ന്യൂദല്ഹി: സിപിഎം ജനറല് സെക്രട്ടറി എം.എ. ബേബിയും സിപിഐ ജനറല് സെക്രട്ടറി ഡി. രാജ ഉള്പ്പെടെ ഇടത് നേതാക്കളും പങ്കെടുത്ത ചൈനീസ് എംബസിയിലെ സെമിനാര് വിവാദത്തില്. സന്ദര്ശനത്തിന് പിന്നാലെയുള്ള സിജെപിയുടെ സമരത്തിന് പിന്തുണ നല്കലും വനിതാ ബില് സമര പ്രഖ്യാപനവും സംശയനിഴലില്.
ജൂലൈ 9 ന് ചൈനീസ് കമ്മ്യൂണിസ്റ്റ് പാര്ട്ടിയുടെ രൂപീകരണത്തിന്റെ 105-ാം വാര്ഷികത്തോടനുബന്ധിച്ചാണ് ന്യൂദല്ഹിയിലെ ചൈനീസ് എംബസി സെമിനാര് സംഘടിപ്പിച്ചത്. ഇതിലാണ് സിപിഎം ജനറല് സെക്രട്ടറി എം. എ. ബേബി, പോളിറ്റ് ബ്യൂറോ അംഗം ആര്. അരുണ് കുമാര്, സിപിഐ ജനറല് സെക്രട്ടറി ഡി. രാജ, എഐഎഫ്ബി ജനറല് സെക്രട്ടറി ജി. ദേവരാജന്, സിപിഐ (എംഎല്) ലിബറേഷന് സെന്ട്രല് കമ്മിറ്റി അംഗം രാജീവ് ദിമ്രി തുടങ്ങിയവര് പങ്കെടുത്തത്. അതിനുശേഷമാണ് സിപിഎമ്മും ഇടതുപാര്ട്ടികളും പാറ്റകള് നടത്തുന്ന സമരത്തിന് പിന്തുണ നല്കാന് തീരുമാനിച്ചത്. ഇക്കാര്യം സിപിഎം കേന്ദ്ര കമ്മറ്റിക്ക് ശേഷം എം.എ. ബേബി പ്രഖ്യാപിക്കുകയും ചെയ്തു. മാത്രമല്ല പാര്ലമെന്റില് വനിതാ ബില്ലിനെതിരെ നിലപാട് എടുത്തശേഷം വനിതാ സംവരണ ബില് നടപ്പിലാക്കാണമെന്ന ആവശ്യവുമായി ഇടത് വനിതാ സംഘടനകളുടെ സമരപ്രഖ്യാപനവും നടത്തി. കോക്രോച്ച് സമരത്തിന് വിദേശ സഹായം ലഭ്യമാകുന്നുണ്ടെന്ന് തുടക്കം മുതല് ആരോപണമുണ്ട്. ക്രോക്രോച്ച് സമരം തുടങ്ങിയപ്പോള് പരസ്യമായി പിന്തുണ നല്കാതിരുന്ന ഇടത് പാര്ട്ടികള്, എംബസി സന്ദര്ശനത്തിന് ശേഷം പെട്ടന്നാണ് പിന്തുണ പ്രഖ്യാപിച്ചത്. ഇതാണ് ദുരൂഹത ഉയര്ത്തുന്നത്.
ഭാരതവും ചൈനയും തമ്മില് അതിര്ത്തിയിലെ ഗാല്വാന് താഴ് വരയിലെ സംഭവങ്ങള്ക്ക് ശേഷം ഉടലെടുത്ത പ്രത്യേകസാഹചര്യം തുടരുന്നതിനിടയിലാണ് ഇടത് പാര്ട്ടികളുടെ സന്ദര്ശനം. രാജ്യം നയതന്ത്രപരമായും സൈനികപരമായും അതീവ ജാഗ്രത പുലര്ത്തുന്ന ഘട്ടത്തില് ഉത്തരവാദപ്പെട്ട രാഷ്ട്രീയ നേതാക്കള് ഇത്തരം ചടങ്ങുകളില് പങ്കെടുക്കുന്നത് തെറ്റായ സന്ദേശം നല്കുമെന്നും രാജ്യത്തിന്റെ ഔദ്യോഗിക നയതന്ത്ര നിലപാടുകളെ ദുര്ബലപ്പെടുത്തുമെന്നും ബിജെപിയുള്പ്പെടെ വിമര്ശിച്ചിട്ടുണ്ട്.
എന്നാല് പൂര്ണ നയതന്ത്ര ബന്ധമുള്ള ഒരു രാജ്യത്തിന്റെ എംബസിയില് നടക്കുന്ന ഔദ്യോഗിക ചടങ്ങില് പങ്കെടുക്കുന്നത് നിയമവിരുദ്ധമല്ലെന്നും മറ്റ് രാഷ്ട്രീയ പാര്ട്ടികളുടെ നേതാക്കളും വിദേശ നയതന്ത്രജ്ഞരുമായി കൂടിക്കാഴ്ചകള് നടത്താറുണ്ടെന്നുമാണ് എം.എ. ബേബിയുടെ ന്യായീകരണം. അതേസമയം വിദേശ എംബസികള് നടത്തുന്ന ചടങ്ങുകളിലോ സെമിനാറുകളിലോ രാഷ്ട്രീയ നേതാക്കള് പങ്കെടുക്കുമ്പോള് വിദേശകാര്യമന്ത്രാലയത്തിന്റെ അനുമതി ആവശ്യമാണ്. ഇതടക്കം ഉണ്ടായിരുന്നോ എന്ന കാര്യത്തിലും സംശയം ഉയര്ന്നിട്ടുണ്ട്.
