മഹാഭാരതത്തിലെ ഏറ്റവും സങ്കീര്ണ്ണമായ ബന്ധങ്ങളിലൊന്നാണ് കര്ണ്ണനും കൃഷ്ണനും തമ്മിലുള്ളത്. യുദ്ധത്തിന് മുമ്പ് കൃഷ്ണന് കര്ണ്ണന്റെ ജന്മരഹസ്യം വെളിപ്പെടുത്തുന്നു. താന് കുന്തിയുടെ മകനാണെന്നും പാണ്ഡവരുടെ ജ്യേഷ്ഠനാണെന്നും കര്ണ്ണന് അറിയുന്നു. സത്യം അറിഞ്ഞിട്ടും, ജീവിതത്തില് തനിക്കൊപ്പം നിന്ന ദുര്യോധനനോടുള്ള കടപ്പാട് ഉപേക്ഷിക്കാന് കര്ണ്ണന് തയ്യാറാകുന്നില്ല.
ഈ കഥാസന്ദര്ഭം നമ്മെ എത്തിക്കുന്നത് ഒരു വലിയ ജീവിതചോദ്യത്തിലേക്കാണ് സത്യം തിരിച്ചറിഞ്ഞാല് ഉടന് തന്നെ നമ്മുടെ എല്ലാ തീരുമാനങ്ങളും മാറുമോ?
കൃഷ്ണസന്ദേശം
സത്യം അറിയുന്നത് പ്രധാനമാണ്; എന്നാല് ആ സത്യത്തെ അടിസ്ഥാനമാക്കി ഉത്തരവാദിത്തത്തോടെ തീരുമാനമെടുക്കുന്നതാണ് അതിലും പ്രധാനമായത്.
ജീവിതത്തില് ചില സത്യങ്ങള് നമുക്ക് വൈകിയാണ് മനസ്സിലാകുന്നത്. ചിലപ്പോള് ഒരു മനുഷ്യനെക്കുറിച്ചുള്ള നമ്മുടെ ധാരണ മാറും. ഒരു ബന്ധത്തിന്റെ യഥാര്ഥ സ്വഭാവം മനസ്സിലാകും. സ്വന്തം ജീവിതത്തെക്കുറിച്ചുള്ള ഒരു പ്രധാന സത്യം തിരിച്ചറിയും.
എന്നാല് സത്യം അറിഞ്ഞ നിമിഷം തന്നെ കഴിഞ്ഞ കാലത്തെ മുഴുവന് മാറ്റാനാവില്ല.
ജീവിതസ്പര്ശം
നമ്മുടെ ജീവിതത്തിലും ചില തിരിച്ചറിവുകള് വൈകിയാണ് എത്തുന്നത്.
ഒരാള് നമ്മെ സ്നേഹിച്ചിരുന്നുവെന്ന് വര്ഷങ്ങള്ക്കുശേഷം മനസ്സിലാകാം. ഒരു തീരുമാനം തെറ്റായിരുന്നുവെന്ന് പിന്നീട് തിരിച്ചറിയാം. ഒരിക്കല് വിശ്വസിച്ച ഒരാളുടെ യഥാര്ഥ സ്വഭാവം കാലം കഴിഞ്ഞ് മനസ്സിലാകാം.
അപ്പോള് നമ്മള് പലപ്പോഴും സ്വയം കുറ്റപ്പെടുത്തും.
”അന്ന് തന്നെ മനസ്സിലാക്കിയിരുന്നെങ്കില്…’
എന്ന ചിന്തയില് കുടുങ്ങും.
പക്ഷേ കഴിഞ്ഞ കാലത്തെ അറിവുകൊണ്ട് അന്നത്തെ തീരുമാനങ്ങളെ വിധിക്കുന്നത് എളുപ്പമാണ്. അന്ന് നമുക്ക് അറിയാവുന്ന വിവരങ്ങളുടെയും സാഹചര്യങ്ങളുടെയും അടിസ്ഥാനത്തിലായിരുന്നു ആ തീരുമാനം.
അതുകൊണ്ട് പഴയ തെറ്റുകളെക്കുറിച്ച് പശ്ചാത്തപിക്കുന്നതിനേക്കാള്, ഇന്ന് മനസ്സിലായ സത്യത്തെ അടിസ്ഥാനമാക്കി നാളെ എങ്ങനെ ജീവിക്കണം എന്നതാണ് പ്രധാനപ്പെട്ടത്.
അതേസമയം, നന്ദിയും കടപ്പാടും ജീവിതത്തില് വലിയ മൂല്യങ്ങളാണ്. ഒരാള് നമ്മെ പ്രതിസന്ധിയില് സഹായിച്ചിട്ടുണ്ടെങ്കില് ആ ബന്ധത്തിന്റെ വില മനസ്സിലാക്കണം. പക്ഷേ കടപ്പാട് എന്ന പേരില് തെറ്റിനൊപ്പം എന്നും നില്ക്കേണ്ടതില്ല.
നമ്മെ സഹായിച്ച ഒരാളോട് നന്ദിയുണ്ടാകാം; അതേ സമയം അയാളുടെ എല്ലാ പ്രവൃത്തികളെയും അംഗീകരിക്കണമെന്നില്ല.
നന്ദി അന്ധമായ അനുസരണയല്ല.
ജീവിതത്തില് ചിലപ്പോള് സത്യവും ബന്ധവും കടപ്പാടും തമ്മില് സംഘര്ഷമുണ്ടാകും. അപ്പോള് എളുപ്പമുള്ള തീരുമാനമൊന്നും ഉണ്ടാകണമെന്നില്ല. എന്നാല് സ്വന്തം മനസ്സാക്ഷിയോട് സത്യസന്ധമായി നില്ക്കാനുള്ള ധൈര്യം ആവശ്യമാണ്.
കര്ണ്ണന്റെ കഥ നമ്മെ വിധിക്കാന് വേണ്ടിയല്ല. മനുഷ്യന്റെ തീരുമാനങ്ങള് എത്ര സങ്കീര്ണ്ണമാണെന്ന് മനസ്സിലാക്കാനാണ്.
ഓരോ മനുഷ്യനും തന്റെ ജീവിതത്തില് എടുത്ത തീരുമാനങ്ങളുടെ പിന്നില് ഒരു ചരിത്രമുണ്ട്. ആ ചരിത്രം മനസ്സിലാക്കാതെ ഒരാളെ പൂര്ണ്ണമായി വിധിക്കാനാവില്ല.
സത്യം ചിലപ്പോള് വൈകിയെത്താം. പക്ഷേ അത് വന്നശേഷം നാം എടുക്കുന്ന അടുത്ത തീരുമാനം നമ്മുടെ കൈകളിലാണ്.
കൃഷ്ണസ്പര്ശം:
വൈകിയെത്തുന്ന സത്യത്തെക്കുറിച്ച് പശ്ചാത്തപിക്കേണ്ട; അത് അറിഞ്ഞശേഷമുള്ള വഴിയാണ് ഇനി നമുക്ക് തിരഞ്ഞെടുക്കാനുള്ളത്.
ജന്മഭൂമി ഓണ്ലൈന്