ന്യൂദല്ഹി: മത്സരപരീക്ഷകളുടെ സുതാര്യത, സ്ഥാപനപരമായ പരിഷ്കാരങ്ങള് എന്നിവ സമഗ്രമായി വിലയിരുത്താന് കേന്ദ്രസര്ക്കാര് ഉന്നതതല സമിതി രൂപീകരിക്കണമെന്ന് എബിവിപി. പരീക്ഷാ സമ്പ്രദായത്തെ കൂടുതല് വിശ്വാസ്യവും ഉത്തരവാദിത്തമുള്ളതുമാക്കുന്നതിന് ഈ സമിതി വ്യക്തവും സമയബന്ധിതവുമായ ശിപാര്ശകള് സമര്പ്പിക്കണമെന്നും എബിവിപി ആവശ്യപ്പെട്ടു.
വിദ്യാര്ത്ഥികളുടെ യഥാര്ത്ഥ പ്രശ്നങ്ങളും ന്യായമായ ആവശ്യങ്ങളും ഇടുങ്ങിയ രാഷ്ട്രീയ താത്പര്യങ്ങള്ക്കോ, രാജ്യവിരുദ്ധ അജണ്ടകള്ക്കോ, രാജ്യത്ത് അസ്ഥിരതയും സംഘര്ഷവും സൃഷ്ടിക്കുന്നതിനോ വേണ്ടി ചൂഷണം ചെയ്യപ്പെടരുതെന്ന് എബിവിപി ചൂണ്ടിക്കാട്ടി. ഇത്തരം ദുരുദ്ദേശപരമായ ശ്രമങ്ങള്, രാജ്യത്തിന്റെ ആഭ്യന്തര സ്ഥിരത, സമഗ്രത, പരമാധികാരം, ഐക്യം, സാമൂഹിക സൗഹാര്ദം എന്നിവ തകര്ക്കാന് ദീര്ഘകാലമായി അവസരം കാത്തിരിക്കുന്ന ഡീപ്പ് സ്റ്റേറ്റ് പോലെയുള്ള രാജ്യവിരുദ്ധ ശൃംഖലകള്ക്ക് ശക്തിപകരുകയേയുള്ളൂ. രാജ്യസ്നേഹികളും ജനാധിപത്യ മൂല്യങ്ങളില് വിശ്വസിക്കുന്നവരുമായ ഭാരതത്തിലെ വിദ്യാര്ത്ഥി സമൂഹത്തെ വഴിതെറ്റിക്കലുകള്ക്കോ, ബാഹ്യസ്വാധീനങ്ങള്ക്കോ, രാജ്യവിരുദ്ധ ഗൂഢാലോചനകള്ക്കോ ഉള്ള കരുക്കളാകാന് അനുവദിക്കില്ല. രാജ്യവിരുദ്ധ ഗൂഢാലോചനകള്ക്കെതിരെ വിദ്യാര്ത്ഥികളും യുവാക്കളും രക്ഷിതാക്കളും അദ്ധ്യാപകരും സമൂഹത്തിലെ എല്ലാ വിഭാഗവും ജാഗ്രത പാലിക്കണം. നീറ്റ്-യുജിയുമായി ബന്ധപ്പെട്ട് രാജ്യതലസ്ഥാനത്തുണ്ടായ അക്രമസമരത്തെ എബിവിപി അപലപിച്ചു. വിദ്യാര്ത്ഥി പ്രക്ഷോഭത്തിന്റെ മറവില്, സമാധാനം തകര്ക്കാന് നിക്ഷിപ്ത താത്പര്യക്കാരും സാമൂഹിക വിരുദ്ധഘടകങ്ങളും ബോധപൂര്വം അക്രമം അഴിച്ചുവിടുകയായിരുന്നുവെന്ന് വേണം കരുതാനെന്നും എബിവിപി അഭിപ്രായപ്പെട്ടു.
വിദ്യാര്ത്ഥികളുടെ ന്യായമായ ആവശ്യങ്ങളെ ഇടുങ്ങിയ രാഷ്ട്രീയ താത്പര്യങ്ങളിലേക്ക് തിരിച്ചുവിടാനുള്ള ഏതൊരു ശ്രമവും കടുത്ത അനീതിയാണെന്ന് എബിവിപി ദേശീയ ജനറല് സെക്രട്ടറി ഡോ. വീരേന്ദ്ര സിങ് സോളങ്കി പ്രസ്താവനയില് പറഞ്ഞു.
