തിരുവനന്തപുരം: സംസ്ഥാനത്തെ റേഷന് ഗോഡൗണുകളിലും റേഷന് കടകളിലും വിജിലന്സ് നടത്തിയ മിന്നല് പരിശോധനയില് വ്യാപക ക്രമക്കേടും അഴിമതിയും കണ്ടെത്തി. പ്രോജക്ട് സീറോയുടെ ഭാഗമായി ഓപ്പറേഷന് ഭക്ഷ്യസുരക്ഷ എന്ന പേരില് നടത്തിയ റെയ്ഡില് സംസ്ഥാനത്തെ 14 എന്എഫ്എസ്എ ഗോഡൗണുകളിലും, 54 റേഷന് ഷോപ്പുകളിലും പരിശോധന നടത്തി. ക്രമക്കേട് നടത്തിയ നാല് റേഷന് കട ലൈസന്സികളെ വിജിലന്സ് കയ്യോടെ പിടികൂടി.
വ്യാജ കെട്ടിട നിര്മ്മാണ കരാറുകാരുടെ വേഷത്തിലെത്തിയ വിജിലന്സ് ഉദ്യോഗസ്ഥര്ക്ക് മുന്നില് റേഷന് സാധനങ്ങള് മറിച്ചുവില്ക്കാന് ലൈസന്സികള് തയ്യാറായതോടെയാണ് തട്ടിപ്പ് വിവരം പുറത്തായത്. പരിശോധനയില് പലയിടത്തും സ്റ്റോക്ക് രജിസ്റ്ററും യഥാര്ത്ഥ സ്റ്റോക്കും തമ്മില് വലിയ അന്തരമുണ്ടെന്ന് കണ്ടെത്തി. ഉപഭോക്താക്കളുടെ പേരില് വ്യാജ ബില്ലുകള് നിര്മ്മിച്ച് പൊതുവിതരണത്തിനുള്ള ഭക്ഷ്യധാന്യങ്ങള് കരിഞ്ചന്തയില് വില്ക്കുകയായിരുന്നു. പരിശോധനയില് 18 ലക്ഷം രൂപയുടെ അനധികൃത സാമ്പത്തിക ഇടപാടുകളും പിടിച്ചെടുത്തു.
ഇത്തരത്തില് അനധികൃതമായി വിജിലന്സ് ഉദ്യോഗസ്ഥര്ക്ക് തന്നെ ഭക്ഷ്യധാന്യങ്ങള് വില്പന നടത്തിയ റേഷന്ഷോപ്പ് ലൈസന്സികളെയും, വാങ്ങിയെടുത്ത ഭക്ഷ്യധാന്യങ്ങളും അതാത് താലൂക്ക് സപ്ലൈ ഓഫീസര്മാര്ക്ക് തുടര്നടപടികള് സ്വീകരിക്കുന്നതിനായി കൈമാറി. അരി വിതരണത്തിനായി ഉപയോഗിക്കുന്ന വാഹനങ്ങളിലെ ജിപിഎസ് സംവിധാനം പ്രവര്ത്തനരഹിതമാണെന്നും, സര്ക്കാര് നിശ്ചയിച്ച വാഹനങ്ങള്ക്ക് പകരം സ്വകാര്യ വാഹനങ്ങളാണ് വിതരണത്തിനായി ഉപയോഗിക്കുന്നതെന്നും വിജിലന്സ് കണ്ടെത്തി. മിക്ക സ്ഥലങ്ങളിലും പല ഉപഭോക്താക്കളും ബില് പ്രകാരമുള്ള ഭക്ഷ്യധാന്യങ്ങള് മുഴുവനായും വാങ്ങിയിട്ടില്ല. ഉപഭോക്താക്കളുടെ പേരില് വ്യാജമായി ബില് ചെയ്ത ശേഷം ഈ ഭക്ഷ്യധാന്യം കൂടിയ വിലയ്ക്ക് മറിച്ചു വില്ക്കുന്നതായാണ് തെളിഞ്ഞത്.
ബേക്കറി, ഹോട്ടല്, ഫാം ഉടമകള്ക്ക് ഇത്തരത്തില് സാധനങ്ങള് മറിച്ചുവിറ്റ് ഗൂഗിള്പേ വഴിയാണ് പല റേഷന്കട ഉടമകളും പണം വാങ്ങിയിരിക്കുന്നത്. ചിലയിടങ്ങളില് മണ്ണെണ്ണ മാത്രം വാങ്ങുന്ന ഉപഭോക്താക്കളുടെ പേരില് ഭക്ഷ്യധാന്യങ്ങള്കൂടി വാങ്ങിയതായി കാണിച്ച് ബില് ചെയ്തതും വിജിലന്സ് കണ്ടെത്തി. പലയിടത്തും എന്എഫ്എസ്എ ഗോഡൗണിലെ ജീവനക്കാര് കരാറുകാരില് നിന്ന് പണം വാങ്ങിയതായി വ്യക്തമായി. സ്റ്റോക്കിലും വിതരണത്തിലും വലിയ ക്രമക്കേടുകളാണ് വിജിലന്സ് സംഘം കണ്ടെത്തിയത്.
പൊതുജനങ്ങളുടെ ശ്രദ്ധയില് അഴിമതി സംബന്ധിച്ച വിവരങ്ങള് ലഭിക്കുകയാണെങ്കില്, വിജിലന്സിന്റെ ടോള് ഫ്രീ നമ്പറായ 1064 എന്ന നമ്പറിലോ, 8592900900 എന്ന നമ്പറിലോ, വാട്ട്സ്ആപ്പ് നമ്പറായ 9447789100 ലോ അറിയിക്കണമെന്ന് വിജിലന്സ് ഡയറക്ടര് മനോജ് എബ്രഹാം അറിയിച്ചു.
