പാലാ: നഗരസഭയിലെ ഭരണപക്ഷത്ത് കടുത്ത ഭിന്നത. ചെയര്‍പേഴ്സണ്‍ ദിയാ ബിനു പുളിക്കകണ്ടത്തിനെതിരെ ആറ് ഭരണപക്ഷ കൗണ്‍സിലര്‍മാര്‍ പരസ്യമായി രംഗത്ത്. ചെയര്‍പേഴ്‌സണിലുള്ള വിശ്വാസം നഷ്ടപ്പെട്ടെന്ന് പറഞ്ഞ് ഇവര്‍ യുഡിഎഫ് നേതൃത്വത്തിന് കത്ത് നല്‍കി.
അഞ്ച് കൗണ്‍സിലര്‍മാരും വൈസ് ചെയര്‍പേഴ്സണുമായ രാഹുലുമാണ് കത്തില്‍ ഒപ്പിട്ടിരിക്കുന്നത്. ചെയര്‍പേഴ്‌സന്റെ ഏകപക്ഷീയമായ തീരുമാനങ്ങളിലും പ്രവര്‍ത്തന ശൈലിയിലും ഉളള വിയോജിപ്പാണ് കൗണ്‍സിലര്‍മാരുടെ നീക്കത്തിന് പിന്നിലെന്നാണ് വിവരം. അതിനിടെ, അനുനയ ചര്‍ച്ചകളും ആരംഭിച്ചു.
14 യുഡിഎഫ് കൗണ്‍സിലര്‍മാരും മാണി സി. കാപ്പന്‍ എംഎല്‍എയുടെ വീട്ടില്‍ ചര്‍ച്ചയാക്കായി എത്തി. ഫ്രാന്‍സിസ് ജോര്‍ജ് എംപിയും പങ്കെടുക്കും. പുളിക്കകണ്ടം കുടുംബാംഗങ്ങളായ മൂന്ന് സ്വതന്ത്ര കൗണ്‍സിലര്‍മാരുടെ പിന്തുണയിലാണ് പാലാ നഗരസഭ യുഡിഎഫ് ഭരിക്കുന്നത്.
