കൊച്ചി : സംഗീതജ്ഞൻ ഔസേപ്പച്ചന്റെ പിറന്നാളിന് ആശംസയുമായി നടനും കേന്ദ്ര സഹമന്ത്രിയുമായ സുരേഷ് ഗോപി. വിഡിയോ കോൾ ചെയ്ത് പാട്ട് പാടിയാണ് സുരേഷ് ഗോപി ആശംസ അറിയിച്ചത്. ഔസേപ്പച്ചനെ ‘ദേവഗായകൻ’ എന്ന് വിശേഷിപ്പിച്ച സുരേഷ് ഗോപി ഔസേപ്പച്ചൻ ഒരുക്കിയ ‘യവനകഥയിൽ നിന്നുവന്ന ഇടയ കന്യകേ’ എന്ന ഗാനത്തിന്റെ വരികൾ മാറ്റിപ്പാടിയാണ് സുരേഷ് ഗോപി പിറന്നാളാശംസകൾ നേർന്നത് . ‘യവന കഥയിൽ നിന്നുവന്ന ദേവഗായകാ…’ എന്നാണ് സുരേഷ് ഗോപി ഔസേപ്പച്ചനുവേണ്ടി പാടിയത്.
സുരേഷ് ഗോപി പാടുമ്പോൾ അത് ആസ്വദിക്കുന്ന ഔസേപ്പച്ചനെയും ഭാര്യ മറിയാമ്മയെയും വിഡിയോയിൽ കാണാം. പാട്ടു കേട്ടശേഷം ഔസേപ്പച്ചൻ ചിരിച്ചുകൊണ്ട് താരത്തിന് നന്ദി പറയുകയും ചെയ്തു. ഔസേപ്പച്ചന് ദീർഘായുസ്സും നേരാനും സുരേഷ് ഗോപി മറന്നില്ല . ഔസേപ്പച്ചൻ തന്നെയാണ് വീഡിയോ സമൂഹമാധ്യങ്ങളിൽ പങ്കുവച്ചത് . ‘എനിക്കു ലഭിച്ച അപൂർവ ജന്മദിനാശംസ’ എന്ന അടിക്കുറിപ്പോടെയാണ് ഔസേപ്പച്ചൻ വിഡിയോ പങ്കുവച്ചത്. .
കഴിഞ്ഞ ദിവസമാണ് ഔസേപ്പച്ചൻ 71–ാം പിറന്നാൾ ആഘോഷിച്ചത്. ഔസേപ്പച്ചൻ സംഗീതമൊരുക്കിയ ‘യവനകഥയിൽ നിന്നുവന്ന ഇടയ കന്യകേ’ എന്ന ഗാനം ‘ബെത്ലഹേം കുടുംബ യൂണിറ്റ്’ എന്ന ചിത്രത്തിലൂടെ വീണ്ടും ആസ്വാദകർ ഏറ്റെടുത്ത സന്തോഷത്തിലാണ് ഇത്തവണത്തെ പിറന്നാളാഘോഷം . ‘അന്ന’ എന്ന, റിലീസ് ചെയ്യാതെപോയ സിനിമയിലേതായിരുന്നു ആ ഗാനം. ‘ബെത്ലഹേം കുടുംബ യൂണിറ്റ്’ എന്ന ചിത്രത്തിൽ ഈ പാട്ടിനെക്കുറിച്ചും സിനിമയെക്കുറിച്ചും പരാമർശമുണ്ടായതോടെ പാട്ട് വീണ്ടും ആസ്വാദകരിലേക്ക് എത്തുകയായിരുന്നു.
