കൊച്ചി: രാജീവ് ഗാന്ധി ഇന്ഡോര് സ്റ്റേഡിയത്തില് ആവേശകരമായി മുന്നേറുന്ന ബാസ്കറ്റ്ബോള് ലീഗ് കേരളയുടെ (ബിഎല്കെ) അഞ്ചാം ദിനം പിന്നിടുമ്പോള് പോരാട്ടങ്ങള് കടുക്കുന്നു. ലീഗ് റൗണ്ടില് ഇനി വെറും രണ്ട് ദിവസങ്ങള് മാത്രം ബാക്കി നില്ക്കെ ടീമുകള് സെമി ഫൈനല് യോഗ്യതയ്ക്കായി ഇഞ്ചോടിഞ്ച് പോരാട്ടത്തിലാണ്. ടൂര്ണമെന്റിലെ കരുത്തരായ കാലിക്കറ്റ് വാരിയേഴ്സ് തങ്ങളുടെ അപരാജിത കുതിപ്പ് തുടര്ന്ന് വന് മുന്നേറ്റമാണ് നടത്തുന്നത്. അണ്ടര്-14 ബോയ്സ്, അണ്ടര്-14 ഗേള്സ്, അണ്ടര്-19 ഗേള്സ് എന്നീ മൂന്ന് വിഭാഗങ്ങളിലും തോല്വിയറിയാതെ മുന്നേറുന്ന വാരിയേഴ്സ് സെമി ഫൈനല് നോക്കൗട്ട് സ്റ്റേജ് ഉറപ്പിച്ചു കഴിഞ്ഞു.
അതേസമയം, അണ്ടര്-19 ബോയ്സ് വിഭാഗത്തിലും പോരാട്ടം കനക്കുകയാണ്. ലീഗില് തൃശൂര് ടസ്കേഴ്സ് തങ്ങളുടെ കുതിപ്പ് തുടര്ന്ന് തോല്വിയറിയാതെ മുന്നില് നില്ക്കുന്നു. ഇവര്ക്ക് ഇനി രണ്ട് മത്സരങ്ങള് കൂടി ബാക്കിയുണ്ട്. തുടര്ച്ചയായ മൂന്ന് വിജയങ്ങള്ക്ക് ശേഷം അടുത്ത രണ്ട് മത്സരങ്ങളും പരാജയപ്പെട്ട കോട്ടയം ബൈസണ്സ് തങ്ങളുടെ ലീഗ് റൗണ്ട് മത്സരങ്ങള് പൂര്ത്തിയാക്കി. എങ്കിലും ആദ്യ നാലില് ഇടം നേടാമെന്ന പ്രതീക്ഷയിലാണ് അവര്. ടൂര്ണമെന്റിലെ രണ്ട് തോല്വികള്ക്ക് ശേഷം ശക്തമായി തിരിച്ചുവന്ന കാലിക്കറ്റ് വാരിയേഴ്സ് തുടര്ച്ചയായ രണ്ട് വിജയങ്ങളോടെ തങ്ങളുടെ സെമി സാധ്യതകള് സജീവമാക്കി. ഇനി ഒരു മത്സരം കൂടിയാണ് അവര്ക്ക് അവശേഷിക്കുന്നത്.
രാവിലെ മുതല് ആരംഭിച്ച മത്സരങ്ങള് കാണാന് വലിയ തോതിലുള്ള കാണികളാണ് സ്റ്റേഡിയത്തില് എത്തിയത്. ടൂര്ണമെന്റിലെ പ്രമുഖ ടീമുകളായ ട്രിവാന്ഡ്രം കാപ്പിറ്റല്സ്, കോട്ടയം ബൈസണ്സ്, കാലിക്കറ്റ് വാരിയേഴ്സ് എന്നിവര് നേര്ക്കുനേര് വന്ന മത്സരങ്ങള് ലീഗ് പോയിന്റ് ടേബിളില് വലിയ മാറ്റങ്ങളാണ് വരുത്തിയത്.
അണ്ടര്-19 ബോയ്സ് വിഭാഗത്തില് കാലിക്കറ്റ് വാരിയേഴ്സും ആലപ്പുഴ ഡോള്ഫിന്സും തമ്മില് നടന്ന മത്സരമാണ് ഇന്നത്തെ ദിവസത്തെ ഏറ്റവും ആവേശകരമായ പോരാട്ടം. ആറ് തവണ സ്കോറുകള് തുല്യനിലയിലാവുകയും നാല് തവണ ലീഡ് മാറിമറിയുകയും ചെയ്ത മത്സരം കാണികളെ മുള്മുനയില് നിര്ത്തി. മത്സരത്തില് ആലപ്പുഴ ടീം 5 ത്രീ-പോയിന്ററുകള് നേടി മികച്ച പ്രകടനം പുറത്തെടുത്തെങ്കിലും 68-63 എന്ന സ്കോറിന് കാലിക്കറ്റ് വിജയം ???ിച്ചെടുത്തു. മൂന്നാം ക്വാര്ട്ടര് അവസാനിക്കുമ്പോള് ജി. കാരായംപറമ്പില് ജോനാഥന്, സച്ചു സന്തോഷ് എന്നിവരുടെ മികച്ച പ്രകടനത്തിലൂടെ ആലപ്പുഴ 53-44 എന്ന സ്കോറിന് മുന്നിലായിരുന്നു. എന്നാല് ആവേശകരമായ അവസാന ക്വാര്ട്ടറില് തകര്പ്പന് തിരിച്ചുവരവ് നടത്തിയ കാലിക്കറ്റ് വാരിയേഴ്സ് തുടര്ച്ചയായി 10 പോയിന്റുകള് നേടി മത്സരം അനുകൂലമാക്കി. അവസാന ക്വാര്ട്ടറില് മാത്രം 11 പോയിന്റുകള് സ്കോര് ചെയ്ത സച്ചു സന്തോഷിന്റെ (മൊത്തം 26 പോയിന്റ്) തകര്പ്പന് പ്രകടനമാണ് കാലിക്കറ്റിന് തുടര്ച്ചയായ രണ്ടാം വിജയം സമ്മാനിച്ചത്.
