പാരീസ്: ഫ്രാന്‍സിന്റെ തലസ്ഥാനമായ പാരീസില്‍ വീണ്ടും ഇസ്ലാമിക ഭീകരാക്രമണം. തിരക്കേറിയ ട്രാം സ്റ്റോപ്പിന് സമീപം നടന്ന ആക്രമണത്തില്‍ ഗര്‍ഭിണിയടക്കം മൂന്ന് സ്ത്രീകള്‍ക്ക് ഗുരുതരമായി പരിക്കേറ്റു. ആക്രമണത്തിനിടെ ‘അള്ളാഹുവിന്റെ നിര്‍ദേശപ്രകാരമാണ് ഇത് ചെയ്തത്’ എന്ന് പ്രതി ആവര്‍ത്തിച്ച് വിളിച്ചുപറഞ്ഞതായി ദൃക്‌സാക്ഷികള്‍ മൊഴി നല്‍കി. സംഭവത്തെ തുടര്‍ന്ന് സുരക്ഷാ ഏജന്‍സികള്‍ വ്യാപക അന്വേഷണം ആരംഭിച്ചു.
പോര്‍ട്ട് ഡി ക്ലിഷി മേഖലയിലാണ് ആക്രമണം നടന്നത്. രണ്ട് കത്തികളുമായി എത്തിയ പ്രതി യാതൊരു പ്രകോപനവുമില്ലാതെ സ്ത്രീകള്‍ക്ക് നേരെ ആക്രമണം നടത്തുകയായിരുന്നു. പരിക്കേറ്റവരില്‍ ഗര്‍ഭിണിയും ഉള്‍പ്പെട്ടിട്ടുണ്ട്. രണ്ട് സ്ത്രീകളുടെ നിലഗുരുതരമായിരുന്നെങ്കിലും ജീവന് ഭീഷണിയില്ലെന്നാണ് ആശുപത്രി അധികൃതര്‍ അറിയിച്ചത്.
ആക്രമണം തുടരുന്നതിനിടെ സമീപത്തുണ്ടായിരുന്ന യാത്രക്കാരാണ് അസാമാന്യ ധൈര്യം കാട്ടി പ്രതിയെ നേരിട്ടത്. ഒരാള്‍ സ്യൂട്ട്കേസ് എറിഞ്ഞ് പ്രതിയുടെ കൈയിലെ കത്തി തെറിപ്പിക്കുകയും തുടര്‍ന്ന് നിരവധി പേര്‍ ചേര്‍ന്ന് ഇയാളെ കീഴ്‌പ്പെടുത്തുകയും ചെയ്തു. ഇതിനിടയില്‍ സ്ഥലത്തെത്തിയ പോലീസ് പ്രതിയെ അറസ്റ്റ് ചെയ്തു.
അറസ്റ്റിലാകുമ്പോഴും പ്രതി ‘അള്ളാഹു അക്ബര്‍’ എന്ന് ആവര്‍ത്തിച്ച് വിളിച്ചിരുന്നതായി അന്വേഷണ ഉദ്യോഗസ്ഥര്‍ വ്യക്തമാക്കി. എന്നാല്‍ ആക്രമണത്തിന് പിന്നില്‍ തീവ്രവാദബന്ധമുണ്ടോയെന്നും, മാനസിക അസ്വാസ്ഥ്യമാണോ കാരണമെന്നും ഉള്‍പ്പെടെ എല്ലാ സാധ്യതകളും പരിശോധിച്ചുവരികയാണെന്ന് ഫ്രഞ്ച് ആഭ്യന്തര മന്ത്രാലയം അറിയിച്ചു.
സമീപകാലത്ത് യൂറോപ്പില്‍ വര്‍ധിച്ചുവരുന്ന കത്തിയാക്രമണങ്ങളുടെ പശ്ചാത്തലത്തില്‍ പാരീസിലെ ഈ സംഭവം വീണ്ടും സുരക്ഷാ ആശങ്കകള്‍ക്ക് ഇടയാക്കിയിരിക്കുകയാണ്.
ആക്രമണത്തിന്റെ യഥാര്‍ത്ഥ പ്രേരണ കണ്ടെത്താന്‍ ഭീകരവിരുദ്ധ അന്വേഷണ ഏജന്‍സികളും രംഗത്തുണ്ട്.
