ന്യൂദല്‍ഹി: ജമ്മു കശ്മീര്‍ മുഖ്യമന്ത്രി ഒമര്‍ അബ്ദുള്ളയ്ക്ക് സുപ്രീം കോടതി വിവാഹമോചനം അനുവദിച്ചു. ഭാര്യ പായല്‍ അബ്ദുള്ളയുമായുള്ള എല്ലാ തര്‍ക്കങ്ങളും രമ്യമായി പരിഹരിച്ചതായി ഒമര്‍ അബ്ദുള്ളയ്‌ക്കു വേണ്ടി ഹാജരായ മുതിര്‍ന്ന അഭിഭാഷകന്‍ കപില്‍ സിബല്‍ കോടതിയെ അറിയിച്ചതിനെത്തുടര്‍ന്നാണിത്.
1994 സെപ്റ്റംബറില്‍ വിവാഹിതരായ ഇരുവരും വളരെക്കാലമായി വേര്‍പിരിഞ്ഞാണ് താമസിക്കുന്നത്. 2016 ഓഗസ്റ്റ് 30 ന് ഒമര്‍ വിവാഹമോചന ഹര്‍ജി നല്‍കിയെങ്കിലും വിവാഹം വീണ്ടെടുക്കാനാകാത്തവിധം തകര്‍ന്നുവെന്ന് തെളിയിക്കുന്നതില്‍ പരാജയപ്പെട്ടുവെന്ന് ചൂണ്ടിക്കാട്ടി കുടുംബ കോടതി ഹര്‍ജി തള്ളി. ഹൈക്കോടതിയും ഹര്‍ജി തള്ളിയതോടെയാണ് ഒമര്‍ സുപ്രീം കോടതിയെ സമീപിച്ചത്.
ഭരണഘടനയുടെ ആര്‍ട്ടിക്കിള്‍ 142 പ്രകാരമുള്ള ഇടപെടല്‍ ഒമര്‍ കോടതിയോട് ആവശ്യപ്പെട്ടു. യോജിച്ചുപോകാന്‍ കഴിയാത്തവിധം തകര്‍ന്ന വിവാഹങ്ങള്‍ വേര്‍പെടുത്താന്‍ സുപ്രീം കോടതി അധികാരം നല്‍കുന്ന വകുപ്പാണിത്.
2024 ആഗസ്റ്റില്‍, ഇരുവരും സൗഹാര്‍ദ്ദപരമായ ഒത്തുതീര്‍പ്പിന് സമ്മതിച്ചതോടെ സുപ്രീം കോടതി മധ്യസ്ഥതയ്‌ക്ക് റഫര്‍ ചെയ്തു. തുടര്‍ന്ന് ഇപ്പോള്‍ മറ്റുപ്രശ്‌നങ്ങളെല്ലാം പരിഹരിച്ചതായി കോടതിയെ അറിയിച്ചതോടെയാണ് വിവാഹമോചനം അനുവദിച്ചത്.
