യുഎസ് ഓപ്പണ്‍: കരുത്തോടെ സബലെങ്ക, അല്‍ക്കാരസ്

ന്യൂയോര്‍ക്ക്: യുഎസ് ഓപ്പണ്‍ ടെന്നീസില്‍ മുന്‍നിര പുരുഷ, വനിതാ സിംഗിള്‍സ് താരങ്ങളായ കാര്‍ലോസ് അല്‍ക്കാരസും അരീന സബലെങ്കയും തകര്‍പ്പന്‍ ജയവുമായി മൂന്നാം റൗണ്ടില്‍ പ്രവേശിച്ചു. രണ്ടാം റൗണ്ട് മത്സരത്തില്‍ ആദ്യ സെറ്റ് അടിയറവച്ച അല്‍കാരസിന് നേരിട്ടുള്ള സെറ്റ് വിജയം സ്വന്തമാക്കാനായില്ല. എതിരാളിയെ നിഷ്പ്രഭയാക്കുന്ന പ്രകടനവുമായാണ് സബലെങ്ക അനായാസം രണ്ടാം റൗണ്ട് മത്സരം ജയിച്ചത്.

മറ്റ് വനിതാ സിംഗിള്‍സ് പോരാട്ടങ്ങളില്‍ കരോലിന മുച്ചോവ, ലിന്‍ഡ നൊസ്‌കോവ എന്നിവരും നേരിട്ടുള്ള സെറ്റ് വിജയത്തോടെയാണ് മൂന്നാം റൗണ്ടിലേക്ക് മുന്നേറിയത്. പുരുഷ സിംഗിള്‍സ് താരങ്ങളായ വു യിബിങ്, അലക്‌സാണ്ടര്‍ ബുബ്‌ളിക്ക്, യിറി ലഹേക്ക, ഫ്രാങ്കസ് ടിയാഫോ എന്നിവര്‍ രണ്ടാം റൗണ്ട് മത്സരത്തില്‍ നേരിട്ടുള്ള സെറ്റ് വിജയം കരസ്ഥമാക്കി.

സീഡില്ലാ താരമായി ഇറങ്ങിയ പോര്‍ച്ചുഗീസ് താരം ജയിം ഫാരിയ ആദ്യ സെറ്റില്‍ അല്‍കാരസിനെ തോല്‍പ്പിച്ചു. പക്ഷെ തുടര്‍ന്നുള്ള മൂന്ന് സെറ്റും ഗംഭീരമായി പിടിച്ചെടുത്തുകൊണ്ട് സ്പാനിഷ് താരം വിജയിക്കുകയായിരുന്നു.

സ്‌കോര്‍ 4-6, 6-0, 6-3, 6-2. മൂന്നാം റൗണ്ടില്‍ വു യിബിങ് ആണ് അല്‍കാരസിന്റെ എതിരാളി. 15-ാം സീഡ് താരമായി മത്സരിക്കുന്ന അലക്‌സാണ്ടര്‍ ബുബ്‌ളിക്ക് അഡ്രിയാന്‍ മന്നാറിനോയെ ആണ് നേരിട്ടുള്ള സെറ്റിന് കീഴടക്കിയത്. സ്‌കോര്‍ 6-3, 6-1, 6-1. ടോബി സാമുവലിനെതിരെയാണ് ലഹേക്ക നേരിട്ടുള്ള സെറ്റ് വിജയം ആഘോഷിച്ചത്(6-4, 6-2, 6-4). ജയിംസ്ഡക്ക് വര്‍ത്തിനെതിരെയായിരുന്നു യിബിങ്ങിന്റെ നേരിട്ടുള്ള സെറ്റ് വിജയം(7-5, 6-3, 6-1). രണ്ട് പേരും സീഡില്ലാ താരങ്ങളായാണ് മത്സരിക്കുന്നത്. 11-ാം സീഡ് താരമായ അമേരിക്കയുടെ ടിയാഫോ ജപ്പാന്‍ താരം റെയ് സാകാമോട്ടോയെ ആണ് നേരിട്ടുള്ള സെറ്റിന് പരാജയപ്പെടുത്തിയത്(6-3, 7-6(7-2), 7-5). ഇറ്റാലിയന്‍ താരം മാറ്റിയോ ബെറെറ്റിനിയെ അര്‍ജന്റീന താരം മാരിയാനോ നവോനെ തോല്‍പ്പിച്ചതാണ് ഇന്നലെ പുലര്‍ച്ചെ നടന്ന രണ്ടാം റൗണ്ട് പോരാട്ടങ്ങളിലെ മറ്റൊരു ശ്രദ്ധേയ പുരുഷ സിംഗിള്‍സ് മത്സരം.

വനിതാ സിംഗിള്‍സില്‍ സീഡില്ലാ താരം പോളിന ലാറ്റ്‌സെന്‍കോയെ നിഷ്പ്രഭയാക്കിയാണ് സബലെങ്കയുടെ മുന്നേറ്റം (6-1, 6-1). നോസ്‌കോവ ലന്‍ലാനാ ടറാറുഡീയെയും(6-4, 6-2) മുച്ചോവ കാത്തീ ബൂള്‍ട്ടറിനെയും(6-1, 6-0) റഖിമോവ ഒക്‌സാന സെലെഖ്മറ്റീവയെയും(6-3, 6-0) ആണ് ഇന്നലെ പുലര്‍ച്ചെ നടന്ന രണ്ടാം റൗണ്ട് പോരാട്ടങ്ങളില്‍ നേരിട്ടുള്ള സെറ്റിന് തോല്‍പ്പിച്ചത്. മറ്റ് വനിതാ സിംഗിള്‍സ് രണ്ടാം റൗണ്ട് പോരാട്ടങ്ങളില്‍ എലിന സ്വിറ്റോലിന, ആന്‍ ലി, എക്കാടെറിന അലക്‌സാണ്ട്രോവ, അന്ന കാലിന്‍സ്‌കായ എന്നിവരും ജയിച്ച് മുന്നേറി.