പത്തനംതിട്ട: കുപ്രസിദ്ധ ഗുണ്ട അര്ജുന് ആയങ്കിക്കായി മല്ലപ്പള്ളി കാട്ടാമലയിലെ സിപിഎം നേതാവിന്റെ വീട്ടില് പരിശോധന നടത്തിയ പൊലീസുകാര്ക്കെതിരെ ഭീഷണിയുമായി സിപിഎം സംസ്ഥാന കമ്മിറ്റി അംഗം കെ പി ഉദയഭാനു.പൊലീസുകാര്ക്കും വീടും കുടുംബവുമുണ്ടെന്നും അമ്മയും പെങ്ങന്മാരുമുണ്ടെന്നും ഓര്ക്കണം. പാവപ്പെട്ടവരുടെ വീടുകളില് കയറിയ പൊലീസുകാരെ തങ്ങള് നോക്കിവെച്ചിട്ടുണ്ടെന്ന് ഉദയഭാനു പറഞ്ഞു.
സിപിഎം നേതാവിന്റെ വീട്ടില് പോലീസ് എത്തിയതില് പ്രതിഷേധിച്ച് നടത്തിയ യോഗത്തിലാണ് ഉദയഭാനുവിന്റെ ഭീഷണി .പൊലീസുകാരെ തങ്ങള് നോക്കിവച്ചിട്ടുണ്ട്.അവരെ സംരക്ഷിക്കാന് ആരുമുണ്ടാകില്ല.പൊലീസുകാരുടെ വീടുകളിലേക്കും തങ്ങള് കയറുമെന്നും കെ പി ഉദയഭാനു പറഞ്ഞു.ആരുടെയെങ്കിലും വാക്കുകേട്ട് പാവപ്പെട്ടവരുടെ വീടുകളില് കയറിയാല് വന്നതുപോലെ തിരിച്ചുപോകാന് കഴിയില്ലെന്നാണ് പൊലീസുകാരോട് പറയാനുളളത്.
ഭരണം ലഭിച്ചതിനാല് പാവങ്ങളുടെ വീടുകളില് കയറി അവരെ കള്ളക്കേസില് കുടുക്കാമെന്നാണ് ചില കോണ്ഗ്രസ് പ്രവര്ത്തകരുടെ ധാരണയെങ്കില് അത് അനുവദിക്കില്ല. ശക്തമായ പ്രതികരണമുണ്ടാകുമെന്നും കെ പി ഉദയഭാനു മുന്നറിയിപ്പ് നല്കി.
