ഹൈദരാബാദ്: ബ്രിക്സ് രാജ്യങ്ങളിലെ തൊഴിലാളി സംഘടന സമ്മേളനം നാളെ മുതല് 16 വരെ ഹൈദരാബാദില് ചേരും. ബിഎംഎസ് ആതിഥേയത്വം വഹിക്കുന്ന സമ്മേളനത്തില് ഭാരതത്തിന് പുറമെ ബ്രസീല്, റഷ്യ, ചൈന, സൗത്ത് ആഫ്രിക്ക എന്നീ ബ്രിക്സ് രാജ്യങ്ങളില് നിന്ന് ഇറാന്, സൗദി അറേബ്യ, യുഎഇ, ഈജിപ്ത്, എത്യോപ്യ, ഇന്തോനേഷ്യ, നൈജീരിയ, തായ്ലന്ഡ്, ഉഗാണ്ട, ഉസ്ബകിസ്ഥാന്, വിയറ്റ്നാം, ബൊളീവിയ, ബലാറസ്, ക്യൂബ, കസാഖിസ്ഥാന്, മലേഷ്യ എന്നീ സൗഹൃദ രാജ്യങ്ങളില് നിന്നുമുള്ള തൊഴിലാളി സംഘടനാ പ്രതിനിധികളും പങ്കെടുക്കും.
14ന് രാവിലെ 11.30ന് മാരിയറ്റ് ഹോട്ടലില് നടക്കുന്ന ചടങ്ങ് കേന്ദ്ര തൊഴില് വകുപ്പ് മന്ത്രി ഡോ. മന്സൂഖ് മാണ്ഡവ്യ ഉദ്ഘാടനം ചെയ്യും. തെലങ്കാന ഗവര്ണര് ശിവപ്രതാപ് ശുക്ല, സംസ്ഥാന തൊഴില് വകുപ്പ് മന്ത്രി വിവേക് വെങ്കിടേശ്, റിട്ട. ജസ്റ്റിസ് എന്. നഗരേഷ്, ബിഎംഎസ് അഖിലേന്ത്യ പ്രസിഡന്റ് എസ്. മല്ലേശം, ബിഎംഎസ് മുന് അഖിലേന്ത്യ പ്രസിഡന്റ് അഡ്വ. സി.കെ. സജി നാരായണന് തുടങ്ങിയവര് ചടങ്ങില് പങ്കെടുക്കും.
വൈകിട്ട് അഞ്ചിന് തൊഴിലാളി സംഗമം മുന് ഗവര്ണറും മുന്കേന്ദ്ര തൊഴില് വകുപ്പ് മന്ത്രിയുമായ ബന്ദാരു ദത്താത്രേയ ഉദ്ഘാടനം ചെയ്യും. സമ്മേളനത്തില് അന്താരാഷ്ട്ര തൊഴില് ബന്ധങ്ങള്, തൊഴില് സാഹചര്യങ്ങളിലെ മാറ്റം, എഐയുടെ ഉപയോഗം, അടിസ്ഥാന തൊഴില് മേഖലയിലെ സമഗ്രക്ഷേമം, തൊഴില് പ്രശ്നങ്ങള്, സാങ്കേതികവിദ്യ പരിജ്ഞാനം തുടങ്ങിയ വിഷയങ്ങളില് ചര്ച്ചകളും നയരൂപീകരണവും നടക്കും.
