തിരുവനന്തപുരം:തലസ്ഥാന നഗരത്തില് ശക്തമായ മഴ പെയ്താല് വെളളം പൊങ്ങുന്ന സാഹചര്യം പല കാലങ്ങളിലെ അശാസ്ത്രീയമായ നിര്മാണം കൊണ്ട് സംഭവിച്ചതാണെന്ന് മേയര് വി വി രാജേഷ്. ഒറ്റ നിമിഷം കൊണ്ട് ഇത് പരിഹരിക്കാന് കഴിയില്ല.കോര്പറേഷന് മാത്രം വിചാരിച്ചാല് പ്രശ്നത്തിന് ശാശ്വത പരിഹാരം കാണാനാകില്ല.ഒമ്പത് വകുപ്പുകള് ഒത്തൊരുമിച്ച് പ്രവര്ത്തിക്കേണ്ട കാര്യമാണ് കോര്പ്പറേഷന് ഒറ്റക്ക് ചെയ്യണമെന്ന് പറയുന്നത്. മുഖ്യമന്ത്രിയുമായി ഇക്കാര്യം സംസാരിച്ചെന്നും മേയര് പറഞ്ഞു.
മുതിര്ന്ന ഉദ്യോഗസ്ഥരുമായി സംസാരിച്ച് പ്ലാന് തയാറാക്കിയിട്ടുണ്ട്.ആമയിഴഞ്ചാന് തോടും പാര്വതിപുത്തനാറും പൂര്ണമായും ജലസേചന വകുപ്പിന്റെ ഉത്തരവാദിത്തത്തിലാണ്. അവയ്ക്ക് മുകളില് സ്ലാബിട്ടാല് പ്രശ്നം പരിഹരിക്കാനാകും.അതിന് കോര്പറേഷന് മുന്കൈയെടുക്കാം.എന്നാല് കേന്ദ്ര- സംസ്ഥാന സര്ക്കാരുകളുടെ പദ്ധതികളുമായി ബന്ധപ്പെടുത്തി ഫണ്ട് വേണ്ടതുണ്ട്.വിദഗ്ധ ഉപദേശവും വേണം.
കഴിഞ്ഞ ദിവസം പെയ്ത മഴയില് കോര്പറേഷന് ഉടമസ്ഥതയിലുള്ള ഒരു ഓടയിലും വെള്ളം കയറിയില്ല. ആമയിഴഞ്ചാന് തോടിന്റെയും പാര്വതിപുത്തനാറിന്റെയും കാര്യം ജലസേചന വകുപ്പ് ചെയ്താല് ഇപ്പോഴുള്ള പ്രശ്നം പരിഹരിക്കാമെന്നും മേയര് പറഞ്ഞു.
