയും ഇന്ത്യന്‍ എംബസി വഴി ഉറപ്പാക്കുമെന്ന് അദ്ദേഹം വാഗ്ദാനം ചെയ്യുകയും ചെയ്തിരുന്നു. ക്യാപ്റ്റന്‍ സ്മിതിന്റെ ധീരതയെ നേരത്തെ തന്നെ പ്രധാനമന്ത്രി ‘യഥാര്‍ത്ഥ നായകന്‍’ എന്ന് വിശേഷിപ്പിച്ച് എക്‌സിലൂടെ ആദരവ് രേഖപ്പെടുത്തിയിരുന്നു. ഡല്‍ഹിയില്‍ യുപിഎസ്സിയുടെ ശതാബ്ദി ആഘോഷങ്ങളില്‍ സംസാരിക്കവെയും, ‘സെപ്റ്റംബര്‍ 11 മോഡലിലുള്ള ഒരു വലിയ വിമാന ദുരന്തമാണ് ഇന്ത്യന്‍ പൈലറ്റ് തടഞ്ഞതെന്ന്’ ഇസ്രായേല്‍ പ്രധാനമന്ത്രിയും പ്രശംസിച്ചിരുന്നുവെന്ന് നരേന്ദ്ര മോദി ഓര്‍മ്മിപ്പിച്ചു.
13 വര്‍ഷത്തിലധികം സിവില്‍ ഏവിയേഷന്‍ പരിചയസമ്പത്തുള്ള പൈലറ്റാണ് ക്യാപ്റ്റന്‍ സ്മിത് മച്ചാര്‍. ഫ്‌ലൈദുബൈയില്‍ ചേരുന്നതിന് മുന്‍പ് 11 വര്‍ഷത്തോളം സ്‌പൈസ്‌ജെറ്റില്‍ ലൈന്‍ ട്രെയിനിംഗ് ക്യാപ്റ്റനായിരുന്നു. സംഭവത്തെക്കുറിച്ച് അന്വേഷണം പുരോഗമിക്കുന്ന സാഹചര്യത്തില്‍ ഇസ്രായേലിലേക്കുള്ള വിമാന സര്‍വീസുകള്‍ ഫ്‌ലൈദുബൈ താല്‍ക്കാലികമായി നിര്‍ത്തിവെച്ചിരിക്കുകയാണ്.
