കോഴിക്കോട്: 13 മുതല്‍ 15 വരെ കോഴിക്കോട്ട് നടക്കുന്ന സിപിഎം വിശാല സംസ്ഥാന സമിതി യോഗത്തില്‍ തെരഞ്ഞെടുപ്പ് പരാജയം സംബന്ധിച്ച ചര്‍ച്ചയില്‍ അവതരിപ്പിക്കാന്‍ സംസ്ഥാന സെക്രട്ടേറിയറ്റ് തയാറാക്കിയ കരട് രേഖയില്‍ തിരുത്തലുകളുണ്ടായേക്കും. കരട് രേഖയില്‍ മാറ്റങ്ങള്‍ വരുത്തേണ്ടതുണ്ടോ എന്ന് ചര്‍ച്ച ചെയ്യാന്‍ ഇന്നലെ തിരുവനന്തപുരത്ത് ആരംഭിച്ച സംസ്ഥാന സമിതി യോഗം ഇന്ന് അവസാനിക്കാനിരിക്കെ, സെക്രട്ടേറിയറ്റ് രേഖയില്‍ തിരുത്തലുണ്ടായേക്കുമെന്നാണ് സൂചന. തെരഞ്ഞെടുപ്പ് പരാജയവുമായി ബന്ധപ്പെട്ട് പാര്‍ട്ടി സംസ്ഥാന നേതൃത്വത്തിനെതിരെ ജില്ലാതല യോഗങ്ങളില്‍ ഉയര്‍ന്ന വിമര്‍ശനങ്ങളെ വെട്ടിനിരത്തിക്കൊണ്ടുള്ള കരട് രേഖയാണ് സെക്രട്ടേറിയറ്റ് വിശാല സംസ്ഥാന സമിതി യോഗത്തിനായി തയാറാക്കിയത്.
കഴിഞ്ഞ നിയമസഭ തെരഞ്ഞെടുപ്പില്‍ സ്ഥാനാര്‍ത്ഥി നിര്‍ണയത്തിലെ പാളിച്ച അടക്കമുള്ള സംസ്ഥാന നേതൃത്വത്തിന്റെ വീഴ്ച വ്യക്തമാക്കിയുള്ള കേന്ദ്ര കമ്മിറ്റിയുടെ റിപ്പോര്‍ട്ട് ആയുധമാക്കി പിണറായിക്കും ഗോവിന്ദനുമെതിരെ രൂക്ഷ വിമര്‍ശനം ഉയരുമെന്ന ആശങ്കയുടെ വെളിച്ചത്തിലാണ് സെക്രട്ടേറിയറ്റ് വിമര്‍ശനങ്ങളെ വെട്ടിനിരത്തിക്കൊണ്ടുള്ള പഴുതടച്ച കരട് രേഖ തയാറാക്കിയത്. എന്നാല്‍ വിശാല സംസ്ഥാന സമിതിയില്‍ നേതൃത്വത്തിന് നേരെ വിമര്‍ശനമുണ്ടാകാനുള്ള സാധ്യത മുന്‍കൂട്ടി കണ്ട് ജാഗ്രതയോടെയാണ് നേതൃത്വം നീങ്ങുന്നത്. സംസ്ഥാനത്തെ പാര്‍ട്ടിയില്‍ ചവിട്ടി പിഴിയല്‍ തന്നെ വേണ്ടിവരുമെന്ന ജനറല്‍ സെക്രട്ടറി എം.എ. ബേബിയുടെ കഴിഞ്ഞദിവസത്തെ പ്രസ്താവനയും സംസ്ഥാന നേതൃത്വത്തിന് എതിരായ നീക്കത്തിന് ഊര്‍ജം പകരുന്നുണ്ട്.
പയ്യന്നൂരില്‍ നടന്ന പാര്‍ട്ടി വിശദീകരണത്തില്‍ പിണറായി വിജയന്‍ തെരഞ്ഞെടുപ്പിലെ പരാജയത്തിന് കാരണം പാര്‍ട്ടിക്ക് പറ്റിയ തെറ്റല്ലെന്നും ജനങ്ങള്‍ക്ക് പറ്റിയ തെറ്റാണെന്നും പറഞ്ഞിരുന്നു. സംസ്ഥാന സെക്രട്ടറി എം.വി. ഗോവിന്ദന്‍ ഈ പ്രസ്താവത്തെ ന്യായീകരിക്കുകയും ചെയ്തു. പാര്‍ട്ടിയിലെ ഒരു വിഭാഗം ഈ നിലപാടിനെ ശക്തമായി എതിര്‍ക്കുന്നുണ്ട്. വിശാല സംസ്ഥാന സമിതി നേതൃമാറ്റത്തിനാണോ ശൈലീമാറ്റത്തിനാണോ വിധിയെഴുതുക എന്നാണ് ഇനി കാത്തിരുന്ന് കാണേണ്ടത്.
13,14,15 തീയതികളില്‍ കോഴിക്കോട്ട് നടക്കുന്ന വിശാല സംസ്ഥാന സമിതിയില്‍ പാര്‍ട്ടി സംസ്ഥാന സമിതി അംഗങ്ങള്‍ക്ക് പുറമേ ജില്ലാ സെക്രട്ടേറിയേറ്റ് അംഗങ്ങളും ഉള്‍പ്പെടെ മുന്നൂറോളം പേരാണ് പങ്കെടുക്കുക.
