തിരുവനന്തപുരം:മെഡിക്കല്‍ കോളേജിലെ മോര്‍ഫിംഗ് കേസില്‍ പ്രതിയെ കണ്ടെത്തിയതില്‍ നിര്‍ണായകമായത് എംബിബിഎസ് വിദ്യാര്‍ത്ഥികള്‍ നടത്തിയ അന്വേഷണം. റെഡ്ഡിറ്റ് അക്കൗണ്ടിലൂടെയാണ് വിദ്യാര്‍ത്ഥിനികളുടെ മോര്‍ഫിംഗ് ചിത്രങ്ങള്‍ ആദ്യം പ്രചരിച്ചത്. വിദ്യാര്‍ഥികളില്‍ ഒരാള്‍ ആ അക്കൗണ്ടുമായി നടത്തിയ ചാറ്റിലൂടെ ടെലിഗ്രാം അക്കൗണ്ട് കണ്ടെത്തി. സേവ് ചെയ്ത നമ്പറാണന്ന് തിരിച്ചറിഞ്ഞതിലൂടെ എബല്‍ അഗസ്റ്റിന്‍ ആണ് മോര്‍ഫിംഗിന് പിന്നിലെന്ന് മനസിലായി.സൈബര്‍ പൊലീസില്‍ പരാതി നല്‍കിയതിന് പിന്നാലെയാണ് വിദ്യാര്‍ത്ഥികള്‍ സ്വന്തം നിലയില്‍ അന്വേഷണം നടത്തിയത്.
മോര്‍ഫിംഗ് ചിത്രങ്ങള്‍ ആദ്യമായി പ്രചരിക്കാന്‍ തുടങ്ങിയത് ആറുമാസം മുമ്പാണ്.അതിനിടെ,സഹപാഠികളുടെ ചിത്രങ്ങള്‍ മോര്‍ഫ് ചെയ്ത സംഭവത്തില്‍ തിരുവനന്തപുരം മെഡിക്കല്‍ കോളേജിലെ എംബിബിഎസ് വിദ്യാര്‍ത്ഥി വയനാട് സ്വദേശി ഏബല്‍ അഗസ്റ്റിനെതിരെ വീണ്ടും പൊലീസ് കേസെടുത്തു.
കൂടുതല്‍ വിദ്യാര്‍ത്ഥിനികളുടെ പരാതിയെ തുടര്‍ന്ന് പൊലീസ് രണ്ട് എഫ്‌ഐആര്‍ കൂടി രജിസ്റ്റര്‍ ചെയ്തു. പരാതികള്‍ നിരവധി വന്നിട്ടും പൊലീസ് വീണ്ടും കേസെടുക്കുന്നില്ലെന്ന് ആരോപിച്ച് കഴിഞ്ഞ രാത്രി പൊലീസ് സ്റ്റേഷനില്‍ വിദ്യാര്‍ത്ഥികള്‍ പ്രതിഷേധിച്ചിരുന്നു. ആദ്യമെടുത്ത കേസില്‍ പ്രതി ഏബലിന് ഇന്നലെ തന്നെ ജാമ്യം ലഭിച്ചിരുന്നു.
സഹപാഠികളുടെയും സീനിയറായ വിദ്യാര്‍ത്ഥിനികളുടെയും ചിത്രങ്ങള്‍ മോര്‍ഫ് ചെയ്ത് ഇന്‍സ്റ്റഗ്രാമിലൂടെ പ്രചരിപ്പിച്ചുവെന്നാണ് ഏബല്‍ അഗസ്റ്റിനെതിരായ കേസ്.
