തിരുനാവായ: കേരളം കുംഭമേളയെ സംസ്ഥാന സര്‍ക്കാര്‍ കൂടുതല്‍ ഗൗരവത്തോടെ കാണണമെന്നും 2027ലെ കുംഭമേളയില്‍ രാജ്യത്തിന്റെ വിവിധ ഭാഗങ്ങളില്‍ നിന്നായി ലക്ഷക്കണക്കിന് പേര്‍ തിരുനാവായയില്‍ എത്തിച്ചേരുമെന്നും മഹാമണ്ഡലേശ്വര്‍ ആനന്ദവനം ഭാരതി. മഹാമാഘ മഹോത്സവത്തിന് മുന്നോടിയായി തിരുനാവായയില്‍ നടന്ന ആലോചനായോഗത്തില്‍ സംസാരിക്കുകയായിരുന്നു അദ്ദേഹം.
പ്രയാഗ്‌രാജില്‍ എല്ലാ വര്‍ഷവും നടക്കുന്ന മാഘമേളയ്‌ക്ക് സമാനമായ രീതിയിലായിരിക്കും തിരുനാവായയിലെ മഹാമാഘ മഹോത്സവം സംഘടിപ്പിക്കുക. 2028ല്‍ നടക്കുന്ന മഹാകുംഭമേളയ്‌ക്ക് മുന്നോടിയായാണ് 2027ലെ കേരളം കുംഭമേള സംഘടിപ്പിക്കുന്നത്. രാജ്യത്തെ വിവിധ പരമ്പരകളില്‍പ്പെട്ട സംന്യാസിമാര്‍ ഇത്തവണ തിരുനാവായയിലെത്തും. വിവിധ സംസ്ഥാനങ്ങളില്‍ നിന്നുള്ള തീര്‍ത്ഥാടകരുടെയും സംന്യാസിമാരുടെയും വലിയ സാന്നിധ്യം മേളയിലുണ്ടാകും.
2027ലെ മകരസംക്രാന്തി മുതല്‍ ശിവരാത്രി വരെയുള്ള കാലയളവിലാണ് കേരളം കുംഭമേള നടക്കുക. വന്‍തോതില്‍ തീര്‍ത്ഥാടകര്‍ എത്തുമെന്നതിനാല്‍ അടിസ്ഥാന സൗകര്യങ്ങള്‍ ഉള്‍പ്പെടെയുള്ള ഒരുക്കങ്ങള്‍ നേരത്തെ ആരംഭിക്കണമെന്നും അദ്ദേഹം ആവശ്യപ്പെട്ടു.
