വയനാട്: കാട്ടിക്കുളത്ത് കാട്ടാന ആക്രമണത്തില് പരിക്കേറ്റ് ചികിത്സയിലായിരുന്ന തോട്ടം തൊഴിലാളി മരിച്ചു.പുളിമൂട് ഉന്നതിയിലെ രാജു(50) ആണ് മരിച്ചത്.
കൃഷി സ്ഥലത്ത് വെച്ചാണ് തൊഴിലാളിയെ ആന ആക്രമിച്ചത്.ബുധനാഴ്ച രാവിലെയോടെ ജനവാസ പ്രദേശത്ത് ഇറങ്ങിയ ഒറ്റയാനെ തുരത്തുന്നതിനിടെ ആനയുടെ മുന്നില് പെടുകയായിരുന്നു.കാട്ടാനയുടെ ആക്രമണത്തില് രാജുവിന്റെ വാരിയെല്ലിനും ആന്തരികാവയവങ്ങള്ക്കും ഗുരുതരമായ തകരാറുകള് സംഭവിച്ചു. ആന തുമ്പിക്കൈ കൊണ്ട് തട്ടി ഇയാളെ 20 മീറ്ററുകളോളം വലിച്ച് കൊണ്ടുപോയി. പരിക്കേറ്റ ഉടന് തന്നെ മാനന്തവാടി മെഡിക്കല് കോളേജ് ആശുപത്രിയില് ചികിത്സയ്ക്കായി പ്രവേശിപ്പിച്ചു.
ഏറെ മണിക്കൂറുകള് ഭീതി പരത്തിയ ഒറ്റയാനെ വനം വകുപ്പും നാട്ടുകാരും ചേര്ന്ന് കാടുകയറ്റി. കാടിനോട് ചേര്ന്നുളള അതിര്ത്തി പ്രദേശമായതിനാല് കാട്ടാനയുടെ സാന്നിധ്യം പതിവായിരുന്നെങ്കിലും അടുത്തകാലത്തായി കാട്ടാനശല്യത്തിന് കുറവുണ്ടായിരുന്നു.എന്നാല് ഇന്ന് വീണ്ടും ഒറ്റയാന്റെ സാന്നിധ്യം പ്രദേശത്ത് ഭീതി പരത്തുകയായിരുന്നു.സംഭവത്തില് മെഡിക്കല് കോളേജ് ആശുപത്രിക്ക് മുന്നില് മാനന്തവാടി മെഡിക്കല് കോളേജ് മോര്ച്ചറി പരിസരത്ത് സിപിഎമ്മിന്റെ നേതൃത്വത്തില് വലിയ പ്രതിഷേധം നടത്തി.
