കൊല്ലം: 2018 ഒക്ടോബര് ഒന്നു മുതല് കേന്ദ്ര സര്ക്കാര് അങ്കണവാടി പ്രവര്ത്തകരുടെ ഓണറേറിയം പ്രതിമാസം 3000 നിന്ന് 4500 രൂപയായും അങ്കണവാടി സഹായികളുടെ ഓണറേറിയം 1500 നിന്ന് 2250 രൂപയായും വര്ദ്ധിപ്പിച്ചു. ഇതിന് പുറമേ സംസ്ഥാനങ്ങള് നല്കുന്ന അധിക ഓണറേറിയവുമുണ്ടെന്നും കേന്ദ്ര വനിതാ ശിശുവികസന വകുപ്പു സഹമന്ത്രി സാവിത്രി ഠാക്കൂര് ലോക്സഭയില് അറിയിച്ചു. അങ്കണവാടി ജീവനക്കാരുടെ വേതനം വര്ധിപ്പിക്കണമെന്നാവശ്യപ്പെട്ടുള്ള ചോദ്യത്തിന് മറുപടി നല്കുകയായിരുന്നു മന്ത്രി.
ഇത് കൂടാതെ കേരളത്തില് അങ്കണവാടി പ്രവര്ത്തകര്ക്ക് സംസ്ഥാന സര്ക്കാര് 8300 രൂപയും സഹായികള്ക്ക് 6800 രൂപയും അധികമായി നല്കുന്നുണ്ടെന്നും മന്ത്രി വ്യക്തമാക്കി. കൂടാതെ കേന്ദ്ര സര്ക്കാര് അങ്കണവാടി പ്രവര്ത്തകര്ക്കു പ്രതിമാസം 500 രൂപയും സഹായികള്ക്കു പ്രതിമാസം 250 രൂപയും പ്രകടനാധിഷ്ഠിത പ്രോത്സാഹനമായും നല്കി വരുന്നു. അങ്കണവാടി പ്രവര്ത്തകര്ക്ക് സ്മാര്ട്ട് ഫോണുകള് നല്കി സാങ്കേതികമായി ശാക്തീകരിച്ചിട്ടുണ്ട്. അങ്കണവാടി പ്രവര്ത്തകര്ക്കും സഹായികള്ക്കും സ്ഥാനക്കയറ്റത്തിനുള്ള അവസരങ്ങള് വര്ദ്ധിപ്പിച്ചു. അഞ്ച് വര്ഷത്തെ സേവന പരിചയമുള്ള സഹായികള്ക്കായി അങ്കണവാടി പ്രവര്ത്തകരുടെ 50 ശതമാനം ഒഴിവുകള് സംവരണം ചെയ്തു.
അഞ്ച് വര്ഷത്തെ സേവന പരിചയവും നിശ്ചിത യോഗ്യതയുമുള്ള അങ്കണവാടി പ്രവര്ത്തകര്ക്കായി 50 ശതമാനം സൂപ്പര്വൈസര് തസ്തികകള് സംവരണം ചെയ്തിട്ടുണ്ട്. പ്രതിവര്ഷം 20 ദിവസത്തെ വാര്ഷിക അവധിക്ക് അര്ഹതയുണ്ട്. 180 ദിവസത്തെ പ്രസവാവധിയും ഗര്ഭച്ഛിദ്രം സംഭവിച്ചാല് 45 ദിവസത്തെ ശമ്പളത്തോടുകൂടിയ അവധിയും അനുവദിച്ചിട്ടുണ്ട്. പെന്ഷന് യോഗ്യതയുള്ള അങ്കണവാടി പ്രവര്ത്തകര്ക്കും സഹായികള്ക്കും പ്രധാനമന്ത്രി ശ്രം യോഗി മന്ദാന് പെന്ഷന് പദ്ധതിയില് അംഗങ്ങളാക്കാന് സംസ്ഥാന സര്ക്കാരുകളോട് നിര്ദേശിച്ചിട്ടുണ്ട്.
പ്രധാന്മന്ത്രി ജീവന് ജ്യോതി ബീമ യോജന പ്രകാരം 18നും 50നുമിടെയുള്ളവര്ക്ക് രണ്ടു ലക്ഷം രൂപയുടെ ലൈഫ് ഇന്ഷുറന്സ് പരിരക്ഷ ഉറപ്പാക്കിയിട്ടുണ്ട്. 18-59 വയസുകാര്ക്ക് രണ്ട് ലക്ഷം രൂപയുടെ ഇന്ഷുറന്സ് പരിരക്ഷയുണ്ട്. വിരമിക്കല് തീയതി ഏപ്രില് 30 ആയി ഏകീകരിച്ചു. ആയുഷ്മാന് ഭാരത്, പ്രധാന്മന്ത്രി ജന് ആരോഗ്യ യോജന പ്രകാരം അഞ്ച് ലക്ഷം രൂപയുടെ ആരോഗ്യ പരിരക്ഷ ലഭ്യമാക്കി. അങ്കണവാടി ജീവനക്കാരുടെ ക്ഷേമമുറപ്പാക്കാന് നടപടികള് സ്വീകരിക്കണമെന്നാവശ്യപ്പെട്ടുള്ള ചോദ്യത്തിന് മറുപടി നല്കുകയായിരുന്നു മന്ത്രി.
