ന്യൂദല്ഹി: പ്രവാചകന് മുഹമ്മദ് നബിയെക്കുറിച്ച് ഭാരതീയ ജനതാ പാര്ട്ടി ന്യൂനപക്ഷ മോര്ച്ച നേതാവ് നാസിയ ഇലാഹി ഖാന് നടത്തിയ ചില പരാമര്ശങ്ങള്ക്കെതിരായ പൊതുതാത്പര്യഹര്ജി സുപ്രീം കോടതി തള്ളി. സെന്സിറ്റീവ് ആയ കാര്യങ്ങള് സെന്സേഷണലൈസ് ചെയ്യരുതെന്ന് ജസ്റ്റിസുമാരായ അഹ്സാനുദ്ദീന് അമാനുല്ല, ഷീല് നാഗു എന്നിവരടങ്ങിയ ബെഞ്ച് ഹര്ജിക്കാരന് വേണ്ടി ഹാജരായ അഭിഭാഷകന് മുന്നറിയിപ്പു നല്കി.
‘നിങ്ങള് നിയമത്തിന് മുന്നില് ഒരു അഭിഭാഷകനാണ്. ഇത് എല്ലാ അഭിഭാഷകരുടെയും ഉത്തരവാദിത്തമാണ്. ഇത്തരം സെന്സിറ്റീവ് കാര്യങ്ങളില്, ഒരു ഇന്ത്യന് പൗരനെന്ന നിലയ്ക്ക് അതിന്റെ പ്രത്യാഘാതങ്ങള് മനസ്സിലാക്കണം. അനാവശ്യമായി അവയെ സെന്സേഷണലൈസ് ചെയ്യരുത്, അതിന് പ്രത്യാഘാതങ്ങള് ഉണ്ടാകും’ അഭിഭാഷകനോട് ജസ്റ്റിസ് അഹ്സാനുദ്ദീന് അമാനുല്ല പറഞ്ഞു.
പ്രവാചകനെക്കുറിച്ച് മുസ്ലീം സമൂഹത്തിന്റെ വികാരങ്ങളെ വ്രണപ്പെടുത്തുന്ന തരത്തില് പരാമര്ശങ്ങള് നടത്തിയെന്നാരോപിച്ച് കഴിഞ്ഞ മാസം മുംബൈ മെട്രോപൊളിറ്റന് പോലീസ് നാസിയ ഇലാഹി ഖാനെതിരെ എഫ്ഐആര് രജിസ്റ്റര് ചെയ്തിരുന്നു. മുംബൈയിലെ കോടതിയെ സമീപിക്കാതെ നേരിട്ട് പൊതുതാല്പര്യഹര്ജിയുമായി പരമോന്നത കോടതിയിലെത്തിയതാണ് വിമര്ശനത്തിന് ഇടയാക്കിയത്.
