തിരുവനന്തപുരം: പ്രതിപക്ഷ നേതാവ് പിണറായി വിജയന്റെ ഡ്രൈവറെ മര്ദിച്ചെന്ന പരാതി വസ്തുതാ വിരുദ്ധമെന്ന് റെയില്വേ പൊലീസ്. ഡ്രൈവറെ മര്ദിച്ചിട്ടില്ലെന്ന് പൊലീസ് അറിയിച്ചു. വിഷയത്തില് ഇന്റലിജന്സ് മേധാവിക്ക് റെയില്വേ പൊലീസ് റിപ്പോര്ട്ട് നല്കി.
എകെജി സെന്ററിലെ ഡ്രൈവര് അനൂപ് തില്ലങ്കേരിയാണ് ഡി ജി പിക്ക് പരാതി നല്കിയത്.പിണറായി വിജയനെ റെയില്വേ സ്റ്റേഷനില് ഇറക്കിയ ശേഷമാണ് സംഭവം നടന്നതെന്നാണ് ആരോപണം.
‘വണ്ടിയെടുത്ത് മാറ്റെടാ’ എന്ന് ആക്രോശിച്ചു കൊണ്ട് കഴുത്തിന് പിടിച്ച് തള്ളിയതായാണ് അനൂപ് പറയുന്നത്. റെയില്വേ സ്റ്റേഷനില് ഡ്യൂട്ടിയില് ഉണ്ടായിരുന്ന പൊലീസുകാരാണ് കൈയേറ്റം ചെയ്തതെന്നാണ് പരാതി.ജയന്, ശരത് എന്നീ പൊലീസുകാരാണ് കൈയേറ്റം ചെയ്തതെന്ന് പരാതിയില് പറയുന്നു.
