അട്ടപ്പാടിയില്‍ നിന്ന് അവരെത്തി, ഗവര്‍ണറെ കാണാന്‍; ‘വിജയ്‌യെ കാണിച്ചുതരാമോ?’ വിദ്യാര്‍ത്ഥിനിയുടെ നിഷ്‌കളങ്ക ചോദ്യം

തിരുവനന്തപുരം: അട്ടപ്പാടിയിലെ വനവാസി വിദ്യാര്‍ത്ഥികള്‍ ലോക് ഭവനിലെത്തി ഗവര്‍ണര്‍ രാജേന്ദ്ര വിശ്വനാഥ് ആര്‍ലേക്കറുമായി സംവദിച്ചു. വിദ്യാഭ്യാസ നേതൃത്വ വികസന ലക്ഷ്യത്തോടെ സ്വാമി വിവേകാനന്ദ മെഡിക്കല്‍ മിഷന്‍ നടപ്പാക്കുന്ന പ്രൊപ്പല്‍ (PROPEL- Programme for the Promotion of Education and Leadership) പദ്ധതിയിലെ വിദ്യാര്‍ത്ഥികളാണ് ഗവര്‍ണറെ സന്ദര്‍ശിച്ചത്.

ലോക്ഭവനിലെത്തിയ വിദ്യാര്‍ത്ഥികള്‍ തങ്ങളുടെ പഠനാനുഭവങ്ങളും ജീവിതത്തിലുണ്ടായ മാറ്റങ്ങളും ഭാവി സ്വപ്‌നങ്ങളും ഗവര്‍ണറുമായി പങ്കുവച്ചു. തുടര്‍ന്ന് പ്രൊപ്പല്‍ പദ്ധതിയുടെ പ്രവര്‍ത്തനങ്ങളെയും ലക്ഷ്യങ്ങളെയും കുറിച്ച് സംഘാംഗങ്ങള്‍ വിശദീകരിച്ചു.

‘നിങ്ങള്‍ക്ക് എന്നോട് എന്തെങ്കിലും ചോദിക്കാനോ പറയാനോ ഉണ്ടോ?’ എന്ന് ഗവര്‍ണര്‍ വിദ്യാര്‍ത്ഥികളോട് ചോദിച്ചപ്പോള്‍, ഒരു വിദ്യാര്‍ത്ഥിനി താന്‍ ചലച്ചിത്രതാരം വിജയ്‌യുടെ വലിയ ആരാധികയാണെന്ന് പറഞ്ഞു. ‘തമിഴ്‌നാട് മുഖ്യമന്ത്രിയായ വിജയ്‌യെ എനിക്ക് ഒരിക്കല്‍ നേരില്‍ കാണാന്‍ അവസരം ഒരുക്കിത്തരാമോ?’ എന്നായിരുന്നു അവളുടെ നിഷ്‌കളങ്കമായ ചോദ്യം. വിദ്യാര്‍ത്ഥിനിയുടെ ആഗ്രഹം സദസില്‍ സന്തോഷവും കൗതുകവും നിറച്ചു.

പ്രൊപ്പല്‍ പദ്ധതിയില്‍ ചേരുന്നതിന് മുമ്പ് പൊതുവേദിയില്‍ മൈക്ക് കൈകാര്യം ചെയ്യാനോ ആളുകള്‍ക്ക് മുന്നില്‍ സംസാരിക്കാനോ തനിക്ക് അറിയില്ലായിരുന്നുവെന്ന് മറ്റൊരു വിദ്യാര്‍ത്ഥിനി പറഞ്ഞു. ‘പക്ഷേ, ഇന്ന് ഗവര്‍ണറായ അങ്ങയുടെ മുന്നില്‍ ആത്മവിശ്വാസത്തോടെ സംസാരിക്കാന്‍ എനിക്ക് കഴിയുന്നു. അത് എനിക്ക് വലിയ നേട്ടവും സന്തോഷവുമാണ്,’ പഠനത്തോടൊപ്പം വായനാശീലവും വളര്‍ത്തണമെന്ന് ഗവര്‍ണര്‍ വിദ്യാര്‍ത്ഥികളോട് നിര്‍ദേശിച്ചു. അവര്‍ക്ക് പുസ്തകങ്ങള്‍ സമ്മാനമായി നല്‍കി.

വിദ്യാര്‍ത്ഥികളുടെ അക്കാദമിക പുരോഗതിയിലും വ്യക്തിത്വവികസനത്തിലും നിര്‍ണായക പങ്കുവഹിക്കുന്ന മെന്റര്‍മാരും കൂടിക്കാഴ്ചയില്‍ പങ്കെടുത്തു. അട്ടപ്പാടിയിലെ വനവാസി സമൂഹത്തിന്റെ സമഗ്രവികസനത്തിനായി 2004 മുതല്‍ പ്രവര്‍ത്തിച്ചുവരുന്ന സ്വാമി വിവേകാനന്ദ മെഡിക്കല്‍ മിഷന്‍ ആരോഗ്യസംരക്ഷണ മേഖലയില്‍ ആരംഭിച്ച പ്രവര്‍ത്തനങ്ങള്‍ പിന്നീട് വിദ്യാഭ്യാസം, നൈപുണ്യ വികസനം, ഉപജീവന മാര്‍ഗങ്ങളുടെ പ്രോത്സാഹനം, ഗ്രാമവികസനം തുടങ്ങിയ മേഖലകളിലേക്കും വ്യാപിപ്പിച്ചു.

വിവേകാനന്ദ ലേണിങ് ആന്‍ഡ് ഡെവലപ്‌മെന്റ് ഫൗണ്ടേഷന്റെ അക്കാദമിക സഹകരണത്തോടെ 2020ലാണ് പ്രൊപ്പല്‍ പദ്ധതി ആരംഭിച്ചത്. അന്ന് ആറാം ക്ലാസില്‍ പഠിച്ചിരുന്ന 18 വനവാസി വിദ്യാര്‍ത്ഥികളാണ് പദ്ധതിയുടെ ഭാഗമായത്. അട്ടപ്പാടിയില്‍ നിന്ന് ലോക്ഭവനിലെത്തി ഗവര്‍ണറുമായി നേരിട്ട് സംവദിച്ച അനുഭവം വിദ്യാര്‍ത്ഥികള്‍ക്ക് പുതിയ ആത്മവിശ്വാസവും വലിയ പ്രചോദനവും പകര്‍ന്നു.