പത്തനംതിട്ട: ശബരിമല സ്വര്‍ണക്കൊള്ളക്കേസുമായി ബന്ധപ്പെട്ട് പ്രത്യേക അന്വേഷണ സംഘം സന്നിധാനത്ത് വീണ്ടും പരിശോധന നടത്തി. കേസിന്റെ അന്തിമ അന്വേഷണ റിപ്പോര്‍ട്ട് തയാറാക്കുന്നതിന് മുന്നോടിയായാണ് ഇത്.
പ്രത്യേക അന്വേഷണ സംഘം തലവനായ എസ്പി ശശിധരന്റെ നേതൃത്വത്തിലുള്ള സംഘമാണ് സന്നിധാനത്തെത്തി പരിശോധനകള്‍ നടത്തിയത്.പ്രധാനമായും ക്ഷേത്രത്തിലെ പ്രഭാമണ്ഡലം, കട്ടളപ്പടിയുടെ താഴ് ഭാഗം എന്നിവിടങ്ങളിലാണ് സംഘം വിശദ പരിശോധന നടത്തിയത്.
ഇളക്കിയെടുത്ത ഭാഗങ്ങളുടെ തൂക്കം കൃത്യമായി അളന്ന് തിട്ടപ്പെടുത്താന്‍ ലീഗല്‍ മെട്രോളജി വിഭാഗം ഉദ്യോഗസ്ഥരും അന്വേഷണ സംഘത്തോടൊപ്പം ഉണ്ടായിരുന്നു. ലബോറട്ടറിയില്‍ നിന്നും നേരത്തെ ലഭിച്ച പരിശോധനാ ഫലങ്ങള്‍ക്കൊപ്പം ഈ പുതിയ ശാസ്ത്രീയ വിവരങ്ങള്‍ കൂടി ചേര്‍ത്താകും ഹൈക്കോടതിയില്‍ അന്തിമ റിപ്പോര്‍ട്ട് സമര്‍പ്പിക്കുക. കോടതിയുടെ പ്രത്യേക അനുമതിയോടെയാകും കേസില്‍ കുറ്റപത്രം സമര്‍പ്പിക്കുക.
2025-ല്‍ ഹൈക്കോടതിയുടെ മുന്‍കൂര്‍ അനുമതിയില്ലാതെ സന്നിധാനത്തെ ദ്വാരപാലക ശില്‍പ പാളികള്‍ ചെന്നൈയിലെ സ്മാര്‍ട്ട് ക്രിയേഷന്‍സിലേക്ക് കൊണ്ടുപോയതുമായി ബന്ധപ്പെട്ടാണ് വലിയ സ്വര്‍ണക്കൊള്ളയുടെ വിവരങ്ങള്‍ പുറത്തുവരുന്നത്.
