തിരുവനന്തപുരം: കേരള സ്റ്റേറ്റ് ഡിസൈന് ആപ്റ്റിറ്റിയൂഡ് ടെസ്റ്റ് (കെഎസ്ഡിഎടി) മുഖേന നടക്കുന്ന ബി.ഡിസൈന് പ്രവേശന പരീക്ഷയും, കേരള ലോ എന്ട്രന്സ് എക്സാമിനേഷന് (ക്ലീ) മുഖേന നടക്കുന്ന നിയമ പ്രവേശന പരീക്ഷയും ജൂണ് 28ന്. രണ്ട് കോഴ്സുകളിലേക്കും അപേക്ഷ നല്കിയിരിക്കുന്ന വിദ്യാര്ത്ഥികള്ക്ക് ഇത് വലിയ ആശയക്കുഴപ്പവും മാനസിക സമ്മര്ദ്ദവും സൃഷ്ടിക്കുന്ന സാഹചര്യമാണെന്നാണ് രക്ഷിതാക്കള് പറയുന്നത്.
ലഭ്യമായ വിവരങ്ങള് പ്രകാരം, ക്ലീ അഞ്ച് വര്ഷ ഇന്റഗ്രേറ്റഡ് എല്എല്ബി പരീക്ഷ രാവിലെ 10 മുതല് 12 വരെയും, മൂന്ന് വര്ഷ എല്എല്ബി പരീക്ഷ ഉച്ചയ്ക്ക് 3 മുതല് 5 വരെയുമാണ്. അതേസമയം, ബി.ഡിസൈന് പ്രവേശന പരീക്ഷയും ജൂണ് 28ന് തന്നെയാണ് നിശ്ചയിച്ചിട്ടുള്ളത്. കെഎസ്ഡിഎടി ഹാള്ടിക്കറ്റ് വിദ്യാര്ത്ഥികളുടെ ലോഗിനില് ലഭ്യമാണെങ്കിലും, പൊതുവായി കാണുന്ന അറിയിപ്പുകളില് പരീക്ഷാസമയം വ്യക്തമായി പ്രദര്ശിപ്പിക്കാത്തത് ആശങ്ക വര്ദ്ധിപ്പിക്കുകയാണ്.
ഹാള്ടിക്കറ്റിലെ വിവരങ്ങള് പ്രകാരം, ക്ലീ പരീക്ഷയുടെ റിപ്പോര്ട്ടിങ് സമയം രാവിലെ 8.30നാണ്. അതേസമയം, ബി.ഡിസൈന് പരീക്ഷയുടെ റിപ്പോര്ട്ടിങ് സമയം രാവിലെ 9.00നും പരീക്ഷാസമയം രാവിലെ 9.30നുമാണ് ക്രമീകരിച്ചിരിക്കുന്നത്. ബി.ഡിസൈനും നിയമ പഠനവും ഒരുമിച്ച് അപേക്ഷ നല്കിയ വിദ്യാര്ത്ഥികള് കുറവല്ല. ഒരു പരീക്ഷ രാവിലെയും മറ്റൊന്ന് ഉച്ചയ്ക്കും ക്രമീകരിച്ചാലും ബുദ്ധിമുട്ടുകള് ഒഴിവാകില്ല.
രണ്ട് പരീക്ഷകളുടെയും പരീക്ഷാകേന്ദ്രം ഒരേ നഗരത്തിലായിരിക്കണമെന്നില്ല. രാവിലെ പരീക്ഷ കഴിഞ്ഞ് ഉച്ചതിരിഞ്ഞ് മറ്റൊരു കേന്ദ്രത്തിലെത്താന് യാത്രാസമയം പോരാതെ വരാം. റിപ്പോര്ട്ടിങ് സമയം, ബയോമെട്രിക് പരിശോധന, പരീക്ഷാഹാളിലേക്കുള്ള പ്രവേശന സമയപരിധി എന്നിവ കാരണം പരീക്ഷ കഴിഞ്ഞ ഉടന് അടുത്ത കേന്ദ്രത്തിലെത്തുക ബുദ്ധിമുട്ടാകും. ഒരേ ദിവസം രണ്ട് പ്രവേശന പരീക്ഷകള് എഴുതേണ്ടിവരുന്നത് മാനസിക സമ്മര്ദ്ദവും ആശയക്കുഴപ്പവും വര്ദ്ധിപ്പിക്കുമെന്നും വിദ്യാര്ത്ഥികള് പറയുന്നു.
ജന്മഭൂമി ഓണ്ലൈന്