ന്യൂഡൽഹി: ഓസ്ട്രേലിയയിൽ അടുത്തിടെ നടന്ന പ്രധാനമന്ത്രി നരേന്ദ്ര മോദിയുടെ കമ്മ്യൂണിറ്റി സ്വീകരണ പരിപാടിയായ ‘മെൽബൺ മീറ്റ്സ് മോദി’യിൽ പങ്കെടുത്തവർ പണം വാങ്ങി എത്തിയവരാണെന്ന (Paid crowd) ആരോപണത്തിൽ കോൺഗ്രസ് നേതാക്കളായ രാഹുൽ ഗാന്ധിക്കും കോൺഗ്രസ് അധ്യക്ഷൻ മല്ലികാർജുൻ ഖാർഗെയ്ക്കും എതിരെ പരസ്യ കത്ത് നൽകി സംഘാടകർ. ആരോപണങ്ങൾ പരസ്യമായി പിൻവലിക്കണമെന്നും മാപ്പ് പറയണമെന്നും ആവശ്യപ്പെട്ടാണ് സംഘാടകർ തുറന്ന കത്തെഴുതിയിരിക്കുന്നത്. ഈ ആരോപണങ്ങൾ പൂർണ്ണമായും അസത്യവും അങ്ങേയറ്റം അപകീർത്തികരവുമാണെന്ന് വിശേഷിപ്പിച്ച സംഘാടകർ, മെൽബണിലേക്ക് യാത്ര ചെയ്തവർ സ്വന്തം ഇഷ്ടപ്രകാരമാണ് വന്നതെന്നും വ്യക്തിഗത സംഭാവനകളിലൂടെയോ കമ്മ്യൂണിറ്റി പിന്തുണയുള്ള ക്രമീകരണങ്ങളിലൂടെയോ ആണ് യാത്രയ്ക്ക് പണം കണ്ടെത്തിയതെന്നും വ്യക്തമാക്കി.
മെൽബണിലെ മാർവൽ സ്റ്റേഡിയത്തിൽ ജൂലൈ 9-ന് നടന്ന പ്രധാനമന്ത്രി നരേന്ദ്ര മോദിയുടെ പരിപാടിക്കായി സിഡ്നിയിൽ നിന്ന് മെൽബണിലേക്ക് ‘മോദി എയർവേസ്’ ചാർട്ടർ വിമാനം ഏകോപിപ്പിച്ച കമ്മ്യൂണിറ്റി സംഘാടകരാണ് കത്ത് പുറത്തുവിട്ടത്. പരിപാടിയിൽ പങ്കെടുത്തവർക്ക് ബിജെപിയോ ഇന്ത്യൻ സർക്കാരോ ധനസഹായം നൽകിയിട്ടുണ്ടെന്ന ആരോപണങ്ങളെ ഇവർ പൂർണ്ണമായി തള്ളിക്കളഞ്ഞു.
ഏകദേശം 30,000-ത്തോളം ആളുകൾ പങ്കെടുത്ത ഈ പരിപാടിക്ക് പിന്നാലെ, ഈ ജനപിന്തുണ കൃത്രിമമായി സൃഷ്ടിച്ചതാണെന്ന് (Manufactured) പവൻ ഖേര ഉൾപ്പെടെയുള്ള കോൺഗ്രസ് നേതാക്കൾ ആരോപിച്ചിരുന്നു. പരിപാടിയിൽ പങ്കെടുത്തവർക്ക് അവിടെയെത്താൻ പണം നൽകിയിട്ടുണ്ടെന്നും യാത്രയ്ക്കായി ചാർട്ടർ വിമാനങ്ങൾ ഉൾപ്പെടെ ക്രമീകരിച്ചിട്ടുണ്ടെന്നും അവകാശപ്പെടുന്ന ഒരു വിദേശ മാധ്യമ റിപ്പോർട്ടും അദ്ദേഹം പങ്കുവെച്ചിരുന്നു.കോൺഗ്രസ് ഭാരവാഹികളും പാർട്ടിയുമായി ബന്ധപ്പെട്ട വ്യക്തികളും നടത്തിയ ഇത്തരം പരാമർശങ്ങൾ പരിപാടിയിൽ പങ്കെടുത്ത ആയിരക്കണക്കിന് ഇന്ത്യൻ-ഓസ്ട്രേലിയക്കാരുടെ സത്യസന്ധതയെ അനാവശ്യമായി ചോദ്യം ചെയ്യുന്നതാണെന്നും സംഘാടകർ കൂട്ടിച്ചേർത്തു.
ഓസ്ട്രേലിയയിലെ ഇന്ത്യൻ പ്രവാസികൾ വ്യത്യസ്ത രാഷ്ട്രീയ കാഴ്ചപ്പാടുള്ളവരാണെന്നും ഏതെങ്കിലും ഒരു രാഷ്ട്രീയ പാർട്ടിയോട് മാത്രം ആഭിമുഖ്യമുള്ളവരല്ലെന്നും കമ്മ്യൂണിറ്റി നേതാക്കൾ എടുത്തുപറഞ്ഞു. ചാർട്ടർ ഫ്ലൈറ്റ് ക്രമീകരിക്കുന്നതിന് പിന്നിലെ സന്നദ്ധപ്രവർത്തനങ്ങളെക്കുറിച്ചും സംഘാടകർ വിശദീകരിച്ചു. മാസങ്ങളുടെ ആസൂത്രണം, ചർച്ചകൾ, യാത്രക്കാരുടെ ഏകോപനം, ഭരണപരമായ ജോലികൾ എന്നിവ ആവശ്യമായി വന്ന ഒരു വലിയ ദൗത്യമായിരുന്നു ഇതെന്ന് അവർ ചൂണ്ടിക്കാട്ടി.കത്തിൽ കോൺഗ്രസ് നേതൃത്വത്തിന് മുന്നിൽ മൂന്ന് ആവശ്യങ്ങളാണ് സംഘാടകർ ഉന്നയിച്ചിരിക്കുന്നത്:
ചാർട്ടർ ഫ്ലൈറ്റിന് ബിജെപിയോ ഭാരത സർക്കാരോ ധനസഹായം നൽകിയിട്ടില്ലെന്ന് പരസ്യമായി സമ്മതിക്കുക, യാത്രക്കാർ പണം വാങ്ങി എത്തിയവരാണെന്ന ആരോപണങ്ങൾ പിൻവലിക്കുക, സംഘാടകരോടും സന്നദ്ധപ്രവർത്തകരോടും യാത്രക്കാരോടും ഇന്ത്യൻ-ഓസ്ട്രേലിയൻ സമൂഹത്തോടും മാപ്പ് പറയുക എന്നിവയാണവ. കോൺഗ്രസിന് നരേന്ദ്ര മോദിയെയും ബിജെപിയെയും വിമർശിക്കാൻ എല്ലാ അവകാശവുമുണ്ടെങ്കിലും, പരിപാടിയിൽ പങ്കെടുക്കാൻ തീരുമാനിച്ച പ്രവാസി സമൂഹത്തിന്റെ തിരഞ്ഞെടുപ്പിനെ അപകീർത്തിപ്പെടുത്തരുതെന്ന് സംഘാടകർ ആവശ്യപ്പെട്ടു.
