പത്തനംതിട്ട: ശബരിമലയില് സ്വര്ണം പൊതിഞ്ഞ ശ്രീകോവിലിന്റെ മുകളില് അസാധാരണമായ നിറവ്യത്യാസം കണ്ടെത്തി.ശ്രീകോവിലിന്റെ മുകള്ഭാഗത്ത് എന്തോ ദ്രാവകം ഒഴിച്ചതാണോ എന്ന സംശയം ഉയര്ന്ന സാഹചര്യത്തില് ഉന്നത ഉദ്യോഗസ്ഥര് ഉള്പ്പെടെയുള്ളവര് ശബരിമലയില് നേരിട്ടെത്തി പരിശോധനകള് നടത്തി.
ശ്രീകോവിലിന്റെ സ്വര്ണ മേല്ക്കൂരയിലെ നിറവ്യത്യാസം ശ്രദ്ധയില്പ്പെട്ടയുടന് തന്നെ തിരുവാഭരണ കമ്മീഷണര് അടക്കമുള്ള ഉദ്യോഗസ്ഥര് സ്ഥലത്ത് എത്തിച്ചേരുകയും വിശദ പരിശോധന നടത്തുകയും ചെയ്തു. പ്രാഥമിക പരിശോധന നടത്തിയപ്പോള് ശ്രീകോവിലിന് മുകളില് ഒഴുകിയിറങ്ങിയത് നെയ്യാണെന്നാണ് വിലയിരുത്തല്. ഭക്തര് സമര്പ്പിക്കുന്ന നെയ്യ് വീണതാകാം ഈ നിറവ്യത്യാസത്തിന് കാരണമെന്നാണ് കരുതുന്നത്. എന്നാല് സ്വര്ണപാളികള്ക്ക് മുകളില് ദ്രാവകം വീണതുമായി ബന്ധപ്പെട്ട് കൂടുതല് വ്യക്തത വരുത്താന് അധികൃതര് നടപടികള് സ്വീകരിച്ചു വരികയാണ്.
ശബരിമല സ്വര്ണക്കൊള്ളയില് പ്രത്യേക അന്വേഷണ സംഘം സന്നിധാനത്ത് കഴിഞ്ഞ ദിവസം പരിശോധന നടത്തിയിരുന്നു. പ്രഭാമണ്ഡലം അടക്കം ഇളക്കിയാണ് പരിശോധന നടത്തിയത്.ഹൈക്കോടതിയുടെ പ്രത്യേക അനുമതി വാങ്ങിയായിരുന്നു പരിശോധന.
