ആദ്ധ്യാത്മിക മണ്ഡലത്തിലെ വ്യത്യസ്ത വിഷയങ്ങള്‍ പാണ്ഡിത്യ ഗരിമയോടെ സാധാരണക്കാര്‍ക്കും ഉള്‍ക്കൊള്ളാവുന്ന തരത്തില്‍ പകര്‍ന്നുതന്നുകൊണ്ട് നിഷ്‌ക്കളങ്കവും നിഷ്‌കാമവുമായ ജീവിതം നയിക്കുന്നയാളായ നമ്പ്യാര്‍ജിക്ക് ഈ മാസം 10 ന് (ഇടവ മാസം ഉതൃട്ടാതി) എണ്‍പത് തികയുകയാണ്.
എറണാകുളത്ത് വ്യാപാരം നടത്തിയിരുന്ന ഒന്നാംകിട വ്യാപാരിയായിരുന്ന പയ്യന്നൂര്‍ സ്വദേശിയാണ് അദ്ദേഹം. തന്റെ വ്യാപാരത്തില്‍ നിന്നുള്ള അര്‍ഹതപ്പെട്ട ലാഭം, ഗംഗാ മാതാവില്‍ നിന്ന് എടുത്ത ജലം പ്രാര്‍ത്ഥനയോടെയും സമര്‍പ്പണ ഭാവത്തോടെയും ഗംഗയില്‍ തന്നെ അര്‍ഘ്യം ചെയ്യുന്നപോലെ സമൂഹത്തിന് സമര്‍പ്പിക്കുന്നയാളായിരുന്നു നമ്പ്യാര്‍ജി. വ്യാപാരമെല്ലാം അവസാനിപ്പിച്ച് ഇരുപത് വര്‍ഷത്തിന് ശേഷവും നമ്പ്യാര്‍ജി മാനവസേവനം തുടരുകയാണ്.
ഏറെ യാത്ര ചെയ്ത് പ്രഭാഷണങ്ങള്‍ നടത്തുന്ന ശീലം നമ്പ്യാര്‍ജിക്കുണ്ട്. ദക്ഷിണ സമര്‍പ്പിച്ചാല്‍ അതില്‍ സ്പര്‍ശിച്ച് സ്വീകരിച്ചെന്നു വരുത്തി അതവിടെത്തന്നെ കൊടുത്തു മടങ്ങുകയാണ് പതിവ്. കാര്‍ ഓടിക്കാന്‍ ശരീരം അനുവദിച്ചിരുന്ന കാലം വരെ കിലോമീറ്ററുകളോളം നിരന്തരം സഞ്ചരിച്ച് ജിജ്ഞാസുക്കളായ പഠിതാക്കളെ സന്തുഷ്ടരാക്കിക്കൊണ്ടേയിരിക്കുന്ന നമ്പ്യാര്‍ജിയുടെ അനുകരണീയ ജീവിതം ഭഗവാന്റെ നേരിട്ടുളള ശ്രദ്ധയുടെ ഊര്‍ജ്ജമാണ്.
കേരളത്തില്‍ അങ്ങോളമിങ്ങോളം സഞ്ചരിച്ച് നിത്യനിദാനങ്ങള്‍ക്കു ബുദ്ധിമുട്ടുന്ന ആശ്രമങ്ങളേയും സംന്യാസികളേയും കണ്ടെത്തി അവരുടെ ആവശ്യങ്ങള്‍ നിറവേറ്റാന്‍ ഭഗവാന്‍ തന്നെ ഏല്‍പ്പിച്ച ചുമതല പൂര്‍ത്തിയാക്കുന്ന ഭാവത്തോടെ നീങ്ങുന്ന നമ്പ്യാര്‍ജിയെക്കുറിച്ച് ആദരവോടെ പറയുന്ന സംന്യാസിമാരെയും കാണാന്‍ കഴിയും.
