റോം: ഫുട്ബോള് ചരിത്രത്തിലെ എക്കാലത്തെയും മികച്ച പ്രതിരോധ താരങ്ങളിലൊരാളും ഇറ്റലിയുടെ ലോകകപ്പ് ജേതാവുമായ ഫ്രാങ്കോ ബറേസി (66) അന്തരിച്ചു. കുറച്ചുകാലമായി രോഗബാധിതനായി ചികിത്സയിലായിരുന്ന അദ്ദേഹം മിലാനില് വച്ചാണ് വിടവാങ്ങിയത്.
ഏകക്ലബ് ഇതിഹാസം ഫ്രാങ്കോ ബറേസി
20 വര്ഷം നീണ്ട സീനിയര് കരിയറില് എസി മിലാന് വേണ്ടി മാത്രം ബൂട്ട് കെട്ടിയ അപൂര്വ്വ പ്രതിഭയാണ് ബറേസി. എസി മിലാനൊപ്പം 6 സീരി എ കിരീടങ്ങളും 3 യൂറോപ്യന് കപ്പുകളും/ചാമ്പ്യന്സ് ലീഗുകളും നേടി.
1982ല് ലോകകപ്പ് നേടിയ ഇറ്റാലിയന് ടീമില് അംഗമായിരുന്ന അദ്ദേഹം, 1994 ലോകകപ്പില് ഇറ്റലിയെ ഫൈനലിലേക്ക് നയിക്കുകയും ചെയ്തു. അദ്ദേഹത്തോടുള്ള ആദരസൂചകമായി എസി മിലാന് അവരുടെ ‘നമ്പര് 6’ ജേഴ്സി എന്നെന്നേക്കുമായി പിന്വലിച്ചിട്ടുണ്ട്. ഫുട്ബോളില് ‘ലിബറോ’ എന്ന പ്രതിരോധ സ്ഥാനത്തെ പുനര്നിര്വ്വചിച്ച താരമാണ് ഫ്രാങ്കോ ബറേസി. പൗളോ മാള്ഡീനി, അലസ്സാന്ഡ്രോ കോസ്റ്റാകുര്ട്ട, മൗറോ തസ്സോട്ടി എന്നിവര്ക്കൊപ്പം അദ്ദേഹം കെട്ടിപ്പടുത്ത പ്രതിരോധ നിര ലോക ഫുട്ബോളിലെ ഏറ്റവും കരുത്തുറ്റ ഒന്നായി വിലയിരുത്തപ്പെടുന്നു. ‘എസി മിലാന്റെ ചരിത്രം മുഴുവന് ഫ്രാങ്കോ ബറേസിയുടെ വേര്പാടില് കണ്ണീരണിഞ്ഞിരിക്കുകയാണ്. അദ്ദേഹത്തിന്റെ മാതൃകയും ആത്മാര്ത്ഥതയും എസി മിലാന്റെ ഡിഎന്എയില് എന്നും നിലനില്ക്കുമെന്ന് എസി മിലാന് ക്ലബ് പ്രസ്താവനയില് പറഞ്ഞു. ’22ാം വയസ്സില് എസി മിലാന്റെ നായകസ്ഥാനമേറ്റെടുത്ത അദ്ദേഹം 15 സീസണുകളില് ടീമിനെ നയിച്ചു. കളിക്കളത്തിലെ കൃത്യമായ പൊസിഷനിംഗും ഗെയിം റീഡിംഗും കൊണ്ട് എതിരാളികളുടെ ആക്രമണങ്ങളെ നിഷ്പ്രഭമാക്കാന് അദ്ദേഹത്തിന് പ്രത്യേക കഴിവുണ്ടായിരുന്നു. ഫുട്ബോളിനോടുള്ള വിശ്വസ്തതയുടെയും നേതൃപാടവത്തിന്റെയും പ്രതീകമായ ബറേസിയുടെ വേര്പാട് ലോക കായികരംഗത്തിന് നികത്താനാവാത്ത നഷ്ടമാണ്.
