കണ്ണൂര്: കൂത്തുപറമ്പില് 15 കാരനെ കാണാനില്ലെന്ന് പരാതി. രാജീവ് ഗാന്ധി മെമ്മോറിയല് ഹയര് സെക്കന്ററി സ്കൂളിലെ പത്താം ക്ലാസ് വിദ്യാര്ത്ഥി അദ്വൈതിനെയാണ് കാണാതായത്.
രാവിലെ 6.30 ഓടെ പാറാലുള്ള ട്യൂഷന് സെന്ററിലേക്ക് പോയതാണ്. സ്കൂള് യൂണിഫോം ധരിച്ചാണ് വീട്ടില് നിന്നിറങ്ങിയത്. ട്യൂഷന് സെന്ററില് എത്തിയില്ലെന്ന കാര്യം അറിഞ്ഞതോടെ വീട്ടുകാര് കൂത്തുപറമ്പ് പൊലീസില് പരാതിപ്പെട്ടു.
അദ്വൈത് യൂണിഫോം മാറ്റി മറ്റൊരു വസ്ത്രം ധരിച്ച് കൂത്തുപറമ്പ് ജംഗ്ഷനിലും പിന്നീട് തലശേരി റെയില്വേ സ്റ്റേഷനിലും എത്തിയെന്ന് പൊലീസ് അന്വേഷണത്തില് കണ്ടെത്തി.കുട്ടി ട്രെയിന് കയറി പോയിട്ടുണ്ടെന്ന് പൊലീസ് ഉറപ്പിക്കുന്നു. സ്കൂള് ബാഗും 800 രൂപയുമാണ് അദ്വൈതിന്റെ കൈവശമുള്ളത്. കുട്ടിയെ കുറിച്ച് വിവരം കിട്ടുന്നവര് 8075258027 എന്ന നമ്പറില് വിളിച്ച് അറിയിക്കണമെന്ന് പൊലീസ് അഭ്യര്ത്ഥിച്ചു.
