പാലക്കാട്: നെന്മാറയില് പാമ്പുകടിയേറ്റ് ചികിത്സയിലായിരുന്ന പെണ്കുട്ടി മരിച്ചു. നെന്മാറ ചക്കാത്തറ സ്വദേശികളായ രാമന്-അംബിക ദമ്പതികളുടെ മകള് രാജേശ്വരിയാണ്(13) ഞായറാഴ്ച രാവിലെ മരിച്ചത്. രണ്ടാഴ്ച മുമ്പ് വീടിനകത്ത് കളിച്ചുകൊണ്ടിരിക്കെയാണ് കുട്ടിയെ മൂര്ഖന് കടിച്ചത്.
വീട്ടില് മറ്റാരും ഇല്ലാതിരുന്നപ്പോഴാണ് കുട്ടിയെ പാമ്പ് കടിച്ചത്.വൈകിട്ട് ജോലി കഴിഞ്ഞ് എത്തിയ പിതൃ സഹോദരനും ഭാര്യയുമാണ് വായില് നിന്ന് നുരയും പതയും വന്ന് ബോധരഹിതയായി കിടന്ന കുഞ്ഞിനെ കണ്ടത്.
ഉടന് തന്നെ നെന്മാറയിലെ സര്ക്കാര് ആശുപത്രിയിലും പിന്നീട് ആലത്തൂരിലെ സ്വകാര്യ ആശുപത്രിയിലും എത്തിച്ചു. ആരോഗ്യനില ഗുരുതരമായതോടെ തൃശൂര് മെഡിക്കല് കോളേജ് ആശുപത്രിയിലേക്ക് മാറ്റി. ഏഴാം ക്ലാസ് വിദ്യാര്ത്ഥിനിയാണ് മരിച്ച രാജേശ്വരി.
ആലപ്പുഴ അരൂര് സ്വദേശിനി 13 വയസുകാരിയും ഇന്ന് പാമ്പുകടിയേറ്റ് മരിച്ചു. അരൂര് സെന്റ് അഗസ്റ്റിന് സ്കൂളിലെ എട്ടാം ക്ലാസ് വിദ്യാര്ത്ഥിനി നിയ ആണ് മരിച്ചത്. സ്വകാര്യ ആശുപത്രിയില് ഇരുപത്തി നാല് ദിവസം ചികിത്സയില് കഴിഞ്ഞ കുട്ടി ഇന്ന് രാവിലെയാണ് മരിച്ചത്.
