ന്യൂയോര്ക്ക്: ലോകകപ്പ് പ്രീ ക്വാര്ട്ടറില് അമേരിക്കയെ പരാജയപ്പെടുത്തി ക്വാര്ട്ടര് ഫൈനലിലേക്ക് മുന്നേറിയതിന് പിന്നാലെ ഫിഫയെ ട്രോളി ബെല്ജിയം. മത്സരത്തിന് പിന്നാലെ തങ്ങളുടെ ഔദ്യോഗിക സോഷ്യല് മീഡിയ അക്കൗണ്ടില് ബെല്ജിയം ടീം ഒരു ചിത്രം പങ്കുവെച്ചു. വന്യമായ വിജയാഘോഷങ്ങളുടെ ചിത്രത്തിനൊപ്പം ‘Overturn This’ (ഇതുകൂടി ഒന്നു തിരുത്തിയെഴുതൂ) എന്ന രണ്ട് വാക്കുകളുള്ള ക്യാപ്ഷന് നല്കിയാണ് അവര് ഫിഫയെയും ഒരുപോലെ പരിഹസിച്ചത്. അമേരിക്കന് താരം ഫോളാരിന് ബലോഗന്റെ റെഡ് കാര്ഡ് വിവാദത്തില് അമേരിക്കക്ക് അനുകൂലമായി തീരുമാനമെടുത്ത ഫിഫയെയും അമേരിക്കന് പ്രസിഡന്റ് ഡൊണാള്ഡ് ട്രംപിനെയും പരിഹസിച്ചുകൊണ്ടായിരുന്നു ബെല്ജിയത്തിന്റെ മറുപടി.
റൗണ്ട് ഓഫ് 32 മത്സരത്തില് ബോസ്നിയ-ഹെര്സഗോവിന താരം താരിഖ് മുഹറെമോവിച്ചിനെ ഫൗള് ചെയ്തതിന് യുഎസ് സ്ട്രൈക്കര് ഫോളാരിന് ബലോഗണിന് റെഡ് കാര്ഡ് ലഭിച്ചിരുന്നു. നിയമപ്രകാരം അടുത്ത മത്സരത്തില് നിന്ന് താരത്തിന് വിലക്ക് നേരിടേണ്ടതായിരുന്നു. എന്നാല്, പ്രീ-ക്വാര്ട്ടറില് ബെല്ജിയത്തെ നേരിടുന്നതിന് തൊട്ടുമുന്പ് ഫിഫ അപ്രതീക്ഷിതമായി ഈ വിലക്ക് റദ്ദാക്കി. ഈ വിവാദപരമായ തീരുമാനത്തിന് പിന്നില് അമേരിക്കന് പ്രസിഡന്റ് ഡൊണാള്ഡ് ട്രംപിന്റെ രാഷ്ട്രീയ ഇടപെടലുണ്ടായിരുന്നു എന്ന വാര്ത്തകള് പുറത്തുവന്നതോടെ ഫുട്ബോള് ലോകം ഞെട്ടി. താന് ഈ വിഷയത്തില് ഫിഫ പ്രസിഡന്റിനോട് സംസാരിച്ചിരുന്നുവെന്നും ട്രംപ് വ്യക്തമാക്കിയിരുന്നു. ഫിഫയുടെ ഈ നടപടിക്കെതിരെ ബെല്ജിയം ഫുട്ബോള് അസോസിയേഷനും യൂറോപ്യന് ഫുട്ബോള് സംഘടനയായ യുവേഫയും രംഗത്തെത്തിയിരുന്നു. എന്നാല്, അനീതിക്ക് ബെല്ജിയം ഗ്രൗണ്ടില് തന്നെ മറുപടി നല്കി.
