കോട്ടയം: ഒളിച്ചോടുന്ന പ്രശ്‌നമില്ലെന്നും അവിശ്വാസപ്രമേയത്തെ നേരിടാന്‍ തന്നെയാണ് തീരുമാനമെന്നും ഏഷ്യയിലെത്തന്നെ പ്രായംകുറഞ്ഞ നഗരസഭാ ചെയര്‍പേഴ്‌സനെന്ന് വിശേഷിപ്പിക്കപ്പെട്ട ദിയ ബിനു പുളിക്കക്കണ്ടം വ്യക്തമാക്കി. അവിശ്വാസപ്രമേയം വരുംമുമ്പേ രാജിവയ്‌ക്കുമെന്ന പ്രചാരണത്തോടു പ്രതികരിക്കുകയായിരുന്നു പാലാ നഗരസഭാധ്യക്ഷ.
താന്‍ സ്വതന്ത്രമുന്നണിയുടെ ചെയര്‍പേഴ്‌സണല്ല, മറിച്ച് യു.ഡി.എഫിന്റെ ചെയര്‍പേഴ്‌സണാണെന്ന് ദിയ ആവര്‍ത്തിച്ചു. അവിശ്വാസം കൊണ്ടുവന്നിട്ടുള്ളത് ഇടതുമുന്നണിയാണ്. അതില്‍ തീരുമാനം എടുക്കേണ്ടത് യു.ഡി.എഫ് നേതൃത്വമാണ്.
ദിയക്കെതിരെ ഇടതുമുന്നണിയുടെ അവിശ്വാസപ്രമേയം 21ന് പരിഗണിക്കാനിരിക്കയാണ്. ദിയയെ അധികാരത്തിലേറ്റിയ കോണ്‍ഗ്രസ് കൗണ്‍സിലര്‍മാര്‍ ഇടതു പ്രമേയത്തെ പിന്തുണയ്‌ക്കുമെന്നാണ് പ്രഖ്യാപിച്ചിരിക്കുന്നത്. ഒത്തുതീര്‍പ്പുണ്ടായില്ലെങ്കില്‍ അവിശ്വാസപ്രമേയം പാസാകും. കോണ്‍ഗ്രസ് കാമ്പിലെ കൗണ്‍സിലറായ ബിജു മാത്യൂസും കോണ്‍ഗ്രസ് വിമത മായാ രാഹുലും നേതൃത്വം നല്‍കുന്ന അട്ടിമറിശ്രമം വിജയിച്ചാല്‍ അത് ഇടതു മുന്നണിക്കും കേരള കോണ്‍ഗ്രസ് മാണി വിഭാഗത്തിനും വലിയ നേട്ടമാകും. കോണ്‍ഗ്രസ് നിയോജക മണ്ഡലം പ്രസിഡന്‌റിനെ ദയനീയമായി പരാജയപ്പെടുത്തി കൗണ്‍സിലറായ മായാ രാഹുലിനെ ചെയര്‍പേഴ്‌സണ്‍ ആക്കാമെന്ന ധാരണയിലാണ് ഇടതു പക്ഷവും കോണ്‍ഗ്രസും ഇപ്പോള്‍ നാണം കെട്ട് കൈകോര്‍ക്കുന്നത്.
