കൊൽക്കത്ത : കൊൽക്കത്ത വിമാനത്താവള സമുച്ചയത്തിനുള്ളിൽ സ്ഥിതി ചെയ്യുന്ന ബക്ര മസ്ജിദിനുള്ളിൽ പ്രാർത്ഥന നടത്താൻ അനുമതി നൽകാനാകില്ലെന്ന് കൊൽക്കത്ത ഹൈക്കോടതി . സുരക്ഷാ ആശങ്കകളാണ് കോടതി പ്രധാന വിഷയമായി ചൂണ്ടിക്കാട്ടിയത്. വിമാനത്താവള അതോറിറ്റിയും സംസ്ഥാന സർക്കാരും ഗുരുതരമായ സുരക്ഷാ ആശങ്കകളാണ് പ്രകടിപ്പിച്ചത് . ഇതിനെത്തുടർന്ന്, ജസ്റ്റിസ് കൃഷ്ണ റാവു ഒരു ഇടക്കാല ഉത്തരവുകളും പുറപ്പെടുവിക്കാതെ അടുത്ത വാദം കേൾക്കൽ ഒക്ടോബർ 7 ലേക്ക് മാറ്റി. കഴിഞ്ഞ ദിവസം നടന്ന ഫ്ലൈ ദുബായ് സംഭവത്തെക്കുറിച്ചും ജഡ്ജി പരാമർശിച്ചു.
പതിറ്റാണ്ടുകളായി ഇസ്ലാമിസ്റ്റുകൾ ഈ പള്ളിയിൽ പ്രാർത്ഥന നടത്തുന്നുണ്ടെന്ന് ഹർജിക്കാർ കോടതിയെ അറിയിച്ചു. മുമ്പ് സി.ഐ.എസ്.എഫ് മേൽനോട്ടത്തിൽ വിശ്വാസികളെ പരിശോധനയ്‌ക്ക് അനുവദിച്ചിരുന്നുവെന്നും , പരിശോധനയ്‌ക്ക് ശേഷം വിശ്വാസികളെ ബസിൽ പള്ളിയിലേക്ക് കൊണ്ടുപോയി. പ്രാർത്ഥനകൾ പൂർത്തിയായ ശേഷം അവരെ ബസിൽ പ്രധാന റോഡിലേക്ക് തിരികെ കൊണ്ടുവരുമായിരുന്നുവെന്നാണ് ഹർജിക്കാൻ വാദിച്ചത്.
വിമാനത്താവളത്തിന്റെ പ്രവർത്തന മേഖലയ്‌ക്കുള്ളിലും റൺവേയ്‌ക്ക് വളരെ അടുത്തുമാണ് പള്ളി സ്ഥിതി ചെയ്യുന്നതെന്ന് വിമാനത്താവള അതോറിറ്റി കോടതിയെ അറിയിച്ചു. റൺവേയിൽ നിന്ന് ഏകദേശം 165 മീറ്റർ അകലെയാണ് പള്ളി. മുൻ സുരക്ഷാ വീഴ്ചകളും ഉദ്യോഗസ്ഥർ ചൂണ്ടിക്കാട്ടി. ചില സന്ദർഭങ്ങളിൽ, വിമാനത്താവള ഏപ്രൺ പ്രദേശത്തേക്ക് ആളുകൾ പ്രവേശിക്കുന്നത് കണ്ടെത്തിയതായി വിമാനത്താവള അതോറിറ്റി പറഞ്ഞു.
1993 ന് മുമ്പ് സുരക്ഷാ ഭീഷണികളൊന്നും ഉണ്ടായിരുന്നില്ലെന്നും എന്നാൽ സമീപ വർഷങ്ങളിൽ ഭീഷണികൾ വർദ്ധിച്ചിട്ടുണ്ടെന്നും അധികാരികളെ പ്രതിനിധീകരിച്ച് ഹാജരായ അഡീഷണൽ സോളിസിറ്റർ ജനറൽ ധീരജ് ത്രിവേദി പറഞ്ഞു. 2025 ലെ ചെങ്കോട്ട ആക്രമണവും ത്രിവേദി ഉദ്ധരിച്ചു. അതിന് ‘ ഇന്ത്യയിൽ ഇത്തരം ആക്രമണങ്ങൾ വ്യാപകമാണെന്നും , ഇന്നലെ ഫ്ലൈ ദുബായ് സംഭവം നോക്കൂ. നിങ്ങൾക്ക് സങ്കൽപ്പിക്കാൻ പോലും കഴിയില്ല.” എന്നായിരുന്നു കോടതിയുടെ മറുപടി.
