കൊല്ലം: വികസിത് ഭാരത് ഗ്യാരണ്ടി ഫോര് റോസ്ഗാര് ആന്ഡ് ആജീവികാ മിഷന് (ഗ്രാമീണ്) പദ്ധതിയില് ഗ്രാമീണ തൊഴിലാളികള്ക്ക് തൊഴില് ലഭ്യത ഉറപ്പാക്കുന്നതിനായി പുതിയ പ്രവൃത്തികള് ഏറ്റെടുത്ത് നടപ്പാക്കാന് സംസ്ഥാന മിഷന് ഡയറക്ടറുടെ നിര്ദേശം.
ഗ്രാമപഞ്ചായത്തുകളില് നിലവില് തൊഴില് നല്കാന് ആവശ്യമായ പ്രവൃത്തികള് ഇല്ലാത്ത സാഹചര്യത്തിലാണ് നടപടി. മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയുടെ വാര്ഷിക കര്മ്മ പദ്ധതിയില് ഉള്പ്പെട്ടിട്ടുള്ളതും വിബിജി റാംജി നിയമപ്രകാരം അനുവദനീയവുമായ പ്രവൃത്തികള് ഏറ്റെടുത്ത് നടപ്പാക്കാമെന്നാണ് എല്ലാ ജില്ലാ ജോയിന്റ് പ്രോഗ്രാം കോ-ഓര്ഡിനേറ്റര്മാര്ക്കും സംസ്ഥാന മിഷന് ഡയറക്ടര് നിര്ദേശം നല്കിയത്. വിബി-ജി റാം ജി പദ്ധതിയില് സാങ്കേതികാനുമതി നല്കുന്നതിനുള്ള പ്രത്യേക ഉത്തരവ് നിലവില് വന്നിട്ടില്ലാത്തതിനാല്, പുതിയ ഉത്തരവ് വരുന്നതുവരെ പഴയ മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയില് നിലവിലുള്ള നടപടിക്രമം തന്നെ തുടരാമെന്നും മിഷന് ഡയറക്ടര് പറഞ്ഞു.
അതേസമയം വിബി-ജി റാം ജിയില് പ്രവൃത്തികള് ഏറ്റെടുക്കുന്ന യുക്തധാര പോര്ട്ടലില് ഗ്രാമപഞ്ചായത്തുകള് തയാറാക്കുന്ന പദ്ധതികള് ആദ്യം ബ്ലോക്ക് പഞ്ചായത്ത് തലത്തിലെ ജിഎഎസ് ലോഗിനിലൂടെ അംഗീകാരം നേടിയശേഷം ജില്ലാ ജിയോ നോഡല് ഓഫീസര് ലോഗിനിലൂടെ അന്തിമ അംഗീകാരം ലഭ്യമാക്കണമെന്നും നിര്ദേശിച്ചിട്ടുണ്ട്.
കേന്ദ്ര ഗ്രാമവികസന മന്ത്രാലയം മാനേജ്മെന്റ് ഇന്ഫര്മേഷന് സിസ്റ്റത്തില് (എം.ഐ.എസ്) വരുത്തിയ മാറ്റങ്ങള്ക്കനുസൃതമായി പദ്ധതികള് പരിശോധിച്ച ശേഷമായിരിക്കും ജില്ലാ തലത്തില് പദ്ധതികള്ക്ക് അംഗീകാരം നല്കുക. ഈ നടപടി തൊഴിലാളികള്ക്ക് തൊഴില്ദിനങ്ങള് തടസമില്ലാതെ ലഭ്യമാക്കുന്നതിനും, പുതിയ വിബിജി റാംജി പദ്ധതിയുടെ സുഗമമായ നടപ്പാക്കലിനും സഹായകമാകുമെന്നും വിലയിരുത്തപ്പെടുന്നു.
ജന്മഭൂമി ഓണ്ലൈന്