കണ്ണൂര്: തലശേരി വ്യാപാരി വ്യവസായി വെല്ഫയര് സഹകരണ സംഘം തട്ടിപ്പില് സെക്രട്ടറി ജോജിഷിനെ ഒന്നാം പ്രതിയാക്കി കേസെടുത്ത് പൊലീസ്.സംഘം ഭരണാസമിതി രണ്ടാം പ്രതി. പൊലീസിന് ലഭിച്ച മൂന്ന് പരാതികളില് മാത്രം നഷ്ടമായത് ഒരു കോടിയിലേറെ രൂപ. നിക്ഷേപം സ്വീകരിച്ച് സെക്രട്ടറി മുങ്ങിയെന്നാണ് പരാതി.
ഉയര്ന്ന പലിശ വാഗ്ദാനം ചെയ്താണ് നിക്ഷേപം സ്വീകരിച്ചത്.തിരുവങ്ങാട് മഞ്ഞോടി സ്വദേശി കെസി ജലജയ്ക്ക് 55 ലക്ഷത്തി 70,000 രൂപ,മുഴുപ്പിലങ്ങാട് സ്വദേശി അനുകൂലിന് 37 ലക്ഷത്തി 95,000 രൂപ, മുഴുപ്പിലങ്ങാട് സ്വദേശി ജഷീനയ്ക്ക് 17 ലക്ഷം രൂപ എന്നിങ്ങനെയാണ് കിട്ടാനുള്ളത്.ഈ മൂന്ന് പേരുടെയും പരാതിയില് തലശേരി പൊലീസ് വെവ്വേറെ കേസുകള് രജിസ്റ്റര് ചെയ്തു.
നിക്ഷേപിച്ച പണം തിരിച്ചെടുക്കാന് ചിലര് ഓഫീസിലെത്തിയപ്പോഴാണ് തട്ടിപ്പ് പുറത്ത് വന്നത്. പണം തിരികെ കിട്ടാത്തതിനെത്തുടര്ന്ന് ഇവര് ഭരണ സമിതി അംഗങ്ങളെ വിവരം അറിയിച്ചു.അപ്പോഴാണ് സെക്രട്ടറി സ്വന്തം നിലയില് നിക്ഷേപം സ്വീകരിച്ച് വെട്ടിപ്പ് നടത്തിയതായി വ്യക്തമായത്. കൂടുതല് പേര് തട്ടിപ്പിന് ഇരയായിട്ടുണ്ടെന്ന നിഗമനത്തില് അതും പൊലീസ് അന്വേഷിക്കുന്നുണ്ട്.
