മെക്സിക്കോ സിറ്റി: മെക്സിക്കോയിൽ വൻ ഭൂചലനം. സുനാമി മുന്നറിയിപ്പുമുണ്ട്. ചിയാപ്പാസിൽ അനുഭവപ്പെട്ടത് റിക്ടർ സ്കെയിലിൽ 7.4 തീവ്രത രേഖപ്പെടുത്തിയ ചലനം. മെക്സിക്കോയ്ക്ക് പുറമെ അയൽരാജ്യങ്ങളായ എൽ സാൽവദോർ, ഗ്വാട്ടിമാല എന്നിവിടങ്ങളിലും പ്രകമ്പനം ഉണ്ടായി. ഗ്വാട്ടിമാല സിറ്റിയിൽ നിന്ന് ഉൾപ്പെടെ ജനങ്ങളെ കൂട്ടമായി മാറ്റി സുരക്ഷ ഒരുക്കിയതായി വാർത്താ ഏജൻസികൾ റിപ്പോർട്ടു ചെയ്തു.
മെക്സിക്കൻ നഗരമായ പ്യൂർട്ടോ മഡെറോയ്ക്ക് സമീപം ഭൂമിക്കടിയിൽ 10 കിലോമീറ്റർ ആഴത്തിലാണ് ഭൂചലനത്തിന്റെ പ്രഭവകേന്ദ്രമെന്ന് അമേരിക്കൻ ജിയോളജിക്കൽ സർവേ റിപ്പോർട്ടുകൾ പറയുന്നു. കെട്ടിടങ്ങൾ ശക്തമായി കുലുങ്ങി ഷെൽഫുകളിൽ നിന്ന് വസ്തുക്കൾ വീഴുന്ന ദൃശ്യങ്ങൾ സാമൂഹികമാധ്യമങ്ങളിൽ പ്രചരിക്കുന്നുണ്ട്. വൻനാശനഷ്ടങ്ങളോ ആളപായമോ ഇതുവരെ ഔദ്യോഗികമായി റിപ്പോർട്ട് ചെയ്തിട്ടില്ല. കൂടുതൽ റിപ്പോർട്ടുകൾക്ക് കാത്തിരിക്കുകയാണ്.