എറണാകുളം നഗരത്തിലെ നമ്പ്യാര്‍ജിയുടെ വീടിന്റെ ഒരു ഭാഗം സംന്യാസിമാരുടേയും ധര്‍മ്മാചാര്യന്മാരുടേയും വിശ്രമകേന്ദ്രമായിരുന്നു. പൂജനീയ ചിന്മയാനന്ദജിയുമായുള്ള സമര്‍പ്പണ ബന്ധം ആദരവോടെ, അഭിമാനത്തോടെ ഇന്നും നമ്പ്യാര്‍ജി കാത്തുസൂക്ഷിക്കുന്നു. ചിന്മയാമിഷന്റെ ആദ്യകാല സെക്രട്ടറിയായും പ്രസിഡന്റായുമൊക്കെ പ്രവര്‍ത്തിച്ചിട്ടുണ്ട്. പിറവത്ത് വെളിയനാട് ശ്രീശങ്കര ജന്മഗൃഹം ഇന്നു കാണുന്ന ചിന്മയ ഇന്റര്‍നാഷണല്‍ ഫൗണ്ടേഷന്‍ ആക്കിത്തീര്‍ത്ത തുടക്കക്കാരില്‍ പ്രധാനിയും നമ്പ്യാര്‍ജി ആയിരുന്നു.
ആദ്ധ്യാത്മിക മേഖലയില്‍ അനുസ്യൂതം കഴിഞ്ഞ 30 വര്‍ഷത്തിലധികമായി നടത്തുന്ന ഈ തപസ്സ് ശാരീരിക പ്രശ്‌നങ്ങളെ തെല്ലുപോലും വകവയ്‌ക്കാതെ ഇന്നും തുടര്‍ന്നുകൊണ്ടേയിരിക്കുന്നു.
നന്മയുടെ ഉറവകള്‍ വറ്റിക്കൊണ്ടിരിക്കുന്ന ഈ കാലഘട്ടത്തില്‍ നമ്മോടൊപ്പം എപ്പോഴും നിഷ്‌കളങ്കമായ പുഞ്ചിരിയോടെ നമ്പ്യാര്‍ജിയെ കാണാന്‍ കഴിയുന്നതുതന്നെ ഒരു അനുഗ്രഹമാണ്. അദ്ദേഹത്തിന്റെ ദീര്‍ഘായുസ്സിനും സന്തോഷ ജീവിതത്തിനും വേണ്ടി ഭഗവത്കൃപ ഇനിയുമിനിയുമുണ്ടാകട്ടെയെന്ന് പ്രാര്‍ത്ഥിക്കാം.
നമ്പ്യാര്‍ജി ഒരു അക്ഷരശ്ലോക വിദഗ്‌ദ്ധനും അതിനെ എല്ലാത്തരത്തിലും പ്രോത്സാഹിപ്പിക്കുന്നയാളുമാണ്. പുരസ്‌കാരങ്ങള്‍ക്ക് താല്‍പ്പര്യമില്ലാത്തയാളാണെങ്കിലും ഇടപ്പള്ളി കുറൂര്‍ ആര്യ അന്തര്‍ജനം സ്മാരക ‘ശ്ലോകാചാര്യ’ പുരസ്‌കാര സ്വീകരിക്കുകയുണ്ടായി. അക്ഷരശ്ലോക പ്രസ്ഥാനത്തിന് നിസ്തുല സംഭാവനകള്‍ നല്‍കിയ ആളെന്ന നിലയ്‌ക്കായിരുന്നു ഈ പുരസ്‌കാരം നല്‍കിയത്. മാനവസേവസമിതിയുടെ രാമായണശ്രീ പുരസ്‌കാരം, രാമകൃഷ്ണ മഠത്തിന്റെ ധര്‍മ്മപ്രചാര്‍ പുരസ്‌കാരവും നമ്പ്യാര്‍ജിക്ക് നല്‍കുകയുണ്ടായി.
