ഓസ്ലോ: നോര്വ്വെ ചെസ്സില് ഒമ്പതാം റൗണ്ടില് വീണ്ടും ഗുകേഷും പ്രജ്ഞാനന്ദയും തമ്മില് വ്യാഴാഴ്ച രാത്രി ഏറ്റുമുട്ടും. ഈ മത്സരം പ്രജ്ഞാനന്ദയെ സംബന്ധിച്ചിടത്തോളം സുപ്രധാനമാണ്. ഇതില് ജയിച്ചാല് ഇപ്പോള് 12 പോയിന്റോടെ ഈ ടൂര്ണ്ണമെന്റില് മൂന്നാം സ്ഥാനത്ത് നില്ക്കുന്ന പ്രജ്ഞാനന്ദയ്ക്ക് കിരീട സാധ്യത നിലനിര്ത്താം. ലോക ചെസ് ചാമ്പ്യനായ ഗുകേഷിനാകട്ടെ ഈ വിജയം സുപ്രധാനമാണ്. നവമ്പറില് ഇന്ത്യയില് നടക്കാന് പോകുന്ന ലോകചെസ് കിരീടപ്പോരില് ഉസ്ബെക്കിസ്ഥാന്റെ സിന്ഡറോവുമായി ഏറ്റുമുട്ടുന്ന ഗുകേഷിന് ഈ ജയത്തോടെ തന്റെ പ്രതിഭ മാഞ്ഞുപോയിട്ടില്ലെന്ന് തെളിയിക്കാം.
ഡബിള് റൗണ്ട് റോബിന് ശൈലിയിലാണ് മത്സരം. ആദ്യം ക്ലാസിക് ഗെയിം കളിക്കും. ഇതില് ജയിക്കുന്നയാള്ക്ക് മൂന്ന് പോയിന്റ് കിട്ടും. ക്ലാസിക് ഗെയിം സാവധാനത്തിലുള്ള കരുനീക്കങ്ങളാണ്. രണ്ട് മണിക്കൂറില് 40 നീക്കങ്ങള് നടത്തിയാല് മതിയാവും. ഇതില് സമനിലയില് പിരിഞ്ഞാല് വിജയിയെ നിശ്ചയിക്കാന് ആമെഗെഡ്ഡോണ് ഗെയിം കളിക്കും. അതിവേഗത്തിലുള്ള കരുനീക്കങ്ങളായിരിക്കും ഇതില്. ഇതില് വിജയിക്കുന്നയാള്ക്ക് ഒന്നര പോയിന്റും തോല്ക്കുന്ന ആള്ക്ക് ഒരു പോയിന്റും ലഭിക്കും.
ഇനി ടൂര്ണ്ണമെന്റില് ഒരു റൗണ്ട് കൂടി അവശേഷിക്കേ പ്രജ്ഞാനന്ദ 12 പോയിന്റോടെ മൂന്നാം സ്ഥാനത്ത് നില്ക്കുകയാണ്. 14 പോയിന്റോടെ വെസ്ലി സോയും 13 പോയിന്റോടെ ഫ്രഞ്ച് താരം അലിറെസ ഫിറൂഷയുമാണ് ഒന്നും രണ്ടും സ്ഥാനത്ത്.
ഇന്നത്തെ മറ്റ് രണ്ട് മത്സരങ്ങളും നിര്ണ്ണായകമാണ്. മാഗ്നസ് കാള്സന് ഇപ്പോള് മുന്നില് നില്ക്കുന്ന അമേരിക്കയുടെ വെസ്ലി സോയെയും അലിറെസ് ഫിറൂഷ ജര്മ്മന്താരം വിന്സെന്റ് കെയ്മറെയും നേരിടും. ഇതിലെ വിജയപരാജയങ്ങള് പ്രജ്ഞാനന്ദയുടെ കിരീട സാധ്യതയെ ബാധിക്കും.
നേരത്തെ ഗുകേഷും പ്രജ്ഞാനന്ദയും തമ്മില് നടന്ന പോരില് ഗുകേഷ് പ്രജ്ഞാനന്ദയെ ക്ലാസിക് ഗെയിമില് തന്നെ തോല്പിച്ചിരുന്നു. പക്ഷെ കഴിഞ്ഞ രണ്ട് കളികളില് മാഗ്നസ് കാള്സനെയും അലിറെസ ഫിറൂഷയെയും തോല്പിച്ച് പ്രജ്ഞാനന്ദ അപാരഫോമിലാണ്. ഈ ടൂര്ണ്ണമെന്റില് രണ്ട് തവണ പ്രജ്ഞാനന്ദ മാഗ്നസ് കാള്സനെ തോല്പിച്ചത് വലിയ വാര്ത്തയായിരുന്നു. ചെസ്സിലെ മുടിചൂടാമന്നനായ മാഗ്നസ് കാള്സന് ഇക്കുറി നോര്വ്വെ ചെസ്സില് ഏറ്റവും പിന്നിലാണ്. സ്വന്തം നാടായ നോര്വ്വെയിലെ തുടര്ച്ചയായ തോല്വികള് മാഗ്നസ് കാള്സന്റെ മുഖം നഷ്ടപ്പെടുത്തിയിരിക്കുകയാണ്.
