റിയാദ് : അറബ് ലോകത്ത് സമഗ്രമായ ക്ഷേമം നിലനിർത്തുന്നതിൽ യോഗ ഒരു പ്രധാന മാർഗമായി അതിവേഗം പരിവർത്തനം ചെയ്തുവരികയാണ്. സൗദി അറേബ്യയിലും ഗൾഫ് മേഖലയിലെ മറ്റ് രാജ്യങ്ങളിലും ഇത് ഒരു കായിക വിനോദമായും പുനരധിവാസ പരിശീലനമായും ഔദ്യോഗികമായി അംഗീകരിക്കപ്പെട്ടിട്ടുണ്ട്.
സൗദി അറേബ്യയിലെ പുരോഗമന സർക്കാർ പരിഷ്കാരങ്ങളുടെ പിന്തുണയോടെയും യോഗ അതികായകൻമാരുടെ നേതൃത്വത്തിൽ, സമ്മർദ്ദ പരിഹാരത്തിനും സമൂഹ നിർമ്മാണത്തിനുമുള്ള ഒരു ദൈനംദിന മാർഗമായി ഈ പരിശീലനം വളർന്നു കഴിഞ്ഞുവെന്ന് വേണം പറയുവാൻ.
ഈ സാഹചര്യത്തിൽ ആരോഗ്യകരമായ വാർദ്ധക്യത്തിനായുള്ള യോഗ എന്ന പ്രമേയത്തിൽ റിയാദിൽ നടക്കുന്ന യോഗ ദിന പരിപാടിക്കുള്ള ഒരുക്കങ്ങൾ പൂർത്തിയായിവരികയാണ്.
ജൂൺ 20 ന് പ്രിൻസ് ഫൈസൽ ബിൻ ഫഹദ് സ്റ്റേഡിയത്തിൽ നടക്കാനിരിക്കുന്ന പ്രധാന അന്താരാഷ്ട്ര യോഗ ദിനം 2026 ആഘോഷത്തിന്റെ സുഗമമായ ഏകോപനവും വിജയകരമായ നടത്തിപ്പും ഉറപ്പാക്കുന്നതിനായി റിയാദിലെ ഇന്ത്യൻ എംബസി സജീവ ഇന്ത്യൻ സമൂഹ സംഘടനകളുമായും സന്നദ്ധപ്രവർത്തകരുമായും ഒരു അവലോകന യോഗം നടത്തിയിരുന്നു.
പ്രവാസി ഭാരതീയ സമ്മാൻ അവാർഡ് ജേതാക്കളായ ഷിഹാബ് കൊത്തുകാട്, അൻവർ ഖുർഷിദ് എന്നിവരെ കൂടാതെ പ്രമുഖ കമ്മ്യൂണിറ്റി സംഘടനകളായ സാറ്റ സെൻട്രൽ, ദിശ, ഐഒഎഫ് എന്നിവരും മുതിർന്ന നയതന്ത്രജ്ഞൻ അബു മാത്തൻ ജോർജും ചർച്ചയിൽ പങ്കെടുത്തു.
കൂടാതെ റിയാദ് മുനിസിപ്പാലിറ്റിയുടെ പിന്തുണയോടെ ഒരു പൊതു പാർക്കിൽ ഒരു വലിയ യോഗ ദിന പരിപാടി നടത്താൻ തങ്ങൾ പദ്ധതിയിടുന്നതായി സാറ്റ സെൻട്രലിലെ ഭാരവാഹികളും അറിയിച്ചിട്ടുണ്ട്.
ജന്മഭൂമി ഓണ്ലൈന്